ސުލްޙަވެރިކަން ޤާއިމު ކުރެވޭނެ ހަމައެކަނި މަގަކީ ދެ ދައުލަތުގެ ޙައްލު: އަލް ސީސީ

އިސްރާއީލް އިން ޣައްޒާގައި ހިންގަމުން އައި ހަނގުރާމަ ހުއްޓާލުމަށް އެއްބަސްވެފައިވާއިރު، ސުލްޙަވެރިކަން ޤާއިމު ކުރެވޭނެ ހަމައެކަނި މަގަކީ ދެ ދައުލަތުގެ ޙައްލު ކަމަށް، މިޞްރުގެ ރައީސް ޢަބްދުލް ފައްތާޙް އަލް ސީސީ ވިދާޅުވެއްޖެ އެވެ.

ޣައްޒާ ހަނގުރާމަ ނިމުމަކަށް ގެނައުމުގައި މެދުވެރިއެއްގެ ދައުރު ވެސް މިޞްރުން އަދާ ކޮށްފައިވާއިރު، އަލް ސީސީ މިހެން ވިދާޅުވީ އެމެރިކާގެ ރައީސް ޑޮނަލްޑް ޓްރަމްޕްއާ ބައްދަލު ކުރައްވައި ވާހަކަ ދައްކަވަމުންނެވެ.

މިޞްރުގައި ކުރިއަށް ދިޔަ ސުލްޙައިގެ ސަމިޓުގެ ތެރެއިން އަލް ސީސީ ވިދާޅުވެފައި ވަނީ، ފަލަސްޠީނާއި އިސްރާއީލްގެ އުންމީދުތައް ޙާސިލުކޮށް، ސުލްޙަވެރިކަމާ އެކު ދިރިއުޅެވޭނެ ހަމަ އެކަނި ގޮތަކީ ދެ ދައުލަތުގެ ޙައްލެއް ހޯދުން ކަމަށެވެ.

ޓްރަމްޕް އާއި އަލް ސީސީ ޗެއާ ކުރެއްވި ހަނގުރާމަ ހުއްޓާލުމާއި، ރަހީނުން މިނިވަން ކުރުމާ އެކު، ސުލްޙަ ޤާއިމު ކުރުމުގެ ސަމިޓަށް ފަހު، ޣައްޒާ އަލުން އާރާސްތު ކުރުން ނުވަތަ އިމާރާތް ކުރުމުގެ ކޮންފަރެންސް އެއް ވެސް މިޞްރުގައި އޮންނާނެ ކަމަށް އަލް ސީސީ ވަނީ ވިދާޅުވެފަ އެވެ.

އަލް ސީސީ ވިދާޅުވީ އެމެރިކާ އާއި، އެހެން ޤައުމު ތަކާ ގުޅިގެން ޣައްޒާ އަލުން އާރާސްތު ކުރުމުގެ މަސައްކަތް ކުރިއަށް އޮތް ދުވަސް ތަކުގައި ހިނގާނެ ކަމަށެވެ. އަދި ހަމަ އެހެންމެ، އަވަސް މުއްދަތެއްގެ ތެރޭގައި ޣައްޒާ އިމާރާތް ކުރުމުގެ ކޮންފަރެންސް ނުވަތަ ބައްދަލުވުން ބޭއްވުމަށް ރޭވިފައިވާ ކަމަށް އަލް ސީސީ ފާހަގަ ކުރެއްވި އެވެ.

މީގެ އިތުރުން ޓްރަމްޕް ވިދާޅުވެފައި ވަނީ ޣައްޒާ ހަނގުރާމަ ނިމުމަކަށް ގެނައުމުގައި އަލް ސީސީ ވަރަށް މުހިންމު ދައުރެއް އަދާ ކޮށްފައިވާ ކަމަށެވެ. އެކަމުގެ އަގު ވަރަށް ބޮޑަށ ވަޒަން ކުރާކަން ފާހަގަ ކުރައްވައި ޓްރަމްޕް ވިދާޅުވީ، އެކަމަށްޓަކައި އަލް ސީސީ އަށް ފަށްފަށުން ޝުކުރު އަދާ ކުރާ ކަމަށެވެ.

