ރަހީނުން މިނިވަން ކުރުމުގެ މަޝްވަރާ އަށް ޓްރަމްޕްގެ މަންދޫބުން މިޞްރަށް

އިސްރާއީލް އިން ޣައްޒާގައި ހިންގަމުން ހަނގުރާމައިގައި، ހަމާސް ޖަމާއަަތުން ރަހީނު ކޮށްފައިވާ އިސްރާއީލްގެ ރައްޔިތުން މިނިވަން ކުރުމުގެ މަޝްވަރާ އަށް، އެމެރިކާގެ ރައީސް ޑޮނަލްޑް ޓްރަމްޕްގެ ދެ މަމްދޫބުން މިޞްރަށް ވަޑައިގެންފި އެވެ.

ޓްރަމްޕްގެ ފަރާތުން ހުށަހަޅާފައިވާ ހަނގުރާމަ ހުއްޓާލުމުގެ ޕްލޭން ހަމާސް އިން ޤަބޫލު ކޮށްފައި ވަނިކޮށް، ޓްރަމްޕްގެ މަމްދޫބުން މިޞްރަށް ވަޑައިގެންނެވީ ހަމާސްގެ ބަންދުގައި ތިބި އިސްރާއީލްގެ ރަހީނުން މިނިވަން ކުރުމުގެ މަޝްވަރާތައް ކުރިއަށް ގެންދިޔުމަށެވެ.

އެމެރިކާގެ ރިޔާސީ ގަނޑުވަރު ވައިޓް ހައުސްގެ އިސް އޮފިޝަލަކާ ހަވާލާދީ މީޑިއާ ތަކުގައި ބުނެފައިވާ ގޮތުން، މިޞްރަށް ވަޑައިގެންނެވި ޓްރަމްްޕްގެ ދެ މަމްދޫބުންނަކީ ސްޓީވް ވިކިޓޮފް އަދި ޓްރަމްޕްގެ ދަނބި ދަރިކަލުން ޖެރެޑް ކުންޝާ އެވެ. މި ދަތުރަކީ ޓްރަމްޕްގެ ޕްލޭނާ ގުޅޭ ގޮތުން އިތުރު މަޝްވަރާތައް ކުރިއަށް ގެންދިޔުމަށް ކުރައްވާ ދަތުރެއް ކަމަށް ވެސް ވަނީ ބުނެފަ އެވެ.

މިޞްރުގެ ސަރުކާރާ ގުޅުން ހުރި މީޑިއާ ތަކުގައި ބުނެފައިވާ ގޮތުގައި، އިސްރާއީލް އާއި ހަމާސްއާ ދެމެދު އާދީއްތަ ދުވަހާއި ހޯމަ ދުވަހު ނުސީދާ ގޮތެއްގައި މަޝްވަރާތައް ކުރިއަށް ގެންދާނެ އެވެ. އެ މަޝްވަރާތަކުގައި ވެސް، ބަންދު ކޮށްފައިވާ މީހުން މިނިވަން ކުރުމާ ގުޅޭ ގޮތުން މަޝްވަރާ ކުރެވޭނެ ކަމަށް ބުނެފައިވެ އެވެ.

ހުކުރު ދުވަހު ހަމާސް އިން ނެރެފައިވާ ބަޔާނެއްގައި ބުނެފައި ވަނީ، އެމެރިކާގެ ރައީސް ޓްރަމްޕް ހުށަހަޅުއްވާފައިވާ ޕްލޭން އެ ޖަމާއަތުން ބަަލައި ގަންނަ ކަމަށެވެ. އަދި އެ ޕްލޭންގައި ބުނެފައިވާ ގޮތަށް ރަހީނުންގެ ތެރެއިން ދިރި ތިބި މީހުން އަދި މަރުވެފައިވާ އެންމެން ހަވާލު ކުރުމަށް އެއްބަސްވާ ކަމަށް ވަނީ ބުނެފަ އެވެ.

ޓްރަމްޕްގެ ޕްލޭން އަށް ހަމާސް އާއި އިސްރާއީލް އިން ވެސް އެއްބަސްވެފައިވީ ނަމަވެސް، އަދި ވެސް އިސްރާއީލްގެ ސިފައިން އަންނަނީ ޣައްޒާގައި ހަރަކާތްތެރި ވަމުންނެވެ. އަދި އިސްރާއީލް އިން އަންނަނީ ޣައްޒާގެ އެކި ކަންކޮޅު ތަކަށް ހަމަލާ ދީ، މީހުން ޝަހީދު ކުރަމުންނެވެ.

ޣައްޒާގެ މުސްތަގުބަލާ ގުޅޭ ގޮތުން ގޮތެއް ނިންމުމަށް ފަލަސްތީނުގެ ޖަމާޢަތްތަކުގެ ބައްދަލުވުމެއް މިސްރުގައި ބޭއްވުމަށް ހަމަޖެހިފައިވާ ކަމަށް ހަމާސްގެ އޮފިޝަލެއް ބުނެފައި ވެއެވެ. ޓްރަމްޕްގެ ހުށަހެޅުމުގައި ހިމެނެނީ ހަނގުރާމަ ހުއްޓާލުމަށާއި، 72 ގަޑިއިރުގެ ތެރޭގައި ރަހީނުން ދޫކޮށްލުމަށާއި، ޣައްޒާ އިން އިސްރާއީލުގެ ސިފައިން މަޑުމަޑުން ފައިބައި، ހަމާސްގެ ހަތިޔާރުތައް ނައްތާލުމަށެވެ.