ފަލަސްތީން ރައްޔިތުން އެމީހުންގެ ވަޒަނުން ނެރުމަށް ޓްރަމްޕް ގެންގުޅުއްވާ ޕްލޭނަށް މިސުރުން ދެކޮޅު ހަދައިފި

ޣައްޒާ ސްޓްރިޕް ގެ އާބާދީ މިޞްރާއި ޖޯޑަން އަށް ބަދަލުކޮށް ޣައްޒާ "ސާފުކޮށްލުމަށް" ޓްރަމްޕް އާދީއްތަ ދުވަހު ފާޅު ކުރެއްވި ޕްލޭނަށް މިޞްރުން ދެކޮޅު ހަދައިފިއެވެ. 

މިސްރުގެ ޚާރިޖީ ވުޒާރާ އިން ނެރުނު ބަޔާނެއްގައި ބުނެފައިވަނީ ފަލަސްތީނުގެ ރައްޔިތުން އެމީހުންގެ ބިމުގައި ދެމިތިބުމަށް ހުއްޓުމެއްނެތި މިސްރުން ތާއީދުކޮށް އެހީތެރިކަން ދޭނެ ކަމުގައެވެ. 

އެ ބަޔާނުގައި ފަލަސްތީނުގެ ބިން އެމީހުންގެ އަތުން އަތުލައިގަތުން ނުވަތަ ބިމުން ބައެއް ގަދަކަމުން އެހެން ގައުމަކަށް އެއްކުރުން ނުވަތަ ބިމުގެ އާބާދީ ހިތްވަރުދީގެން ވިޔަސް ނުވަތަ އެނޫން ގޮތަކުން ވިޔަސް އެއީ ވަގުތީ ގޮތުން ކަމުގައި ވިޔަސް ނުވަތަ ދާއިމީ ގޮތުން ކަމުގައި ވިޔަސް އެހެން ތަނަކަށް ބަދަލު ކޮށް ފަލަސްޠީނުގެ ރައްޔިތުން އެމީހުންގެ ބިމުން ބާލައި އެމީހުންގެ ހައްގުތަކަށް އަރައިގަތުމަށް މިސްރުން ދެކޮޅު ހަދާ ކަމުގައެވެ. 

15 މަސްދުވަހުގެ ހަނގުރާމައަކަށްފަހު، ޓްރަމްޕް ވިދާޅުވީ ޣައްޒާ ވެފައިވަނީ "ފުނފުނޑުވެވައިވާ ސަރަޙައްދަކަށް" ކަމަށާއި އޭނާ ބޭނުންފުޅު ވަނީ މިސްރުންނާއި އުރުދުން އިން ޣައްޒާގައި ދިރިއުޅޭ ފަލަސްތީނު ރައްޔިތުން ބަލައިގަތުން ކަމުގައެވެ. 

އޭނާ ވިދާޅުވީ "ވަގުތީ ގޮތުން ނުވަތަ ދިގު މުއްދަތަކަށް" ޣައްޒާގެ ރައްޔިތުން ބަދަލު ކުރެވިދާނެ ކަމަށެވެ. 

2023 ވަނަ އަހަރުގެ އޮކްޓޯބަރު މަހު އިސްރާއީލް-ހަމާސް ހަނގުރާމަ ފެށުނީއްސުރެ، ޣައްޒާގެ ފަލަސްޠީނުގެ ރައްޔިތުން އަވައްޓެރި މިޞްރަށް އަދި ހުޅަނގު އައްސޭރީގެ ރައްޔިތުން ޖޯޑަނަށް ބަދަލުކުރުމުގެ ޕްލޭންތަކާމެދު މިސްރުން އިންޒާރުދީފައެވެ. 

އާދީއްތަ ދުވަހު އަރަބި ލީގުން ނެރުނު ބަޔާނެއްގައިވެސް ޓްރަޕްގެ ޕްލޭނަށް ދެކޮޅު ހަދާ ކަމަށް ބުނެފައިވެއެވެ. އެ ބަޔާނުގައި ބުނެފައިވަނީ "ބާރުގެ ބޭނުން ކޮށްގެން މީހުން އެމީހުންގެ ބިމުން ބަދަލުކުރުމާއި އެމީހުންގެ ބިމުން ނެރުމަކީ ނަސްލު ނައްތާލުން ނޫނީ ނުކިޔޭނެ" ކަމަށެވެ. 

"ފަލަސްޠީނުގެ ރައްޔިތުން އެމީހުންގެ ބިމުން ނެރުމަށް ކުރެވޭ މަސައްކަތްތައް، .... ކުރީގައިވެސް ނާކާމިޔާބު ވެފައިވާކަން ސާބިތުވެފައިވޭ" ސަރަޙައްދީ ބްލޮކުގެ އެ ބަޔާނުގައި ބުނެފައިވެއެވެ.

ފަލަސްތީނުގެ ރައްޔިތުން ހުސްކުރުމާ ބެހޭ ގޮތުން އާދިއްތަ ދުވަހު ޓްރަމްޕް ވާހަކަފުޅު ދައްކަވާނެ ކަމަށް ވިދާޅުވި މިޞްރުގެ ރައީސް އަބްދުލް ފައްތާޙް އަލް-ސީސީ ވަނީ ފަލަސްތީނު ރައްޔިތުން އެމީހުންގެ ބިމުން ނެރުމަކީ "ފަލަސްޠީނުގެ މިނިވަން ދައުލަތެއް ޤާއިމުކުރުމުގެ މަޤްޞަދު ނައްތާލުމަށް" ކުރާ މަސައްކަތެއް ކަމަށް ތަކުރާރުކޮށް ވިދާޅުވެ އިންޒާރު ދެއްވާފައެވެ.

އަލް-ސީސީ އެކަން ސިފަ ކުރައްވާފައި ވަނީ މިޞްރުގެ ޤައުމީ ސަލާމަތަށް ނުރައްކާވެދާނެ "ރަތް ރޮނގެއް" ގެ ގޮތުގައެވެ.

އާދީއްތަ ދުވަހު މިޞްރުގެ ޚާރިޖީ ވުޒާރާ އިން ގޮވާލާފައިވަނީ "ދެ ދައުލަތުގެ ޙައްލު" ތަންފީޒުކުރުމަށެވެ.