މިސަރުކާރުގައި ރައްޔިތުންގެ މަޖިލީހުގެ ރައީސް ބޭނުންފުޅުވެވަޑައިގަންނަވާ ގޮތަށް މަޖިލީސް ވެސް ހިންގަވަމުން ގެންދަވާ: ރައީސް ސާލިހު
10 ޖުލައި 2023 | ހޯމަ 04:24ކުރިއާ ހިލާފަށް މިއަދު ސިފައިން ވަދެ މަޖިލިސް ނުހުއްޓުވާ
އާދިއްތަ ދުވަހުގެ ރޭ ކުރިއަށް ގެންދިޔަ "އުފާވެރި އަމާން ރާއްޖެ" ކެމްޕެއިން ޖަލްސާގައި ރައީސް ސާލިޙު ވާހަކަފުޅު ދައްކަވަނީ
މި ސަރުކާރުގައި ސިޔާސީ ލީޑަރުން މިނިވަންކަމާއެކު ހަރަކާތްތެރިވެ، ރައްޔިތުން މަޖިލިސް ވެސް އެމަޖިލީހުގެ ރައީސް ބޭނުންފުޅުވެވަޑައިގަންނަވާ ގޮތަކަށް ހިންގަމުން ގެންދަވާ ކަމަށް ރައީސުލްޖުމްހޫރިއްޔާ އިބްރާހީމް މުހައްމަދު ސާލިހު ވިދާޅުވެއްޖެއެވެ.
އާދިއްތަ ދުވަހުގެ ރޭ ކުރިއަށް ގެންދިޔަ "އުފާވެރި އަމާން ރާއްޖެ" ކެމްޕެއިން ޖަލްސާގައި ރައީސް ސާލިހު ވިދާޅުވީ މިއަހަރު ބާއްވާ ރިޔާސީ އިންތިޚާބުގައި ރައްޔިތުން ގޮތް ނިންމާއިރު 2008 ވަނަ އަހަރުން ފެށިގެން 2018 ވަނަ އަހަރާއި ހަމައަށް ރާއްޖޭގައި ކަންކަން ހިނގާފައިވާ ގޮތާއި މެދު ރަނގަޅަށް ވިސްނަން ޖެހޭ ކަމަށެވެ.
ރައީސް ސާލިހު ވިދާޅުވީ 2008 ގައި އެމްޑީޕީ ސަރުކާރެއް އިންތިޚާބު ކުރީ ކޯލިޝަނަކާއެކު ކަމަށެވެ. ނަމަވެސް ކޯލިޝަން ދެމިގެންދިޔައީ އެންމެ 21 ދުވަހަށްކަން އެމަނިކުފާނު ފާހަގަކުރެއްވިއެވެ. ރައީސް ސާލިހު ވިދާޅުވީ އޭރުގެ ސަރުކާރުގެ އުމުރު ހަމަނުވަނީސް ވެރިކަން ބަދަލުވި ގޮތާއި، ރާއްޖެއަށް ސިޔާސީ ގޮތުން އައި ހަލޮބޮލިކަމާއި ހަމަނުޖެހުމާމެދު ރައްޔިތުން ވިސްނަން ޖެހޭ ކަމަށެވެ.
2013ން 2018ށް ރައްޔިތުން އިންތިޚާބުކުރި ސަރުކާރަށް އިޝާރާތް ކުރައްވައި ރައީސް ސާލިހު ވިދާޅުވީ އެއީ ވެސް ކޯލިޝަން ސަރުކާރެއް ކަމަށެވެ. ނަމަވެސް ކުޑަ ދުވަސްކޮޅެއްގެ ތެރޭގައި ކޯލިޝަން ރޫޅި، ރާއްޖެއަށް ކުރިމަތިލާން ޖެހުނީ ބިރުވެރިކަމާ ކަމަށް އެމަނިކުފާނު ވިދާޅުވިއެވެ. ރައީސް ސާލިހު ވިދާޅުވީ ސިޔާސީ ބޭފުޅުންނާއި، ނޫސްވެރިންނާއި، ފަނޑިޔާރުންނާއި، ފަނޑިޔާރުގެއަށް އަދި ރައްޔިތުން މަޖިލިސް މެންބަރުން އެދުވަހު އުޅެންޖެހުނު ގޮތާމެދު ވިސްނާ ފިކުރު ކުރަންޖެހޭ ކަމަށެވެ.
މީގެ އިތުރުން ރައީސް ސާލިހު ވިދާޅުވީ މިސަރުކާރުގައި ސިޔާސީ ލީޑަރުން މިނިވަންކަމާއެކު ހަރަކާތްތެރިވާ ކަމަށާއި، ރައްޔިތުން މަޖިލީހުގެ ރައީސް ބޭނުންފުޅުވެވަޑައިގަންނަވާ ގޮތަށް މިއަދު މަޖިލީސް ވެސް ހިންގަވަމުން ގެންދަވާ ކަމަށެވެ. އަދި ކުރިއާ ޚިލާފަށް މިއަދު ސިފައިން ވަދެ މަޖިލިސް ނުހުއްޓުވާ ކަމަށް އެމަނިކުފާނު ވިދާޅުވިއެވެ.
ރައީސް ސާލިހު ވިދާޅުވީ މި ފަސް އަހަރުގެ ސަރުކާރު ވެސް ރައްޔިތުން އިންތިޚާބު ކުރީ ކޯލިޝަނުން ކަމަށާއި، އެހެން ދައުރުތަކާއި ޚިލާފަށް ރައްޔިތުން ނިންމި ގޮތަށް މިއަދު ވެސް މި ކޯލިޝަން ދެމި އެބައޮތް ކަމަށެވެ. އަދި ވިދާޅުވީ މިއަދު ލިބޭ ހަމަޖެހުމާއި އަމާންކަމުގެ އެންމެ ބޮޑު ސިއްރަކީ ކޯލިޝަން މިގޮތަށް ދެމެހެއްޓުން ކަމަށެވެ.
