މިސްރުގައި 8 ބުރީގެ އިމާރާތެއް ވެއްޓި، ބޮޑުމީހަކާއި ކުޑަކުއްޖަކު މަރުވެއްޖެ

މިސްރުގެ ވެރިރަށް ގާހިރާގައި 8 ފަންގިފިލާގެ އިމާރާތެއް ވެއްޓުމުގެ ސަބަބުން ބޮޑުމީހަކާއި ކުޑަކުއްޖަކު މަރުވެ, އިތުރު ނުވަ މީހުންނަށް އަނިޔާވެއްޖެއެވެ. ވެއްޓުނު އިމާރާތް ހުރީ ގާހިރާގެ އުތުރުން 260 ކިލޯމީޓަރު ދުރުގައިވާ ނައިލްޑެލްޓާގެ ރާޝިދު ޑިސްޓްރިކްޓްގައެވެ. މިހާދިސާގައި މަރުވެފައިވަނީ 38 އަހަރުގެ ފިރިހެނަކާއި 10 މަހުގެ ތުއްތުކުއްޖެކެވެ. އަނިޔާވި މީހުންނަށް ކައިރި ހޮސްޕިޓަލެއްގައި ފަރުވާ ދެމުން ދާއިރު، ބައެއްމީހުންގެ އަތްފައި ބިނދި އަދި އެހެނިހެން ބޮޑެތި އަނިޔާތައް ވެފައި ވެއެވެ.

ހާދިސާ ހިނގުމާއެކު އެހީގެ ޓީމްތަކުން އައީ ގާތަކުގެ ދަށުވެފައިވާ މީހުން ތިބިތޯ ބަލައި، ސަލާމަތް ކުރުމުގެ މަސައްކަތް ކުރަމުންނެވެ.

މިސްރުގައި ހުއްދަ ނެތި އިމާރާތް ކުރުން ގިނަވުމާއި އަދި އިމާރާތްތައް މެއިންޓެއިން ކުރުމަށް އެކަށީގެންވާ ގޮތެއްގައި މަސައްކަތް ކުރެވެމުން ނުދާތީ، ގިނަ ދުވަސްވެފައިވާ އިމާރާތްތައް މިގޮތަށް ވެއްޓުމަކީ މިސްރުގައި ފަހަކަށް އައިސް އާންމު ކަމެކެވެ. މީގެ 24 ގަޑިއިރު ކުރިންވެސް މިސްރުގެ އިސްކަންދަރިއްޔާގައި އިމާރާތެއް ވެއްޓުމުގެ ސަބަބުން ދެމީހުން މަރުވެފައި ވެއެވެ. އަދި ޖުލައި 6ވަނަ ދުވަހުވެސް ވެސްޓް އެލެކްޒެންޑްރިއާގެ ގޮމްރޮކް ނެއިބަރހުޑްގައި ދެބުރީގެ އިމާރާތެއް ވެއްޓުމުގެ ސަބަބުން އެކަކު މަރުވެފައި ވެއެވެ. ހަމަ މިދިޔަ މަހު އިސްކަންދަރިއްޔާގައި 13 ބުރީގެ އިމާރާތެއް ވެއްޓުމުގެ ސަބަބުން 10 މީހުން މަރުވެފައި ވެއެވެ.

މިފަދަ ހާދިސާތައް ގިނަވަމުން ދިއުމާއެކު، 100 މިލިއަން މީހުންގެ އާބާދީއެއް އޮންނަ މިސްރުގައި ކޮންސްޓްރަކްޝަން ގަވާއިގުތައް ހަރުދަނާކޮށް އިމާރާތްކުރުމުގެ ކަންތައްތައް ގާތުން މޮނިޓަރ ކުރަން ސަރުކާރުން މިހާރުވަނީ ފަށާފައި ކަމަށް ޚަބަރުތައް ބުނެއެވެ.