ކުރީގެ މަޝްހޫރު ކޮމީޑިއަން ޝާހިދު ނިޔާވެއްޖެ

ކުރީގެ މަޝްހޫރު ފިލްމީ ކޮމޭޑިއަން އަހްމަދު ޝާހިދު ހަލީމް ނިޔާވެއްޖެއެވެ.

ޝާހިދު ނިޔާވެފައި ވަނީ އޭނާގެ ހާލު ސީރިއަސްވެ އައިޖީއެމްއެޗްގައި އެޑްމިޓް ކޮށްގެން ފަރުވާ ދޭތާ މަހެއްހާ ދުވަސްވެފައި ވަނިކޮށެވެ.

ސަރުކާރުން ވަނީ ޝާހިދަށް ތަމްސީލު ކުޅުމުގެ ރޮނގުން 1986 ވަނަ އަހަރު އާއްމު ޚިދުމަތުގެ ހިތްވަރު ދިނުމުގެ އިނާމު ދީފައެވެ.

ރާއްޖޭގެ ސްޓޭޖް ތަމްސީލުގެ ރަން ދުވަސްވަރު ކަމަށްވާ 1970ގެ ތެރޭގައި އޭނާ ވަނީ އެތައް ތަމްސީލެއް ކުޅުއްވައިފަ އެވެ. އެންމެ ފާހަގަކުރެވެނީ އިބްރާހީމް ނާސިރުގެ ރައީސްކަމުގައި މިނިވަން ދުވަސް ފާހަގަކުރުމަށް ލޮނުޒިޔާރަތްކޮޅުގައި ސްޓޭޖް ހަދައިގެން ކޮޕީ މުހައްމަދު ރަޝީދާއި، ޗިޅިޔާ މޫސާމަނިކުއާ އެކު ކުޅުއްވި 'ތިން އުނދަގޫ' ތަމްސީލެވެ.

ޓީވީ މޯލްޑިވްސް އިން 1980ގެ ފަހުކޮޅު އުފެއްދި 'ބަހަބަރު' ޝޯގައި ވެސް ޝާހިދު އުޅުއްވިއެވެ. ފީބޯ އަހުމަދު މަނިކާއި، ކޮއްޔަ ހަސަން މަނިކާ އެކު، ޝާހިދު އެ ޝޯގައި އަދާކުރެއްވި ރޯލު އަދިވެސް ގިނަ ބައެއްގެ ހަނދާނުގައި ހަރުލާފައިވެއެވެ.