ދާދި ފަހުން އެމެރިކާ ލީގުގެ އިންޓަ މިއާމީ އަށް ބަދަލުވި އާޖެންޓީނާގެ ކެޕްޓަން ލިއޮނަލް މެސީ އެ ކުލަބުގެ ފަރިތަކުރުންތަކަށް ނިކުމެއްޖެ އެވެ.

އުމުރުން މިހާރު 36 އަހަރުވެފައިވާ މެސީ އިންޓަ މިއާމީ އަށް ބަދަލުވީ ދެ އަހަރުގެ ދުވަހުގެ އެއްބަސްވުމެއްގެ ދަށުންނެވެ. އެ ކުލަބުގެ ކުޅުންތެރިޔެއްގެ ގޮތުގައި މިހާރު ވަނީ މެސީ ރަސްމީކޮށް ދައްކާލައިފަ އެވެ. އެއަށްފަހު އިންޓަ މިއާމީން އަންގާރަ ދުވަހު ކުރިއަށް ގެންދިޔަ ފަރިތަކުރުންތަކުގައި މެސީ ވަނީ ބައިވެރިވެފަ އެވެ. އިންޓަ މިއާމީ ގައި މެސީ ބޭނުން ކުރާނީ 10 ނަންބަރު ޖާޒީ އެވެ. މެސީ އާއެކު އިންޓަ މިއާމީން ކުރިއަށް ގެންދިޔަ ފަރިތަކުރުންތަކަށްފަހު ކުލަބުގެ އައު ކޯޗު  ޖެރާޑޯ މާޓިނޯ ބުނީ، މެސީ އިންޓަ މިއާމީގައި ހުރުމަކީ އޭނާ އަށް ވެސް އަދި ކުލަބަށް ވެސް ލިބޭނެ ވަރަށް ބޮޑު އުފަލެއް ކަމަށެވެ. އަނެއްކޮޅުން މެސީ ކަހަލަ ކުޅުންތެރިޔަކާއެކު ކުރިއަށް އޮތް ސީޒަނާ ކުރިމަތިލާއިރު، އޭނާ އަށާއި ކުލަބަށް ވެސް ބޮޑު ހިތްހަމަ ޖެހުމެއް އޮންނާނެ ކަމަށް މާޓިނޯ ވަނީ ބުނެފަ އެވެ. މެސީގެ އިތުރުން ސާޖިއޯ ބުސްކެޓްސް ވެސް ވަނީ ފަރިތަކުރުންތަކުގައި ބައިވެރިވެފަ އެވެ. މާޓިނޯ ބުނީ މެސީ އާއި ބުސްކެޓްސް އަކީ ވަރަށް ކޮމްބިނޭޝަށް ރަނގަޅު ދެ ކުޅުންތެރިން ކަމަށާއި، ބާސެލޯނާގެ ތަޖުރިބާ އިން އިންޓަ މިއާމީ އަށް ވެސް ފަސޭހަތަކެއް ވެގެންދާނެ ކަމަށް އުންމީދު ކުރާ ކަމަށެވެ.

މެސީ އިންޓަ މިއާމީ އަށް ބަދަލުވީ ކުރީގެ ކުލަބު ޕެރިސް ސެއިންޓް ޖާމަން (ޕީއެސްޖީ)އާއެކު ހަދާފައިވާ އެއްބަަސްވުމުގެ މުއްދަތު ހަމަވުމުންނެވެ.