އިންސާނީ ހައްގުތަކާބެހޭ މަޖިލީހުގެ 53 ވަނަ ބައްދަލުވުމުގައި ރާއްޖެއިން މުހިންމު ދައުރެއް އަދާކޮށްފި

ސްވިޓްޒަލެންޑުގެ ޖެނީވާގައި ބޭއްވި އދގެ އިންސާނީ ހައްގުތަކާ ބެހޭ މަޖިލީހުގެ 53 ވަނަ ބައްދަލުވުން ނިމިފައިވާއިރު މި ބައްދަލުވުމުގައި ރާއްޖެއިން މުހިންމު ދައުރެއް އަދާކޮށްފިއެވެ.

މުހިންމު ނިންމުންތަކެއް ނިމިގެންދިޔަ މި ބައްދަލުވުމުގައި އިންސާނީ ޙައްޤުތަކާ ބެހޭ މަޖިލީހުން ވަނީ 31 ރެޒޮލިއުޝަނެއް ފާސްކޮށްފައެވެ.

14 ރެޒޮލިއުޝަނެއް ދިވެހިރާއްޖެއިން ވަނީ ކޯ-ސްޕޮންސަރ ވެސް ކޮށްފައެވެ. މީގެތެރޭގައި އިންސާނީ ޙައްޤުތަކާ ގުޅޭގޮތުން ބައިނަލްއަޤުވާމީ ފެންވަރުގައި ގުޅުން ބަދަހިކުރުމާ ގުޅޭ ރެޒޮލިއުޝަނަކާއި، އިންސާނީ ޙައްޤުތަކުގެ މަންފާ ފުރިހަމައަށް ލިބިގަތުމަށްޓަކައި ތަރައްޤީގެ ދައުރާ ގުޅޭ ރެޒޮލިއުޝަނަކާއި، ކޮރަޕްޝަނުގެ ސަބަބުން އިންސާނީ ޙައްޤުތަކަށް ކުރާ ނޭދެވޭ އަސަރާ ގުޅޭ ރެޒޮލިއުޝަނަކާއި، ނުކުޅެދުންތެރިކަން ހުންނަ ފަރާތްތަކުގެ ޙައްޤުތަކާ ބެހޭ ސްޕެޝަލް ރެޕަޓުއާގެ މެންޑޭޓުގެ މުއްދަތު އިތުރުކުރުމާ ގުޅޭ ރެޒޮލިއުޝަނެއް ހިމެނެއެވެ.

މީގެ އިތުރުން ގާޒީންނާއި ވަކީލުންގެ މިނިވަންކަމާ ބެހޭ ސްޕެޝަލް ރެޕަޓުއާގެ މެންޑޭޓާ ގުޅޭ ރެޒޮލިއުޝަން އެކުލަވާލުމުގެ މަސައްކަތްކުރި ތަފާތު ސަރަހައްދުތަކުގެ ޤައުމުތަކަށް އެކުލެވޭ މައި ގްރޫޕުގައި ވެސް ދިވެހިރާއްޖެއިން ވަނީ ބައިވެރިވެފައެވެ.

ކީރިތި ޤުރުއާނުގެ ޙުރުމަތް ކެނޑުމަށްޓަކައި ދާދި ފަހުން ހިންގުނު ޙަރަކާތްތައް އިންސާނީ ޙައްޤުތަކާ ބެހޭ މަޖިލީހުގެ ސަމާލުކަމަށް ގެނައުމަށްޓަކައި އޮގަނައިޒޭޝަން ފޯ އިސްލާމިކް ކޯޕަރޭޝަން (އޯއައިސީ)ގެ އެދުމުގެ މަތިން 11 ޖުލައި 2023 ވަނަ ދުވަހު ކުއްލި ބަހުސެއް ވަނީ ބާއްވާފައެވެ.

ނިމިގެންދިޔަ ބައްދަލުވުމުގައި ދިވެހިރާއްޖެއިން ވަނީ އިންސާނީ ޙައްޤުތަކާ ބެހޭ މަޖިލީހުގައި އިއްވުނު 34 ޖޮއިންޓް ސްޓޭޓްމަންޓެއް ކޯ-ސްޕޮންސަރ ކޮށްފައެވެ. މީގެ ތެރޭގައި އޮގަނައިޒޭޝަން ފޯ އިސްލާމިކް ކޯޕަރޭޝަން (އޯ.އައި.ސީ)ގެ ބަޔާންތަކާއި އެހެނިހެން ބަޔާންތައް ވެސް ހިމެނެއެވެ. ހަމައެއާއެކު، ދިވެހިރާއްޖެއިން ވަނީ ތަރައްޤީވަމުން އަންނަ ކުދި ޖަޒީރާ ޤައުމުތައް (ސިޑްސް)ގެ ފަރާތުން ބަޔާނެއް އިއްވާފައެވެ. މިބަޔާން އިއްވާފައިވަނީ މޫސުމަށް އަންނަ ބަދަލުތަކުގެ ނޭދެވޭ އަސަރުތަކުގެ ސަބަބުން ކާބޯތަކެތީގެ ޙައްޤު ފުރިހަމައަށް ކަށަވަރުކުރުމަށް ކުރިމަތިވާ ގޮންޖެހުންތަކާ ގުޅޭގޮތުން ކޮންމެ އަހަރަކު ބާއްވާ ޕެނަލް ޑިސްކަޝަންގައެވެ.

އ.ދ.ގެ އިންސާނީ ޙައްޤުތަކާ ބެހޭ މަޖިލީހުގެ 53ވަނަ ބައްދަލުވުމުގައި ބައިވެރިވި ދިވެހިރާއްޖޭގެ ވަފުދުގައި އިސްކޮށް ހުންނެވީ އެމްބެސެޑަރ އެކްސްޓްރާ އޯޑިނަރީ އެންޑް ޕްލެނިޕޮޓެންޝަރީ އަދި ޖެނީވާގައި ހުންނަ އެކުވެރި ދައުލަތްތަކުގެ ޖަމިއްޔާގެ އޮފީސްތަކަށް ކަނޑައަޅުއްވާފައި ހުންނަވާ ދާއިމީ މަންދޫބު ޑރ. އާސިމް އަޙްމަދެވެ. އިންސާނީ ޙައްޤުތަކާ ބެހޭ މަޖިލީހުގައި އޭޝިއާ ޕެސިފިކް ގްރޫޕް ތަމްސީލުކުރާ ނައިބު ރައީސްގެ ހައިސިއްޔަތުން ޑރ. އާސިމް ވަނީ އެމަޖިލީހުގެ އެކި ބައްދަލުވުންތަކުގެ ރިޔާސަތު ބަލަހައްޓަވާފައެވެ.