ހަށިވިއްކުމުގެ ވިޔަފާރި ކުރަމުންދިޔަ ނެޓްވޯކެއް، ދިވެހި ފުލުހުންގެ ޚިދުމަތުން އަތުލައިގެންފިއެވެ.

ފުލުހުން ބުނީ، މާލޭގައި ހިންގަމުން ދިޔަ އެލޯރާ ސްޕާ އެންޑް ސެލޫންގައި ހަށިވިއްކަމުންދާކަމަށް ލިބުނު އިންޓެލިޖެންސް މައުލޫމާތަކާ ގުޅިގެން ފުލުހުންގެ ސްޕެޝަލް އޮޕަރޭޝަންސްއާއި، އެންޓި ހިއުމަން ޓްރެފިކިންގ ޑިޕާޓްމަންޓާއި، އިންޓެލިޖެންސް އަދި އިމިގްރޭޝަން ގުޅިގެން ޚާއްސަ އޮޕަރޭޝަނެއް ހިންގާފައިވާކަމަށެވެ.

އޭގެ ތެރެއިން ބައެއް މީހުން ހައްޔަރުކޮށްފައިވަނީ ނިވާކަން ކުޑަކޮށް ތިއްބައި ކަމަށްވެސް ފުލުހުން މައުލޫމާތުދެއެވެ.

މި މައްސަލާގައި ހައްޔަރުކުރި މީހުންގެ ތެރޭގައި 2 ދިވެހިންވެސް ހިމެނެއެވެ.

އެއީ 39 އަހަރުގެ ދިވެހި ފިރިހެނަކާއި 38 އަހަރުގެ ދިވެހި ފިރިހެނެކެވެ.

އޭގެ ތެރެއިން 39 އަހަރުގެ މީހާ 5 ދުވަހަށް ބަންދުކުރުމަށް ކުރިމިނަލް ކޯޓުން ވަނީ އަމުރުކޮށްފައެވެ. އަދި 38 އަހަރުގެ މީހާ 10 ދުވަހަށް ބަންދު ކުރުމަށްވެސް ވަނީ އަމުރުކޮށްފައެވެ.

މި މައްސަލާގައި ދެން ހައްޔަރުކޮށްފައިވަނީ ތައިލެންޑަށް ނިސްބަތްވާ އުމުރުން 34 އަހަރުގެ ދެ އަންހެނަކާއި، ލަންކާއަށް ނިސްބަތްވާ އުމުރުން 43 އަހަރުގެ އަންހެނެކެވެ. އެ ތިން މީހުންވެސް 15 ދުވަހަށް ބަންދުކުރުމަށް ވަނީ އަމުރުކޮށްފައެވެ.

ކޯޓު އަމުރުގައި ބުނެފައިވާގޮތުގައި، އެމީހުންގެ މައްޗަށް ތުހުމަތު ކުރެވޭ މިންވަރަށް ކޮންމެވެސް ވަރެއްގެ ހެކި ހުށަހެޅިފައިވެއެވެ. އެމީހުން ބަންދު ކޮށްފައިވަނީ މުޖުތަމައުގެ ސަލާމަތާއި ރައްކާތެރިކަމަށް ބަލާފައެވެ.

ކުރިމިނަލް ކޯޓުގައި މި އަމުރު ނެރުއްވީ ގާޒީ އަލީ އާދަމްއެވެ.

މި މައްސަލަ ދިވެހި ފުލުހުންގެ ޚިދުމަތުންވެސް ގެންދަނީ އިތުރަށް ތަހުގީގު ކުރަމުންނެވެ.