ދިވެހި ޕްރިމިއާ ލީގުގައި ޔުނައިޓެޑު ވިކްޓަރީ (ޔޫވީ)އާ ދެކޮޅަށް ކުޅުނު މެޗުން ކުލަބު އީގަލްސް މޮޅުވެއްޖެއެވެ.

ބުދަ ދުވަހުގެ ހަވީރު ގަލޮޮޅު ރަސްމީ ދަނޑުގައި ކުޅުނު މެޗު އީގަލްސްއިން ކާމިޔާބުކުރީ 2-1ންނެވެ. މިއީ ބްރޭކަށްފަހު އީގަލްސްއިން ކުޅުނު ދެވަނަ މެޗެވެ. ފުރަތަމަ މެޗުގައިވެސް އެ ޓީމު ވަނީ މޮޅުވެފައެވެ. މެޗުގެ ފުރަތަމަ ހާފުގައި ފުރަތަމަ ލަނޑު ޖަހައި ލީޑު ނެގީ އީގަލްސްއިންނެވެ. ފުރަތަމަ ހާފުގެ 43 ވަނަ މިނެޓުގައި އެ ޓީމަށް ލީޑު ނަގައިދިނީ އަހުމަދު ރިޒުވާން (ރިޒޭ)އެވެ. ނަމަވެސް އޭގެ ދެ މިނެޓު ފަހުން ޔޫވީން ވަނީ ލަނޑު ޖަހައި ނަތީޖާ ހަމަހަމަކޮށްފައެވެ. ޔޫވީއަށް ނަތީޖާ ހަމަހަމަކޮށްދިނީ ޝަނާން ރަޝާދުއެވެ. ދެވަނަ ހާފުގައި އީގަލްސް މޮޅުކޮށްދިން ލަނޑު 81 ވަނަ މިނެޓުގައި ޖެހީ އިބްރާހީމް މަހުދީ ހުސައިން (ފޭދޫ އިއްބެ)އެވެ. މެޗުގެ މޮޅު ކުޅުންތެރިޔަކަށް ހޮވުނީވެސް އޭނާއެވެ.

ލީގުގައި ބުދަ ދުވަހުގެ ރޭ އޮންނާނީ ކުލަބު ވެލެންސިއާއާއި ސުޕަ ޔުނައިޓެޑު ސްޕޯޓްސް (ސަސް) ބައްދަލުކުރާ މެޗެވެ.