ރައީސް ސާލިހަކީ ބްރޭންޑެއް: ޖާބިރު
ހިސާބުތަކުން ދައްކަނީ ރާއްޖޭގެ ރައްޔިތުން އެއްބުރުން ރައީސް ސާލިހު ވެރިކަމަށް ގެންނަން ބޭނުންވާކަން
ރައީސް ސާލިހުގެ ކެމްޕެއިން ދަތުރުފުޅުގައި ޖާބިރު، ކ. ގުޅީ ކަންމަތީ ޖަލްސާގައި ވާހަކަފުޅުދައްކަވަނީ
ރައީސުލްޖުމްހޫރިއްޔާ އިބްރާހީމް މުހައްމަދު ސާލިހަކީ ބްރޭންޑެއް ކަމަށް، ރައްޔިތުންގެ މަޖިލީހުގެ ކާށިދޫ ދާއިރާގެ މެމްބަރު އަބްދުﷲ ޖާބިރު ވިދާޅުވެއްޖެއެވެ.
ކ. ގުޅީ ކަންމަތީ ބައްދަލުވުމުގައި ވާހަކަފުޅުދައްކަވަމުން ޖާބިރު ވިދާޅުވީ ބްރޭންޑް ކުރުމަކީ މުހިންމުކަމެއް ކަމަށެވެ.
ރާއްޖޭގެ ހުރިހާ ރައްޔިތުން ހިސާބު ޖަހައިފި ކަމަށާއި، ހިސާބުތަކުން ދައްކަނީ ރާއްޖޭގެ ރައްޔިތުން އެއްބުރުން ރައީސް ސާލިހު ވެރިކަމަށް ގެންނަން ބޭނުންވާކަން ކަމަށް ޖާބިރު ވިދާޅުވިއެވެ.
ވަކިވެގަތުމަކީ ރަނގަޅުކަމެއް ކަމަށް ރާއްޖޭގެ އެއްވެސް ރައްޔިތަކު ގަބޫލުނުކުރާ ކަމަށާއި، ރިޔާސީ އިންތިޚާބު ކާމިޔާބުކުރަން ޖެހޭނީ އެކުގައި ތިބެގެންކަމަށް ޖާބިރު ވިދާޅުވިއެވެ. އަދި އިންތިޚާބު ކާމިޔާބު ކުރުމުގެ ހަކަތަ ހުންނާނެ ކަމަށްވެސް ވިދާޅުވިއެވެ.
ވެރިޔަކު ދެވަނަ ދައުރަކަށް ހޮވުމަކީ ޑިމޮކްރަސީ ރާއްޖެ އައީއްސުރެ ދެކެވަޑައިގަންނަވާ ހުވަފެންފުޅެއް ކަމަށާއި، ރައީސް ސާލިހު ދެވަނަ ދައުރަކަށް ހޮވިވަޑައިގަންނަވާނެ ކަމަށްވެސް ޖާބިރު ވަނީ މީގެކުރިން ވިދާޅުވެފައެވެ.
ރައީސުލްޖުމްހޫރިއްޔާއަކު ދެ ދައުރު ފުރިހަމަކުރެއްވުމަކީ އެމަނިކުފާނުގެ ހުވަފެންފުޅެއް ކަމަށްވެސް ވިދާޅުވިއެވެ. އަދި މި ދައުރަކީ އެންމެ ފުރިހަމަ، ފައްކާ ދައުރު ކަމަށްވެސް އޭނާ ވިދާޅުވިއެވެ. ރައީސް ސާލިހާއެކު މަސައްކަތްކުރައްވަމުން ގެންދެވީ އަމިއްލަފުޅަށް އެދިވަޑައިގެން ކަމަށާއި، އެކަން ކުރެއްވީ، އެންމެ ރަނގަޅަށް ވެރިކަން ކުރައްވަނީ ރައީސް ސާލިހަށް ވާތީ ކަމަށް އޭނާ ވިދާޅުވިއެވެ.
