މިނިވަން ޗެމްޕިއަންޝިޕްގައި ހދ.ހަނިމާދޫ އަދި މާޅެންދޫ ކުޅުނު މެޗުން އެ ދެޓީމު ބޮޑު ތަފާތަކުން މޮޅުވެއްޖެ އެވެ.

ހޮނިހިރު ދުވަހު ހަވީރު ކުޅުނު މެޗުން ހަނިމާދޫ މޮޅުވީ ހދ. ނޭކުރެންދޫއާ ވާދަކޮށް 0-3 ގެ ނަތީޖާއަކުންނެވެ.

ކުޅުދުއްފުށީގައި ކުޅުނު މި މެޗު ފެށިގެން ތިންވަނަ މިނެޓުގައި އެޓީމުން ވަނީ މެޗުގެ ލީޑު ނަގާފައެވެ. މި ލަނޑު އެޓީމަށް ކާމިޔާބުކޮށްދިނީ އަބްދުލްރަހީމް އެވެ.

މި ލަނޑަށްފަހުވެސް ރަނގަޅަށް ކުޅުނީ ހަނިމާދޫ އެވެ. އެގޮތުން 45 ވަނަ މިނެޓުގައި އެޓީމުން ވަނީ މުހައްމަދު އަބްދުއް ގަފޫރުގެ ލަނޑުން މެޗުގެ ލީޑު ފުޅާކޮށްފައެވެ. މެޗުގައި ނޭކުރެންދޫއަށްވެސް ލަނޑު ޖަހަން ފުރުސަތުތަކެއް ލިބިފައިވާއިރު، އެޓީމަށް ހަނިމަދޫގެ ގޯލު ފޫއަޅުވާލަން ވަނީ ނުކުޅެދިފައެވެ.

ހަނިމާދޫ އިން މެޗުގައި ކާމިޔާބުކުރި ތިންވަނަ ލަނޑު އިތުރުވަގުތުގައި އެޓީމަށް ކާމިޔާބުކޮށްދިނީ އަހުމަދު އަޒްމީލް އެވެ.

ހޮނިހިރު ދުވަހު ހަވީރު ކުޅުނު މެޗުން މާޅެންދޫ މޮޅުވީ، ނ.ކުޑަފަރީއާ ވާދަކޮށް 0-4 ގެ ތަފާތުބޮޑު ނަތީޖާއަކުންނެވެ.

މި މެޗު ފެށިގެން މާޅެންދޫ ޓީމުން މޮޅު ކުޅުމެއް ދައްކާފައިވާއިރު، އެޓީމުން ވަނީ 41 ވަނަ މިނެޓުގައި މެޗުގެ ލީޑު ނަގާފައެވެ. މި ލަނޑު އެޓީމަށް ކާމިޔާބުކޮށްދިނީ އިބްރާހިމް ނިޔާޒް އެވެ.

މާޅެންދޫ އިން މެޗުގެ ލީޑު ފުޅާކުރީ ފުރަތަމަ ހާފްގެ އިތުރުވަގުތުގެ ތެރޭގައި ނިޔާޒް ކާމިޔާބުކުރި ލަނޑުންނެވެ. މި ލަނޑުތަކާއެކު ފުރަތަމަ ހާފް ނިމުނީ 0-2 ގެ ނަތީޖާއިން ކުޑަފަރީގެ މައްޗަށް މާޅެންދޫ ކުރިހޯދައިގެންނެވެ.

ދެވަނަ ހާފް ފެށިގެން މާޅެންދޫއިން އެޓީމުގެ ކުޅުން ރަނގަޅުކުރިއިރު، 67 ވަނަ މިނެޓުގައި އެޓީމުން ވަނީ ލީޑު އިތުރަށް ފުޅާކޮށްފައެވެ. މި ލަނޑު އެޓީމަށް ކާމިޔާބުކޮށްދިނީ ހަސަން އަބްދުލް ރަހީމް އެވެ.

މެޗުގައި މާޅެންދޫ އިން ކާމިޔާބުކުރި ހަތަރުވަނަ ލަނޑު އަދި ފަހު ލަނޑު 89 ވަނަ މިނެޓުގައި ކާމިޔާބުކޮށްދިނީ އަޒުފާން މޫސާ އެވެ.