ހަމަ އެހެންމެ، އަލް ސީސީ އަށް ވަރަށް ބޮޑަށް ތައުރީފު ކުރައްވައި ޓްރަމްޕް ވިދާޅުވެފައި ވަނީ، މިޞްރުގައި ކުށް މަދު ކުރުމަށާއި، ކުށުގެ އިންސައްތަ ދަށް މިންވަރެއްގައި ބެހެއްޓުމަށް އަލް ސީސީ ވަރަށް ބޮޑަށް މަސައްކަތް ކުރައްވާ ކަަމަށާއި، އޭނާ އަކީ ބާރުގަދަ ލީޑަރެއް ކަމަށެވެ.

އިތުރަށް ވާހަކަ ދައްކަވަމުން މިޞްރުގެ ރައީސް އަލް ސީސީ ވަނީ ޣައްޒާ ހަނގުރާމަ ނިންމުމާއި، މެދު އިރުމަތީގެ ސުލްޙަ އަށް ޓްރަމްޕް ކުރައްވާ މަސައްކަތް ފާހަގަ ކުރައްވައިފަ އެވެ. އެގޮތުން، މެދު އިރުމައްޗަށް ސުލްޙަ ގެނެވޭނެ ހަމައެކަނި ފަރާތަކީ ޓްރަމްޕް ކަމުގައި އަލް ސީސީ ވަނީ ވިދާޅުވެފަ އެވެ. އަދި އެ ހަނގުރާމަ ނިންމޭނެ ހަމައެކަނި ރައީސް އަކީ ޓްރަމްޕްކަން ޔަގީންވާ ކަމަށާއި، ސަރަހައްދުގައި ސުލްޙަ ޤާއިމު ކުރެވޭނީ ޓްރަމްޕް އަށް ކަމަށް އަލް ސީސީ ވަނީ ވިދާޅުވެފަ އެވެ.

މިޞްރުގެ ރިޔާސީ ގަނޑުވަރުން ނެރުނު ބަޔާނުގައި ބުނެފައި ވަނީ، ސަމިޓުގެ ހަވާސާގައި އަލް ސީސީ އެހެން ޤައުމު ތަކުގެ ވެރިންނާ ވެސް ބައްދަލު ކުރެއްވި ކަމަށެވެ. އެގޮތުން ފްރާންސްގެ ރައީސް އިމަނުއެލް މެކްރޮން އަދި ތުރުކީގެ ރައީސް ރަޖަބް ޠައްޔިބް އުރުދުޣާންއާ ވެސް އަލް ސީސީ ވަނީ ބައްދަލު ކުރައްވައިފަ އެވެ.

އެމެރިކާގެ ރައީސް ޓްރަމްޕްގެ ފަރާތުން ހަނގުރާމަ ނިމުމަކަށް ގެނައުމަށް ހުށަހެޅީ 20 ނުކުތާގެ މައްޗަށް އެކުލެވިގެންވާ ޕްލޭން އެކެވެ. އެ ޕްލޭންއާ ގުޅޭ ގޮތުން ހަމާސް އާއި އިސްރާއީލް އިން މަޝްވަރާ ކޮށްފައި ވަނީ މިޞްރު މެދުވެރި ވެގެންނެވެ. މިޞްރުގެ ޝަރަމް އަލް ޝައިޚްގައި ކުރިއަށް ގެންދިޔަ މަޝްވަރާ ތަކުގައި ޤަތަރު އަދި ތުރުކީ އިން ވެސް ވަނީ މެދުވެރިންގެ ދަައުރު އަދާ ކޮށްފަ އެވެ.