ބެންފީކާ މެޗަށްފަހު އަލް ނަސްރުން ޖަޕާނަށް

ކުލަބު ރަހުމަތްތެރިކަމުގެ މެޗުގައި ބެންފީކާ އަތުން ބަލިވި މެޗަށްފަހު، ސައޫދީ ޕްރޯ ލީގުގެ އަލް ނަސްރުން ޖަޕާނު ކޭމްޕަށް ފުރައިފިއެވެ.

ޕޯޗުގަލްގެ ކެޕްޓަން ކްރިސްޓިއާނޯ ރޮނާލްޑޯ ކުޅެމުން އަންނަ އަލް ނަސްރުގެ މައްޗަށް ބެންފީކާއިން ކުރި ހޯދީ 4-1ންނެވެ. މެޗު ފަށައިގެން 23 ވަނަ މިނެޓުގައި ބެންފީކާއަށް ލީޑު ނަގައިދިނީ އާޖެންޓީނާގެ އެންހެން ޑި މާރިއާއެވެ. މިއީ ޔުވެންޓަސް ދޫކޮށްލުމަށްފަހު ބެންފީކާއަށް ބަދަލުވިފަހުން ޑި މާރިއާ އެ ކުލަބަށް ކުޅެދިން ފުރަތަމަ މެޗެވެ. ބެންފީކާގެ ދެވަނަ ލަނޑާއި ތިންވަނަ ލަނޑު ޖެހީ ޕޯޗުގަލްގެ ގޮންޒާލޯ ރާމޯސްއެވެ. ދެވަނަ ލަނޑު އޭނާ 31 ވަނަ މިނެޓުގައި ޖެހިއިރު، ތިން ލވަނަ ލަނޑު ޖެހީ އޭގެ ހަތަރު މިނެޓު ފަހުންނެވެ. އަލް ނަސްރުގެ ހަމައެކަނި ލަނޑު މެޗުގެ 42 ވަނަ މިނެޓުގައި ޖެހީ ސުލްތާން އަލް ޣަންނަމްއެވެ. ބެންފީކާގެ ހަތަރުވަނަ ލަނޑު، ދެވަނަ ހާފުގައި ޖެހީ ނޯވޭގެ ޒުވާން ކުޅުންތެރިޔާ އަންދްރިއާސްއެވެ.

މިއީ އަލް ނަސްރުން ކުޅުނު ރަހުމަތްތެރިކަމުގެ ހަތަރުވަނަ މެޗެވެ. ފުރަތަމަ ދެ މެޗުގައި އެ ޓީމު ވަނީ މޮޅުވެފައެވެ. ތިންވަނަ މެޗުގައި ބަލިވީ ސްޕެއިންގެ ސެލްޓަ ވީގޯ އަތުންނެވެ. ޖަޕާނުގައި ކުރިއަށްގެންދާ ކޭމްޕުގައި މި މަހުގެ 25 ވަނަ ދުވަހު އަލް ނަސްރު ނިކުންނާނީ ފްރާންސްގެ ޕެރިސް ސެއިންޓް ޖާމަން (ޕީއެސްޖީ)އާ ދެކޮޅަށެވެ. މީގެ ކުރިންވެސް މި ދެ ކުލަބު ވަނީ ރަހުމަތްތެރިކަމުގެ މެޗެއް ކުޅެފައެވެ.