"ވަންގަވް" ޕޯޓަލްގެ ޚިދުމަތް މިއަދު ފަށަނީ
"ވަންގަވް" ޚިދުމަތުގެ ފުރަތަމަ މަރުހަލާ ފަށަނީ 6 އިދާރާއަކާއި އެކުގައި
ވެލާނާގެ
ސަރުކާރުގެ މުއައްސަސާތަކުގެ ޚިދުމަތްތައް އެއް ވިއުގައަކުން ފޯރުކޮށްދިނުމުގެ ގޮތުން އެކުލަވާލާފައިވާ "ވަންގަވް" ޕޯޓަލްގެ ޚިދުމަތް މިއަދު ފެށުމަށް ތައްޔާރުވެއްޖެއެވެ.
މިނިސްޓްރީ އޮފް އިކޮނޮމިކް ޑިވެލޮޕްމަންޓްގެ ދަށުން ޓްރޭޑް ނެޓް ކޯޕަރޭޝަން މެދުވެރިކޮށް ކުރިއަށްގެންދާ "ވަންގަވް" ޚިދުމަތަކީ އެއް ވިއުގައެއްގެ ދަށުން ސަރުކާރުގެ ހުރިހާ ޚިދުމަތެއް އޮންލައިންކޮށް ލިބޭ ގޮތަށް ތައްޔާރުކޮށްފައިވާ ޕްލެޓްފޯމެކެވެ. މި ޚިދުމަތާއެކު ސަރުކާރުގެ މިނިސްޓްރީތަކުން ދޭ ޚިދުމަތުގެ ފެންވަރު ރަނގަޅުވުމުގެ އިތުރުން، ދެފުށް ފެންނަ ނިޒާމެއްގެ ތެރެއިން ޚިދުމަތް ލިބުމަށާއި ޚިދުމަތް ލިބޭ ސްޕީޑް އަވަސްވުމަށް މަގުފަހިވެގެންދާނެ ކަމަށް ސަރުކާރުން ބުނެއެވެ.
"ވަންގަވް" ޚިދުމަތުގެ ފުރަތަމަ މަރުހަލާ ފަށަނީ 6 އިދާރާއަކާއި އެކުގައެވެ. އޭގެ ތެރޭގައި ޕްލޭނިން މިނިސްޓްރީ އާއި ހެލްތު ޕްރޮޓެކްޝަން އެޖެންސީ ހިމެނެއެވެ.
މި އަހަރަށް ރައްޔިތުންގެ މަޖިލިސް ހުޅުވުމުގެ ގޮތުން ބޭއްވި މަޖިލީހުގެ ފުރަތަމަ ދައުރުގެ ފުރަތަމަ ޖަލްސާގައި ރިޔާސީ ބަޔާން އިއްވަަވަމުން ރައީސް ސާލިޙު ވަނީ "ވަންގަވް" ގެ ޚިދުމަތަކީ ސަރުކާރުން ޚިދުމަތް ހޯދުމުގައި ކިއުގައި ޖެހިގެން ރައްޔިތުން އުފުލަންޖެހޭ ތަކުލީފު ނިމުމަކަށް ގެންނާނެ ކަމެއް ކަމަށް ވިދާޅުވެފައެވެ. އަދި ޚިދުމަތްތައް ބޭނުންވެގެން ތަކުރާރުކޮށް އައިޑީކާޑު ހުށަހެޅުމާއި އެކި ލިޔުންތަކުގެ ކޮޕީ ސަރުކާރަށް ހުށަހަޅަންޖެހުމަށް މިކަމުގެ ސަބަބުން ހައްލު ލިބޭނެ ކަމަށް ވެސް ރައީސް ސާލިޙު ވިދާޅުވިއެވެ.
