ރައީސް ޞާލިހާ ރިޔާސީ ކެނޑިޑޭޓަކާ ދެމެދު 45 މިނެޓުގެ ދިގު، "އުނދަގޫ" ކޯލެއް
ރައީސް ވިދާޅުވީ، މުޅިން ތަފާތު ފިކުރުގެ ވާހަކަވެސް ދެކެވުނުކަމަށް
އެމްޑީޕީން ބޭއްވި މޯޓިވޭޝަނަލް ސެޝަންގެ ތެރެއިން
މިއަދު ހެނދުނު ހޭފުޅުލެއްވުމަށްފަހު، އިންތިޚާބުގައި ވާދަކުރައްވާ ކެނޑިޑޭޓަކާ ފޯނުން 45 މިނެޓުވަންދެން ވާހަކަ ދެއްކެވިކަމަށް ރައީސުލްޖުމްހޫރިއްޔާ އިބްރާހީމް މުހައްމަދު ސާލިހު ވިދާޅުވެއްޖެއެވެ.
އެމްޑީޕީން ބޭއްވި ކެމްޕޭން މޯޓިވޭޝަނަލް ސެޝަންގައި ވާހަކަފުޅުދައްކަވަމުން ރައީސް ވިދާޅުވީ، ހެނދުނު ހޭފުޅުލެއްވުމަށްފަހު، އިންތިޚާބުގައި ވާދަކުރައްވާ ކެނޑިޑޭޓަކާ ފޯނުން 45 މިނެޓުވަންދެން ވާހަކަފުޅުދެއްކެވިކަމަށެވެ.
އެ ފޯނުކޯލުގައި ވަރަށް ރަނގަޅު ވާހަކަވެސް ދެކެވުނުކަން ފާހަގަކުރައްވައި ރައީސް ވިދާޅުވީ، މުޅިން ތަފާތު ފިކުރުގެ ވާހަކަވެސް ދެކެވުނު ކަމަށެވެ. ތަފާތު ވިސްނުންތަކުގެ ވާހަކަވެސް ދެކެވުނުކަމަށް ރައީސް ވިދާޅުވިއެވެ.
ރައީސް ވަނީ އެ ފޯނު ކޯލަށްފަހު ސެޝަނަށް ވަޑައިގެންނެވިއިރު، އެމަނިކުފާނުގެ "މައިންޑްސެޓް" ހުންނާނެ ގޮތް ވިސްނަވާލެއްވުމަށް މަޖާޒީ ރާގެއްގައި ވިދާޅުވެފައެވެ. ނަމަވެސް އެއީ ކޮން ފަރާތަކާއެކު ވެވުނު ކޯލެއްކަން ރައީސް ހާމަ ކުރައްވާފައެއް ނުވެއެވެ.
ރައީސް ވިދާޅުވީ، މޯޓިވޭޝަނަލް ސެޝަންގައި ދެކެވުނު ވާހަކަތަކަށްފަހު، އެ 45 މިނެޓު މަތިން ހަނދުފުޅުމަވެސް ނެތްކަމަށެވެ.
ނަން ހާމަނުކުރެއްވި ނަމަވެސް، ކުރިއަށް އޮތް ރިޔާސީ އިންތިޚާބުގައި ވާދަކުރައްވާނެކަން މިހާތަނަށް ރަސްމީކޮށް އިއުލާނު ކުރައްވާފައިވާ ފަރާތްތަކުގެ ތެރެއިން މި ދަނޑިވަޅުގައި ރައީސް ސާލިހާ އެންމެ ޚިޔާލުފުޅު ތަފާތުވެ ބަސް ވިދާޅުވަމުން ގެންދަވާ އެއް ބޭފުޅަކީ ކޯލިޝަން ޕާޓްނަރ، ޖުމްހޫރީ ޕާޓީގެ ލީޑަރު ގާސިމް އިބްރާހީމެވެ.
ރައީސް ވަނީ އިންތިޚާބުގައި އެކުގައި މަސައްކަތް ކުރެއްވުމަށްވެސް މީގެ ކުރިން ގާސިމަށް ގޮވާލައްވާފައެވެ. ނަމަވެސް ދާދި ފަހުން ގާސިމް ވަނީ ވާވެއްދި ފަޅު ވިއްކުން ހުއްޓުވަން އެންޓި ކޮރަޕްޝަން ކޮމިޝަނުން އެންގި އެންގުމަކާ ގުޅިގެން ސަރުކާރަށް އެކަމުގެ ނުރުހުން ފާޅުކުރައްވާފައެވެ.
