މިނިވަން ދުވަހުގެ ހަރަކާތްތަކަށް ދަނޑު ބޭނުންކުރާތީ ލީގު މެޗުތައް ފަސްކޮށްފި
މިނިވަން ދުވަހުގެ ހަރަކާތްތަކަށް ގަލޮޅު ރަސްމީ ދަނޑު ބޭނުން ކުރާތީ ލީގު މެޗުތައް ވަނީ މި މަހުގެ 29 ވަނަ ދުވަހަށް ބަދަލު ކޮށްފައި
އީގަލްސް އާއި ސަސް ބައްދަލުކުރި މެޗެއްގެ ތެރެއިން
މިއަހަރުގެ މިނިވަން ދުވަހުގެ ކުޅިވަރުތަކަށް ގަލޮޅު ރަސްމީ ދަނޑު ބޭނުން ކުރުމަށް ނިންމާފައިވާތީ، ދިވެހި ޕްރިމިއާ ލީގުގެ މެޗުތައް ފަސް ކުރުމަށް ފުޓުބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް) އިން ނިންމައިފި އެވެ.
އެފްއޭއެމްގެ ޖެނަރަލް ސެކްރެޓަރީ ޙުސެއިން ޖަވާޒް (ޖަވާ) މީޑިއާތަކަށް ފޮނުވި މެސެޖެއްގައި ވިދާޅުވީ، މިނިވަން ދުވަހުގެ ހަރަކާތްތަކަށް ގަލޮޅު ރަސްމީ ދަނޑު ބޭނުން ކުރާތީ ލީގު މެޗުތައް މި މަހުގެ 29 ވަނަ ދުވަހަށް ބަދަލު ކޮށްފައިވާ ކަމަށެވެ. ލީގު ތާވަލްގައި އޮތް ގޮތުން ހޯމަ އަދި އަންގާރަ ދުވަހު ލީގު މެޗުތައް ކުރިއަށް ދާނެ އެވެ. އެގޮތުން ތާވަލްގައި ވަނީ ހޯމަ ދުވަހުގެ ހަވީރު މާޒިޔާ ސްޕޯޓްސް އެންޑް ރެކްރިއޭޝަން އަދި ކުލަބު ވެލެންސިއާ ބައްދަލު ކުރާ މެޗާއި، ހޯމަ ދުވަހުގެ ރޭ ކުލަބު އީގަލްސް އާއި ގްރީސް ސްޓްރީޓްސް ބައްދަލު ކުރާ މެޗެވެ. އަންގާރަ ދުވަހުގެ ހަވީރު އޮތީ ޓީސީ ސްޕޯޓްސް ކުލަބު އަދި ސުޕަ ޔުނައިޓެޑު ސްޕޯޓްސް (ސަސް) ވާދަ ކުރާ މެޗެވެ. އަންގާރަ ދުވަހުގެ ރޭ އޮތީ ޔުނައިޓެޑު ވިކްޓަރީ (ޔޫވީ) އަދި ބުރު ސްޕޯޓްސް ކުލަބު ބައްދަލު ކުރާ މެޗެވެ.
މިނިވަން ދުވަހުގެ ހަރަކާތްތަކުގެ ތެރެއިން ބުދަ ދުވަހުގެ ރޭ ހެވިކަމާއި ކުޅިވަރުގެ ރަސްމިއްޔާތު ބާއްވަނީ ގަލޮޅު ދަނޑުގަ އެވެ.
