އަންނަ އޮގަސްޓް މަސް ނިމެންވާއިރަށް މަތިކޮމަންޑޫ ހިއްކުމުގެ މަސައްކަތް ނިމޭނެ ކަމަށް އެމްޓީސީސީގެ ސީއީއޯ އާދަމް އާޒިމް ވިދާޅުވެއްޖެއެވެ.
އާޒިމް މިފަދައިން ވިދާޅުވީ ކޮމަންޑޫ އަދި މަތިކޮމަންޑޫގައި އެކުންފުނިން ކުރިއަށްގެންދާ މަސައްކަތްތައް ބައްލަވާލައްވައި ނޫސްވެރިންނަށް މައުލޫމާތުދެއްވަމުންނެވެ.
އާޒިމް ވިދާޅުވީ މަތިކޮމަންޑޫ ހިއްކުމުގެ ހުރިހާ މަސައްކަތްތަކެއް ކުރައްވަމުންގެންދަވާ ކަމަށެވެ. އަދި މަތިކޮމަންޑޫ ހިއްކުމުގެ މަސައްކަތް ފެށި، އޮގަސްޓުމަހުގެ ތެރޭގައި ކޮމަންޑޫއާއި މަތިކޮމަންޑޫ ގުޅާލުމުގެ މަސައްކަތްވެސް ފެށިގެންދާނެ ކަމަށް އާޒިމް ވިދާޅުވިއެވެ.
އާޒިމް ވަނީ އީއައިއޭގެ މަސައްކަތް ތަކަށް ގިނަ ވަގުތުތަކެއް ހޭދަވިކަން ފާހަގަކުރައްވާފައެވެ.
މީގެ އިތުރުން އާޒިމް ވަނީ އެމްޓީސީސީން ކޮމަންޑޫގައި ކުރިއަށްގެންދާ ގޮނޑުދޮށް ހިމާޔަތްކުރުމުގެ މަޝްރޫއުގެ އެންމެ ފަހުގެ ތަފްސީލުތައްވެސް ހިއްސާކުރައްވާފައެވެ. މިގޮތުން މުޅި ކޮމަންޑޫގެ ގޮނޑުދޮށް ހިމާޔަތްކުރުމުގެ މަސައްކަތް މިއަހަރުގެ ނިޔަލަށް ނިންމާލުމަށް މަސައްކަތް ކުރައްވަމުން ގެންދަވާކަމަށް އާޒިމް ވިދާޅުވިއެވެ.
މީގެ އިތުރުން އެކުންފުނީގެ ސީއެސްއާރުގެ ދަށުން އެރަށުގައި ފުޓުބޯޅަ ދަނޑެއް ހެދުމުގެ މަސައްކަތްވެސް ކުރިއަށްދާ ކަމަށާއި، އެތަނުގެ މަސައްކަތްވެސް ޖުލައި 31ށް ނިންމާލުމަށް އަމާޒު ހިފާފައިވާކަމަށް އާޒިމް ވިދާޅުވިއެވެ.
