އަލްބާ އިންޓަ މިއާމީ އަށް ސޮއިކޮށްފި

ސްޕެއިންގެ ތަޖުރިބާކާރު ޑިފެންޑަރު ޖޯޑީ އަލްބާ، އެމެރިކާ ލީގުގެ އިންޓަ މިއާމީ އަށް ސޮއިކޮށްފައިވާ ކަމަށް އެކުލަބުގެ ރައީސް ޖޯޖް މާޝް ވިދާޅުވެއްޖެ އެވެ.

މާޝް މިހެން ވިދާޅުވީ ބާސެލޯނާގެ ކުރީގެ ދެ ކުޅުންތެރިން ކަމަށްވާ ލިއޮނަލް މެސީ އާއި ސާޖިއޯ ބުސްކެޓްސް އެ ކުލަބަށް ގެނައުމަށް ފަހު، މީޑިއާއަކަށް ދެއްވި އިންޓަވިޔުއެއްގަ އެވެ. އޭނާ ވިދާޅުވީ އަލްބާ މިހާރު ވަނީ މިއާމީ އާއެކު އެއްބަސްވުމުގައި ސޮއިކޮށްފައި ކަމަށާއި، ކުރިއަށް އޮތް ދުވަސްތަކުގެ ތެރޭގައި އޭނާ ކުލަބާ ގުޅޭނެ ކަމަށެވެ. އަދި މިއާމީގެ އައު ކޯޗު ޖެރާޑޯ މާޓިނޯ އަންނަނީ އޭނާގެ ޕްލޭންގައި އަލްބާ ހިމަނައިގެން މަސައްކަތްތައް ރާވަމުން ކަމަށާއި، އެހެންކަމުން އަލްބާ އަކީ ވެސް މުހިންމު ކުޅުންތެރިޔަކަށް ވާނެ ކަމަށެވެ. އަލްބާ އަށް ފަހު މިއާމީން ބާސެލޯނާގެ ކުރީގެ ތަރި ލުއިސް ސުއަރޭޒް ހޯދުމަށް ކުރަމުން އަންނަ މަސައްކަތަށް ވެސް އޭނާ ވަނީ ކޮމެންޓެއް ކުރައްވާފައި އެވެ. އެގޮތުން މާޝް ވިދާޅުވީ ކޮންމެ ބައެއް ވެސް މަސައްކަތް ކުރާނީ ޓީމު ވަރުގަދަ ކުރުމަށް ކަމަށާއި، ނަމަވެސް ރަސްމީކޮށް ސުއަރޭޒް ކަންތަކުގައި އެއްޗެއް ވިދާޅުވާން ބޭނުންނުވާ ކަމަށެވެ. ސަބަބެއްގެ ގޮތުގައި އޭނާ ވިދާޅުވީ ސުއަރޭޒް އަކީ އެހެން ޓީމެއްގައި ހުރި ކުޅުންތެރިޔަކަށް ވުމުންނެވެ.

އަލްބާ ބާސެލޯނާ ދޫކޮށްލަން ނިންމީ އެކުލަބާއެކު ހަދާފައިވާ އެއްބަސްވުމުގައި ބާކީ އެއް އަހަރު އޮއްވަ އެވެ. ނަމަވެސް އެއްބަސްވުން އުވާލަން އޭނާ ނިންމީ ކުލަބުގެ ވެރިންނާއެކު ކުރިއަށް ގެންދިޔަ މަޝްވަރާތަކަށްފަހު އެވެ. ހަމައެއާއެކު އެއްބަސްވުމުގައި ބަކީ އޮތް އެއް އަހަރަށް ލިބެން ޖެހޭ ބަދަލު ވެސް އަލްބާ ވަނީ ދޫކޮށްލަން ނިންމައިފަ އެވެ. މެސީ، ބުސްކެޓްސް އަދި އަލްބާ ވަނީ މި އަހަރުގެ ކުރީ ކޮޅު ބާސެލޯނާގައި ބައްދަލު ވެސް ކޮށްފަ އެވެ. އެއާއެކު ތިން ކުޅުންތެރިން އެއް ޓީމަކަށް ބަދަލުވާން އުޅޭ ކަމުގެ އަޑުތައް ވަނީ ފެތުރިފަ އެވެ.