ފުޓުބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް)ގެ ރައީސްކަމުގައި ބައްސާމް އަދީލް ޖަލީލް ހުންނަން ރައްޔިތުން ބޭނުންނުވާ ކަމަށް، ތަޖުރިބާކާރު ކޯޗު ސޮބާހު މުޙައްމަދު (ސޮބާ) ބުނެފި އެވެ.

ސޮބާ މިހެން ބުނީ "ސޭވް އެފްއޭއެމް"ގެ ނަމުގައި ފެށި ޙަރަކާތުގެ ފުރަތަމަ ބައްދަލުވުމުގައި ވާހަކަ ދައްކަމުންނެވެ. ޤައުމީ ޓީމަށް ވެސް ކުޅެފައިވާ މިހާރު ކޯޗިންގައި މަސައްކަތް ކުރަމުން އަންނަ ކޯޗު ބުނީ، ތަކުރާރުކޮށް ބައްސާމް ވަނީ ފެއިލްވެފައި ކަމަށެވެ. ސޮބާ ބުނީ ބައްސާމް އާއި އޭނާގެ ދަށުން މަސައްކަތް ކުރަން ތިބި މީހުންނަށް ވެސް ފުޓުބޯޅައިގެ ކަންކަން ނުކުރެވުނު ކަމަށެވެ. ސޮބާ ބުނީ ފުޓުބޯޅައިގެ ކަންކަން ގޯސްވަމުންދާކަން އިނގޭތާ ވެސް ވަރަށް ދުވަސްވެފައިވާ ކަމަށާއި، އަބަދު ދުރުދުރުން ތިބެގެން ނުވާނެ ކަމަށެވެ. ޚާއްސަކޮށް ބައިވަރު ކަންކަން ގޯސްވަމުން ދާ ކަމަށާއި، އެފްއޭއެމް ކުރީގައި ހިންގިއިރު ވެސް އެ މައްސަލަތައް އޮތް ކަމަށެވެ.

ނަމަވެސް ފުޓުބޯޅައިގެ ކަންކަން ގޯސްވެފައިވާ ބޮޑު މަންޒަރު ފެނުނީ މި މަހު އިންޑިއާގެ ބެންގަލޫރުގައި ނިމުނު ސާފް ޗެމްޕިއަންޝިޕް ފުޓުބޯޅަ މުބާރާތާ ހަމައިން ކަމަށް ސޮބާ ވަނީ ބުނެފަ އެވެ. ކުޅުންތެރިޔެއްގެ ގޮތުގައި ގިނަ ކާމިޔާބީތަކެއް ހޯދާފައިވާ ސޮބާ ބުނީ، ކެރިއަރު ހުއްޓާލުމަށްފަހު ކޯޗިންގެ ތެރެއަށް އައި ފަހުން، ކޮންމެ ދުވަހަކު ކަހަލަ ގޮތަކަށް އެ މަންޒަރުތައް ފެންނަމުންދާ ކަމަށެވެ.

މީގެ އިތުރުން ސޮބާ ބުނީ، ފުޓުބޯޅައިގެ ކަންކަން ގޯސްވެގެން ކިތަންމެ ވަރަަކަށް އެވާހަކަ ދެއްކި ނަމަވެސް، ބައްސާމް އޭނާގެ އަތް ދަށަށް ކުލަބުތައް ލައިގެން އުޅޭ ނަމަ، ކުރެވޭނެ ކަމެއް ނޯންނާނެ ކަމަށެވެ. އެހެންކަމުން އެކަންކަން ރަނގަޅު ކުރެވޭނީ ރާއްޖޭގެ ކުލަބުތައް ހަރުދަނާވެގެންކަން ފާހަގަކޮށް ސޮބާ ބުނީ، ސަރުކާރުން އިސްނަގައިގެން ނަމަވެސް ކުލަބުތަކާއެކު މަޝްވަރާ ކުރަން ޖެހޭ ކަމަށެވެ.

ފުޓުބޯޅައިގެ ކަންކަން ރަނގަޅު ކުރުމަށް "ސޭވް އެފްއޭއެމް"ގެ ނަމުގައި ފެށި ހަރަކާތުގައި އިސްކޮށް ހުންނެވީ ޤައުމީ ޓީމުގެ ކުރީގެ މެނޭޖަރު އިބްރާޙީމް އާމިރު (ސަލްސާ އާމިރު) އެވެ. މީގެ އިތުރުން އެފްއޭއެމްގެ ކުރީގެ ޖެނަރަލް ސެކްރެޓަރީ ހާމިދު ޢަބްދުލް ޣަފޫރު، އެފްއޭއެމްގެ ކުރީގެ ހިންގާ ސެކްރެޓަރީ ޙުސެއިން ރަޝީދު އަދި ފުޓުބޯޅައިގެ އެކި ފެންވަރުގައި މަސައްކަތް ކޮށްފައިވާ ތަޖުރިބާކާރުން މި ހަރަކާތުގައި ހިމެނެ އެވެ.