ރިޔާސީ އިންތިޚާބުގައި އޮފިޝަލުން ލިބުމުގައި ދަތިކަން، އިލެކްޝަނުން އެދެނީ އެއްބާރުލުން
އޮފިޝަލުން ހޯދުމަށް އިލެކްޝަންސް ކޮމިޝަނުން ވަނީ މިދިޔަ ޖޫން މަހުގެ ފަހުކޮޅު ވެސް އިޢުލާންކޮށްފައި
އިލެކްޝަންސް ކޮމިޝަން
ރިޔާސީ އިންތިޚާބުގައި ހަރަކާތްތެރިވާ އޮފިޝަލުން ލިބުމުގައި ދަތިކަން ހުރިކަން އިލެކްޝަންސް ކޮމިޝަނުން ހާމަކޮށްފިއެވެ.
ރިޔާސީ އިންތިޚާބުގެ ތައްޔާރީތަކާއި ގުޅޭގޮތުން ބޭއްވި ނޫސްވެރިންގެ ބައްދަލުވުމުގައި ކޮމިޝަންގެ ނާއިބު ރައީސް އިސްމާއީލް ހަބީބް ވިދާޅުވީ އޮފިޝަލުން ހޯދުމުގެ މަސައްކަތަށް މި ފަހުން މާބޮޑު ތަރުޚީބެއް ލިބެމުން ގޮސްފައި ނުވާ ކަމަށެވެ. 5500 އޮފިޝަލުން ބޭނުންވާ އިރު 3200 އެއްހާ ހުށަހެޅުން މިހާތަނަށް އެ ކޮމިޝަނަށް ލިބިފައިވާ ކަމަށް ހަބީބް ވިދާޅުވިއެވެ.
ހަބީބު ވިދާޅުވީ އަދި އޮފިޝަލުން ލިބުމުގައި ދަތިތަކާއި ކުރިމަތިލާން ޖެހުނު ނަމަވެސް އެކަން ހައްލުވެ އިންތިޚާބާއި ގުޅޭ ތަމްރީނުތައް ފެށުމުގެ ކުރިން އޮފިޝަލުން ލިބޭނެ ކަމަށް އުންމީދުކުރައްވާ ކަމަށެވެ. އިންތިޚާބުގެ އޮފިޝަލުން ހޯދުމަށް އެ ކޮމިޝަނުން ވަނީ އެއްބާރުލުމަށް އެދިފައެވެ.
މީގެ އިތުރުން މޮނިޓަރުންނަށް އިންފޮމޭޝަން ސެޝަން އެއް ކުރިއަށް ގެންދިއުމުގެ ބަދަލުގައި އޮންލައިންކޮށް އެކަމަށް އެދި ހުށަހެޅޭނެ އިންތިޒާމްތައް ހަމަޖައްސާނެ ކަަމަށް ހަބީބު ވިދާޅުވިއެވެ. އަދި ނޫސްވެރިން ވެސް އިތުރު ތަމްރީނަކާއި ނުލާ އިންތިޚާބުގައި ޢަމަލުކުރަން ޖެހޭ ގޮތް އެނގޭ ކަމަށް އިގުރާރުވާން ޖެހޭ ކަމަށް އޭނާ ވިދާޅުވިއެވެ. އެއަށް ފަހު ނޫސްވެރިންގެ ހުށަހެޅުންތައް އެކްރެޑިޓް ކޮށްދިނުމަށް ނުވަތަ އެ ނޫސްވެރިން ހުށަހަޅާ ހުށަހެޅުންތަކުގެ ސައްހަކަން ކަށަވަރުކޮށް އަސްލާ އެއްގޮތްކަން ޔަގީންކުރުމަށް ހަމަޖެހިފައިވާ ކަމަށް ހަބީބު ވިދާޅުވިއެވެ.
ސެޕްޓެމްބަރު މަހުގެ 9 ވަނަ ދުވަހު އޮންނަ ރިޔާސީ އިންތިޚާބުގައި ވޯޓުލާ މަރުކަޒުތަކުގައި ހަރަކާތްތެރިވާނެ އޮފިޝަލުން ހޯދުމަށް އިލެކްޝަންސް ކޮމިޝަނުން ވަނީ މިދިޔަ ޖޫން މަހުގެ ފަހުކޮޅު ވެސް އިޢުލާންކޮށްފައެވެ.
