ފުޓުބޯޅައިގައި ރަނގަޅު ފިލާވަޅެއް ލިބި ކަންކަން ދަސްކުރެވޭނީ މެޗުން ބަލިވުމުން ކަމަށް މާޒިޔާ ސްޕޯޓްސް އެންޑް ރެކްރިއޭޝަންގެ ކޯޗު މިލޮމީރް ސެސްލިޖާ (މިލޯ) ބުނެފިއެވެ.

މާޒިޔާ ވަނީ އޭޕްރިލް މަހު ޕްރެޒިޑެންޓްސް ކަޕުގައި ބުރު ސްޕޯޓްސް ކުލަބު ކައިރިން 2-1 ން ބަލިވެފައެވެ. ބުރާސްފަތި ދުވަހު ބުރާ ދެކޮޅަށް ނުކުތުމުގެ ކުރިން ބޭއްވި ނޫސްވެރިންގެ ބައްދަލުވުމުގައި މިލޯ ބުނީ ކުރިން ބުރު ކައިރިން ބަލިވިގޮތް ވަރަށް ރަނގަޅަށް އެނގޭ ކަމަށެވެ. އަދި އެއީ ޓީމުގެ ކުޅުންތެރިންނަށް ލިބުނު ބޮޑު ފިލާވަޅަކަށް ވާނެކަމަށެވެ. މިލޯ ބުނީ އެ މެޗުން ބަލިވުމުން، މިހާރު ކުޅުންތެރިން ތިބީ ކުރިޔަށްވުރެވެސް ސީރިއަސްކޮށް ކަމަށެވެ. އެހެންކަމުން، މި މެޗަކީ ކުރީ މެޗަށްވުރެ މާބޮޑަށް ވެސް ރަނގަޅު ވާނެ މެޗަކަށް ވާނެކަމަށް އޭނާ ބުންޏެވެ.

ބުރު ޓީމާ ގުޅޭގޮތުން ސުވާލުކުރުމުން މިލޯ އެ ޓީމު ސިފަކުރީ ނުރައްކާ ޓީމެއްގެ ގޮތުގައެވެ. އޭނާ ބުނީ، ބުރުގެ ޓީމަކީ ހަލުވި ކުޅުންތެރިންތަކެއް އުޅޭ ޓީމެއް ކަމަށެވެ. އަދި ނަތީޖާތަކަށް ބަލާއިރު، އެ ޓީމު ކޮޅަށް ލަނޑު ޖަހަން އުނދަގޫކަން އޭނާ ފާހަގަކުރިއެވެ. ހަމައެއާއެކު، ނިސްބަތުން ބަލާއިރު އެ ޓީމު ލަނޑު ޖަހާ ރޭޓު ދަށްކަމަށް ވެސް މިލޯ ބުންޏެވެ.

މިލޯގެ އިރުޝާދުގެ ދަށުން ކުޅުނު ފުރަތަމަ މެޗުން ބުރު ވަނީ 6-0 ން ޓީސީ ބަލިކޮށްފައެވެ. މި މެޗުގައި ކުޅުންތެރިން ދެއްކި ކުޅުމަށް މިލޯ ވަނީ ތައުރީފްކޮށްފައެވެ. އޭނާ ބުނީ، ހަ ދުވަސް ޕްރެކްޓިސް ކޮށްގެން އެވަރުގެ ނަތީޖާއެއް ނެރެވުނީމަ ހިތްހަމަ ޖެހޭކަމަށެވެ. އޭނާ އިތުރަށް ބުނީ އެ މެޗުގައި ފެނުނީ ވަރަށް އޯގަނައިސްޑް އެޓޭކިން ފުޓުބޯޅައެއް ކަމަށެވެ. މީގެއިތުރުން ފަރިތަކުރުންތަކުގައި ކުޅުންތެރިން ކުރާ މަސައްކަތް ވެސް އޭނާ ފާހަގަކުރިއެވެ. ޕްރެކްޓިސް ގަޑީގެ 30 މިނެޓު ކުރިން ދިއުމާ، އަމިއްލަ އަށް ކަންކަން އަހާ، އޮޅުންފިލުވައިގެން ކަންކަން ރަނގަޅުކުރަން މަސައްކަތް ކުރާކަމަށް މިލޯ ބުންޏެވެ.

ކޮންމެ ޓީމެއް ހަތަރު މެޗު ކުޅެފައިވާއިރު، ބަލިނުވާ ހަމައެކަނި ޓީމަކީ މާޒިޔާއެވެ. މާޒިޔާ އާއި ބުރު ބައްދަލުކުރާ މެޗު ކުޅޭނީ ބުރާސްފަތި ދުވަހު ހަވީރު 16:00 ގައެވެ.