މ.އަތޮޅުގެ ރައްޔިތުންގެ ހިތްތައް ރައީސް ހުޅުވާދެއްވައިފި، އިރާދަކުރެއްވިއްޔާ މި އަތޮޅުން 60% ވޯޓު ހޯދާނަން - އިމްރާން
މ.އަތޮޅަށް ބަލާލުމުން ރައީސް އަށް އޮތް ތާއީދު ފެންނަ ކަމަށް އިމްރާން ވިދާޅުވި
އުފާވެރި އަމާން ރާއްޖެ ޖަލްސާގައި އިމްރާން ދެއްކެވި ވާހަކަފުޅުގެ ތެރެއިން
ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހު ވަނީ މ.އަތޮޅުގެ ރައްޔިތުންގެ ހިތްތައް ހުޅުވާދެއްވާފައި ކަމަށާއި، އިރާދަކުރެއްވިއްޔާ ކުރިއަށް އޮތް ރިޔާސީ އިންތިޚާބުގައި އެ ދާއިރާއިން 60% ވޯޓު ހޯއްދަވާނެ ކަމަށް އެމަނިކުފާނުގެ ކޯލިޝަން ޕާޓްނަރ އަދާލަތު ޕާޓީގެ ރައީސް އަދި ހޯމް މިނިސްޓަރ އިމްރާން އަބްދުﷲ ވިދާޅުވެއްޖެއެވެ.
މިއަދު މ.އަތޮޅުގެ ދަރިއެއްގެ ހައިސިއްޔަތުން އެ އަތޮޅަށް ޒިޔާރަތްކުރާ އިރު ވަރަށް އުފާވާ ކަމަށް ވިދާޅުވިއެވެ. މީގެ ކުރިން މ.ކޮޅުފުށިން 2008 ވަނަ އަހަރު ކުރީގެ ރައީސް ނަޝީދު އަށް ލިބިވަޑައިގަތީ 19 ވޯޓު ކަމަށާއި، 2018އިގައި ކޯލިޝަން އެންމެން އެކުވެގެން ލިބުނީ 117 ވޯޓުކަމަށް އޭނާ ވިދާޅުވިއެވެ. ނަމަވެސް މިއަދު އެ މަންޒަރު ބަދަލުވެފައިވާ ކަމަށް އިމްރާން ވިދާޅުވިއެވެ. އެ އަތޮޅަށް ބަލާލުމުން އެހެން ރަށްތަކުން ވެސް އެ ބަދަލު ފެންނަ ކަމަށް އޭނާ ވިދާޅުވިއެވެ. މުލަކުގެ ރައްޔިތުންގެ އަޢުލަބިއްޔަތު ރައީސް ހޯއްދަވާފައިވާ ކަމަށާ ރައީސް އާއި ވާދަކުރެވޭ ފަދަ ބޭފުޅެއް ނެތް ކަމަށް އޭނާ ވިދާޅުވިއެވެ. އަދި ވައުދު ފުއްދޭ ފެންވަރުގެ އެހެން ބޭފުޅެއް ނެތްކަމަށް ވެސް އޭނާ ވިދާޅުވިއެވެ.
ކެމްޕެއިން ޓީމުން ކޮންމެ ދުވަހަކު ވިސްނާނީ ރައީސުލްޖުމްހޫރިއްޔާ ދެވަނަ ދައުރަކަށް ހޮވަންވީ ސަބަބަކާއި މެދު ކަމަށް އޭނާ ވިދާޅުވިއެވެ. އަދި ރައީސް ހޮވަންވީ ސަބަބު އެހެން މީހުންނަށް ބުނެދޭނެ ގޮތް އެ ޓީމުން ވިސްނާނެ ކަމަށް އޭނާ ވިދާޅުވިއެވެ. އިމްރާން ވަނީ ދެވަނަ ދައުރަކަށް ރައީސް ހޮވަންވީ ސަބަބުތަކަށް އަލިއަޅުވާލައްވާފައެވެ. އެމަނިކުފާނަކީ އޯގާތެރި، ވިސްނުންތެރި އަދި ކެތްތެރި ބޭފުޅެއް ކަމަށް އިމްރާން ވިދާޅުވިއެވެ. އެގޮތުން މުލަކަށް ރައީސް ވަޑައިގެންނެވި އިރު އާންމު ބައެއް ބޭފުޅުންގެ އުދާސްތަކާއި ޝަކުވާތައް ލިޔެފައިވާ މެސެޖުތަކާއި އެކު ނުކުމެ އެ ޝުއޫރުތައް ހާމަކުރަން ތިބި ކަމަށް އޭނާ ވިދާޅުވިއެވެ. އެހެންނަމަވެސް އެކަން ވެސް ބަަލައިގަތީ މަރުޚަބާއެއްގެ ގޮތުގައި ކަަމަށް އިމްރާން ވިދާޅުވިއެވެ. އިމްރާން ވިދާޅުވީ ކެތްތެރިކަމާއި އެކު އެ ބޭފުޅުންގެ އަޑު އައްސަވާ އެކަން ހައްލުކުރަން ވާހަކަދެއްކުމަށް ރައީސް އިރުޝާދު ދެއްވާފައިވާ ކަމަށެވެ. ރައީސުލްޖުމްހޫރިއްޔާ ދެވަނަ ދައުރަކަށް ހޮވަންވީ އެ ސަބަބާއި ހުރެ ކަމަށް އޭނާ ވިދާޅުވިއެވެ.
