ކޮންމެ 18 މަހަކުން މިދަނީ ބަނދަރެއް ނިންމަމުން، މުރައިދޫ ބަނދަރު ވެސް ސެޕްޓެންބަރުގައި ނިމޭނެ: އެމްޓީސީސީ
15 ޖުލައި 2023 | ހޮނިހިރު 03:37މުޅި ބަނދަރުގެ ބްރޭކްވޯޓަރ އެއްކޮށް ހަދާނެ
މުރައިދޫ ބަނދަރުގެ މަސައްކަތްތައް ކުރިއަށްދަނީ
ކޮންމެ 18 މަހަކުން ބަނދަރެއް ނިންމަމުންދާ ކަމަށާއި، ހއ.މުރައިދޫ ބަނދަރުގެ މަސައްކަތް ވެސް ކުރިއަށް އޮތް ދެމަސް ތެރޭގައި ނިންމާނެ ކަމަށް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ (އެމްޓީސީސީ)ން ބުނެފިއެވެ.
މުރައިދޫ ބަނދަރުގެ މަސައްކަތްތައް ކުރިއަށްދާ ގޮތް ބައްލަވާލެއްވުމަށްފަހު މީޑިއާތަކަށް މައުލޫމާތު ދެއްވަމުން އެމްޓީސީސީގެ ސީއީއޯ އާދަމް އާޒިމް ވިދާޅުވީ މުރައިދޫ ބަނދަރު ބޮޑު ކުރުމުގެ މަޝްރޫއުގެ މަސައްކަތްތައް ބާރު ސްޕީޑްގައި ކުރިއަށްދާ ކަމަށެވެ. މި މަޝްރޫއަކީ ގާތްގަނޑަކަށް 37 މިލިއަން ފުރިޔާގެ މަޝްރޫއެއް ކަމަށް އާޒިމް ވިދާޅުވިއެވެ.
ކުރަމުންދާ މަސައްކަތްތަކަށް އިޝާރާތް ކުރައްވައި އާޒިމް ވިދާޅުވީ މުޅި ބަނދަރުގެ ބްރޭކްވޯޓަރ އެއްކޮށް ހަދާނެ ކަމަށެވެ.
މުރައިދޫ ބަނދަރު ހެދުމުގެ މަޝްރޫއުގެ ތެރޭގައި 29،841 ކިއުބިކް މީޓަރުގެ ސަރަހައްދެއް ފުން ކުުރުމާއި، 3،546 ކިއުބިކް މީޓަރުގެ ފުޅާމިނުގައި ބަނދަރަށް ވަންނަ ނެރު ފުން ކުރުމާއި، 212 މީޓަރުގެ އެއްގަމު ތޮށި ޖެހުން ހިމެނެއެވެ. މީގެ އިތުރުން ބަނދަރުގެ 50 މީޓަރުގައި ގްރޮއިން ޖަހާއި 107 މީޓަރު އެގްޒިސްޓިންގ ބްރޭކްވޯޓާ ރިފްރޮފައިލް ކުރުމުގެ އިތުރުން އެއްގަމު ތޮށިން ބޭރު ތޮށްޓަށް އަރަން ބްރިޖެއް ހެދުމާއި، ރޭމްޕް ހެދުމާއި، ޕޭވްމަންޓް ހެދުމާއި، މަގުބައްތި ހަރުކުރުމާއި އަދި ނެވިގޭޝަން ލައިޓް ހަރުކުރުމަށްވަނީ ހަމަޖެހިފައެވެ.
މިމަޝްރޫއު އަވަހަށް ނިންމުމަށް މަސައްކަތް ކުރާކަން ފާހަގަކުރައްވައި އާޒިމް ވިދާޅުވީ ސެޕްޓެންބަރު މަހުގެތެރޭގައި މި މަސައްކަތް ނިންމާ ރައްޔިތުންނާއި ހަވާލުކުރާނެ ކަމަށެވެ. އަދި މިހާރު އެމްޓީސީސީއަކީ ކޮންމެ 18 މަހަކުން ބަނދަރެއް ނިންމާ ރައްޔިތުންނާއި ހަވާލުކުރުމުގެ ގާބިލްކަން ލިބިފައިވާ ކުންފުންޏެއް ކަމަށާއި، އެގޮތަށް މަސައްކަތް ކުރިއަށްދާ ކަމަށެވެ.
މީގެ އިތުރުން އާޒިމް ވިދާޅުވީ މޫސުންތަން ނުދިނުމާއި، ބައެއް އާލަތްތައް ލިބުމުގައި ދަތިތައް ކުރިމަތިވާ ކަމަށެވެ. ނަމަވެސް އެ މަޝްރޫއެއް ނިންމުމަށް އަމާޒުހިފައިވާ ތާރީހުތަކަށް ނިންމަމުންދާ ކަމަށް އޭނާ ވިދާޅުވިއެވެ.
އާޒިމް ވިދާޅުވީ ތަރައްގީގެ މަޝްރޫއުތައް ކުރިއަށް ގެންދިއުމުގައި އާއްމު ރައްޔިތުންނާއި ކައުންސިލްގެ ފަރާތުން ވަރަށް ބޮޑު އެއްބާރުލުމެއް ލިބޭ ކަމަށެވެ. އަދި މުރައިދޫއަކީ އެގޮތަށް ފާހަގަކޮށްލެވޭ އެއްރަށް ކަމަށް އާޒިމް ވިދާޅުވިއެވެ.
