ދައުލަތުން ފޯރުކޮށްދޭންޖެހޭ އެތައް ކަމެއް ލަސްވެގެންދިޔައީ މަޖިލިސް ނުހިނގާތީ: ޝަރީފް
މިކަންކަން ހައްލުވާނީ މަޖިލީހުގެ އިމްތިޔާޒަށް އަރައިގަތުމުން ދޭން އޮންނަ ފަސް އަހަރުގެ އަދަބު، ކޯޓުތައް މެދުވެރިކޮށް ދީގެންކަމަށް ވިދާޅުވި
މަރަދޫ ދާއިރާގެ މެންބަރު އިބްރާހީމް ޝަރީފް
ދައުލަތުން ދިވެހި ރައްޔިތުންނަށް ފޯރުކޮށްދޭންޖެހޭ އެތައް ކަމެއް ލަސްވެގެންދިޔައީ ރައްޔިތުންގެ މަޖިލިސް ނުހިނގާތީ ކަމަށް، އައްޑޫ މަރަދޫ ދާއިރާގެ މެމްބަރު އިބްރާހީމް ޝަރީފު ވިދާޅުވެއްޖެއެވެ.
"ރާއްޖެ ޓީވީ"ގެ ސިޔާސީ ވެށި ޕްރޮގްރާމުގައި މަޖިލީހުގެ ހާލަތާ ގުޅޭގޮތުން ވާހަކަފުޅުދައްކަވަމުން ޝަރީފު ވިދާޅުވީ، ޖަލްސާތައް ބޭއްވިނަމަވެސް މަޖިލީހުގައި ހުރި މުހިންމު މަސައްކަތްތައް އެއްފަރާތް ކުރުމަށްފަހު، ތަޅުމަށް ހުށަހަޅާ ގަރާރަކަށް ނުވަތަ މައްސަލައަކަށް އިސްކަންދޭކަން އެ ޖަލްސާތައް ބަލާ ކޮންމެ މީހަކަށްވެސް އެނގޭނެ ކަމަށެވެ. މީގެ ސަބަބުން އެއްވެސް ނަތީޖާއެއް ނުކުންނަ ކަމަށާއި، މިއީ ރައްޔިތުންގެ ކުރިމަތީގައި ސަރުކާރުގެ އަގު ވައްޓާލުމުގެ މަގުސަދުގައި ކުރާ ކަމެއް ކަން އޭނާ ފާހަގަކުރެއްވިއެވެ.
ޝަރީފު ވިދާޅުވީ ފާއިތުވި ހަތަރު އަހަރު ދުވަހުގެ ތެރޭގައި މި ކަންކަން ފާހަގަކުރެވިފައިވާ ކަމަށެވެ. ނަމަވެސް ރައްޔިތުންގެ މަޖިލީހުގެ ރައީސް، މުހައްމަދު ނަޝީދު އެމްޑީޕީގެ އިސްވެރިއެއްގެ މަގާމުގައި ހުންނެވުމުން، ޕާޓީއަށް ނިސްބަތްވާ ގިނަ މެމްބަރުންނަށް ފިޔަވަޅު އަޅުއްވަން ކެރިވަޑައިނުގަތީ ކަމަށްވެސް ވިދާޅުވިއެވެ. އެގޮތުން، މެމްބަރުން އެއް އިންޗި ދޫކުރައްވައިފިނަމަ އެއް ފޫޓަށް ދަންމަވައި ވާންކުރައްވަމުން ނަޝީދު ގެންދެވިކަމަށް އޭނާ ވިދާޅުވިއެވެ.
މަޖިލީހުގައި ސަރުކާރާމެދު ރައްޔިތުންގެ އިތުބާރު ގެއްލުވާލުމަށް ކުރި މަސައްކަތުގެ ސަބަބުން ވަރަށް ބޮޑު ގެއްލުމެއް ލިބިފައިވާކަން ޝަރީފު ފާހަގަކުރެއްވިއެވެ. އެގޮތުން، ގައުމު ބަނގުރޫޓުވެއްޖެ ކަމަށް އިއުލާން ކުރަންޖެހޭ ކަމަށް މަޖިލީހުގެ ރައީސް ނަޝީދު ވަކާލާތު ކުރެއްވި ކަމަށާއި، އޭގެ ސަބަބުން ސަރުކާރަށް އެކި ގޮތްގޮތުން މާލީ އެހީތެރިކަން ފޯރުކޮށްދޭން ތިބި ބޭރުގެ ފަރާތްތައް ވެސް ކަންބޮޑުވާނެކަން އޭނާ ފާހަގަކުރެއްވިއެވެ.
ކޮވިޑުގެ ތެރޭގައި ސަރުކާރުން ރައްޔިތުންނަށް ފޯރުކޮށްދޭންޖެހޭ ޚިދުމަތްތައް ފޯރުކޮށްދިނުމަށް ގާނޫނަށް ގެންނަންޖެހޭ ބަދަލުތައް ގެނައުމަށާއި ބޭނުންވާ ހުއްދަތައް ލަސްކުރުމަށް ނަޝީދު މަސައްކަތް ކުރެއްވިކަމަށް ވެސް ޝަރީފު ވިދާޅުވިއެވެ.
ޝަރީފު ވިދާޅުވީ މިކަން ހައްލު ކުރެވޭނީ އެހެން ފަރާތްތައްވެސް މަޖިލީހުގެ އިމްތިޔާޒަށް އަރައިގަތުމުން ދޭން އޮންނަ ފަސް އަހަރުގެ އަދަބު ކޯޓުތައް މެދުވެރިކޮށް ދީގެން ކަމަށެވެ. އެ ފިޔަވަޅު އަޅަން ނުކެރޭނަމަ މަޖިލީހުގެ ތެރެއިން ދިމާވާ ދަތިތައް ހައްލު ނުކުރެވޭނެ ކަމަށްވެސް އޭނާ ވިދާޅުވިއެވެ.
