ހިލޭ ޖެހުމެއްގައި އާޖެންޓީނާގެ ކެޕްޓަން ލިއޮނަލް މެސީ ކާމިޔާބުކުރި ލަނޑާއެކު، ފަހު ވަގުތު އިންޓަ މިއާމީން، ކްރޫޒް އަޒުލް އަތުން މޮޅުވެއްޖެއެވެ.

ލީގު ކަޕްގައި ކުޅުނު މެޗުން އިންޓަ މިއާމީ މޮޅުވީ 2-1ންނެވެ. މެޗުގެ ފުރަތަމަ 11ގައި ކޯޗު ޖެރާޑޯ މާޓިނޯ، މެސީ ނުހިމަނައެވެ. މެޗުގައި އޭނާ ކުޅެން ނިކުމެފައިވަނީ ބަދަލު ކުޅުންތެރިޔެއްގެ ގޮތުގައެވެ. އޭގެ ފަހުން މިއާމީގެ ކެޕްޓަން ބޭންޑު އަޅައިގެން މެޗުގެ ބާކީ ބައި ފުރިހަމަކުރީ ވެސް މެސީއެވެ. މެޗުގައި ފުރަތަމަ ލަނޑު ޖަހައި، ކުރީހޯދީ މިއާމީންނެވެ. މެޗުގެ 44 ވަނަ މިނެޓުގައި އެ ޓީމަށް ލީޑު ނަގައިދިނީ ރޮބާޓް ޓޭލާއެވެ. ނަމަވެސް ދެވަނަ ހާފުގައި ކްރޫޒް އަޒުލްއިން ވަނީ ނަތީޖާ ހަމަހަމަ ކޮށްފައެވެ. މެޗުގެ 66 ވަނަ މިނެޓުގައި އެ ޓީމަށް ނަތީޖާ ހަމަހަމަކޮށްދިނީ އުރިއެލް އަޓުނާއެވެ. މެޗުން އިންޓަ މިއާމީ މޮޅުވީ، ފުރިހަމަ ވަގުތު ހަމަވެ އިތުރަށް ދެއްކި ވަގުތުގައި މެސީ ޖެހި ހިލޭ ޖެހުމަކުންނެވެ. ހިލޭ ޖެހުމުގައި މެސީ ފޮނުވާލި ބޯޅަ އަމާޒުވީ ގޯލުގެ އަރިމަތީ ކަނަށެވެ.

މިއީ ޕެރިސް ސެއިންޓް ޖާމަން (ޕީއެސްޖީ) ދޫކޮށް މިއާމީއަށް ބަދަލުވުމަށްފަހު މެސީ އެ ޓީމަށް ކުޅެދިން ފުރަތަމަ މެޗެވެ. މި މެޗުގައި ސާޖިއޯ ބުސްކެޓްސްއަށް ވެސް ފުރުސަތު ދީފައިވަނީ ބެންޗުން އަރައި ކުޅުމަށެވެ.