ދިވެހި ޕްރިމިއާ ލީގުގައި ކުލަބް އީގަލްސްއާ ދެެކޮޅަށް ނުކުންނައިރު ޔުނައިޓެޑު ވިކްޓަރީ (ޔޫވީ) އޮތީ އުނދަގޫ ހާލަތެއްގައި ކަމަށް އެ ޓީމުގެ ކޯޗު އަޙުމަދު ޝާކިރު (ޝާކިއްޓޭ) ބުނެފި އެވެ.
އީގަލްސް މެޗުގެ ކުރިން އޮތް ޕްރެސް ކޮންފަރެންސްގައި ވާހަކަ ދައްކަމުން ޝާކިއްޓޭ ބުނީ، ޔޫވީ ޓީމުގައި އޮތީ ވެސް ވަރަށް ލިމިޓެޑު ސްކޮޑެއް ކަމަށެވެ. ސްކޮޑުގައި ގިނައީ ސްކޫލްތަކުގައި ކިޔަވަމުން އަންނަ ކުޅުންތެރިން ކަމަށާއި، ސީނިއާ ކުޅުންތެރިން މަދު ވާނެ ކަމަށް އޭނާ ބުންޏެވެ. އެހެންކަމުން މިއީ ސްކޫލްތައް ބަންދު ދުވަސްކޮޅަށް ވުމާއެކު، ގިނަ ކުޅުންތެރިން ރަށްރަށަށް ގޮސްފައިވާ ކަމަށާއި އެއާއެކު މިހާރު ޓީމު ހަމަކުރުމަށް ވެސް ވަރަށް ގިނަ އުނދަގޫތަކެއް ކުރިމަތިވަމުން އަންނަ ކަމަށް ޝާކިއްޓޭ ފާހަގަކުރި އެވެ. އެންމެ ފަހުން ޔޫވީން ކުޅުނު މެޗުގައި ޓީމުގެ ބެންޗުން ވެސް އެކަން ފެންނާނެ ކަމަށާއި، އެހެންކަމުން އީގަލްސް ކަހަލަ ޓީމަކާ ދެކޮޅަށް ނިކުންނައިރު ސްކޮޑު އޮތީ "ވަރަށް ހާލުގައި" ކަމަށް އޭނާ ބުންޏެވެ.
މީގެ އިތުރުން އޭނާ ވަނީ ޓީމުގެ ފަރިތަކުރުންތަކުގައި ވެސް ކުޅުންތެރިން ބައިވެރިވާ މިންވަރު މަދުވުމުން އެކަމުގެ ކަންބޮޑުވުން ފާޅުކޮށްފަ އެވެ. އެގޮތުން ފަރިތަކުރުންތަކަށް ނުކުންނަނީ 10 ވަރަކަށް ކުޅުންތެރިން ކަމަށާއި، ފަރިތަކުރުމެއް ނެތި މެޗުތައް ކުޅެން ޖެހޭ ކަމަށް ވެސް ވަނީ ބުނެފަ އެވެ. އީގަލްސްއާ ދެކޮޅަށް ނުކުންނައިރު، އެކަމަކީ ޔޫވީ އަށް އޮތް ބޮޑު ޗެލެންޖެއް ކަމަށް ޝާކިއްޓޭ ދެކެ އެވެ. ދިގު ސީޒަނެއް ކުރިއަށްދާއިރު، ރަނގަޅު ނަތީޖާއެއް ބޭނުންވާނަމަ ޔޫވީގައި އޮތް ސްކޮޑު ވަރުގަދަ ކުރަން ޖެހޭ ކަމަށް އޭނާ ވަނީ ބުންޏެވެ. އެހެންކަމުން އެކަމުގެ މަޝްވަރާތައް ޓީމުގެ އިސްވެރިންނާއެކު މިހާރު ވެސް ކުރިއަށްގެންދާ ކަމަށާއި ޚާއްސަކޮށް މިހާރު ބަލަމުން އަންނަނީ ބިދޭސީ ކުޅުންތެރިން ހޯދުމަށްވުރެ، ރާއްޖެ އިން ޒުވާން ކުޅުންތެރިން ހޯދުން ކަމަށް އޭނާ ވަނީ ބުނަފެ އެވެ.
އީގަލްސް އާއި ޔޫވީ ބައްދަލު ކުރާ މެޗު އޮންނާނީ ބުދަ ދުވަހުގެ ހަވީރު އެވެ.
