މިދިޔަ އަހަރު ނިއުރޭޑިއަންޓްގެ ފޯވާޑް ލައިންގައި މޮޅަށް ކުޅުނު ގާނާގެ ކޯފީ އޮވޫސޫ މިއަހަރުވެސް ގެންނަން ނިންމައިފިއެވެ.

ނިއުރޭޑިއަންޓުން ބުނީ މިދިޔަ އަހަރު ދެވަނަ ޑިވިޝަންގައި މޮޅަށް ކުޅެ, ގޯލްތަކެއް ޖެހި ފޯވާޑާއެކު ބިދޭސީ ހަ ކުޅުންތެރިން ގެންނާނެކަމަށެވެ. މީގެކުރިން ކްލަބުން ވަނީ ޕާކިސްތާނުގެ ގައުމީ ޓީމުގެ ދެވަނަ ކީޕަރު އަބްދުލްބާސިތު ގެންނަން ނިންމިކަން އިއުލާންކޮށްފައެވެ. މީގެއިތުރުން ނިއުރޭޑިއަންޓުން ގެންނަނީ ގާނާގެ އިތުރު ތިން ކުޅުންތެރިންނާއި, އުޒްބެކިސްތާން ޑިފެންޑަރެކެވެ. އުޒުބެކިސްތާން ޑިފެންޑަރު މިހާރު ކުޅެމުންދަނީ ބަނގްލަދޭޝް ޕްރިމިއަރ ލީގުގައެވެ, ކޯފީގެ އިތުރުން ގާނާއިން ގެންނަނީ ޑިފެންސިވް މިޑްފީލްޑަރަކާއި, ދެ އެޓޭކިންގ މިޑްފީލްޑަރުންނެވެ. މީގެތެރެއިން އެޓޭކިންގ މިޑްފީލްޑަރ ޖެކްސަން އޮވޫސޫއަކީ 2013 ވަނަ އަހަރު، ކުރިން ގާނާގެ ގައުމީ ޓީމުގެ ފުރަތަމަ އެގާރާގައި ކުޅުނު ކުޅުންތެރިއެއްކަމަށް ނިއުރޭޑިއަންޓުން މައުލޫމާތުދިނެވެ. އޭނާ ވަނީ ގާނާގެ ކްލަބްތަކަށް ކުޅެފައެވެ. 34 އަހަރުގެ ކުޅުންތެރިޔާ އެންމެ ފަހުން ކުޅުނީ ކެންޔާ ލީގުގައެވެ. އުޒްބެކިސްތާނުން ގެންނަނީ ޑިފެންޑަރެކެވެ.

ނިއުރޭޑިއަންޓުން ވަނީ ޓީމް ވަރުގަދަ ކުރުމަށްޓަކައި، ކުރިން ފުރަތަމަ ޑިވިޝަނުގައި މޮޅަށް ކުޅުނު ކުޅުންތެރިންތަކެއްގެ ސޮއިވެސް ހޯދާފައެވެ. އޭގެ ތެރޭގައި މިޑްފީލްޑަރު މިދުހަތު ފަހުމީ (ބިޗަޑް)އާއި ޔަސްފާދު ހަބީބު (މުލަކޭ)އާއި ފޯވާޑް އިޝާން މުހައްމަދު (ސައްޓު)އާއި ފުޓްސަލް ތަރި އަހުމަދު އަޔާޒު (އަޔާ) ހިމެނެއެވެ. ނިއުރޭޑިއަންޓްގެ ކޯޗަކީ އީގަލްސްގެ ކުރީގެ އެސިސްޓެންޓް ކޯޗު އަހުމަދު ނިމާދު (ނިމާ)އެވެ.