ސައުތު އޭޝިއަން ބޮޑީބިލްޑިންގ ޗެމްޕިއަންޝިޕުގައި ރާއްޖެއަށް ހަތަރު ރަން މެޑަލް

ހުކުރު ދުވަހު ރާއްޖޭގައި ކުރިޔަށްދިޔަ 13 ވަނަ ސައުތު އޭޝިއަން ބޮޑީބިލްޑިންގ ޗެމްޕިއަންޝިޕުގައި ރާއްޖެއިން ހަތަރު ރަން މެޑަލް ހިމެނޭހެން ނުވަ މެޑަލް ހޯދައިފިއެވެ.

މިއަހަރުގެ މުބާރާތުގައި ރާއްޖެއިން 18 ބޮޑީބިލްޑަރުން ވާދަކޮށްފައިވާއިރު، ރަން މެޑަލް ހޯދާފައިވަނީ އަޒްނީން ރަޝީދު، މުހައްމަދު ޔާމީން (ޔާންބެ)، މުހައްމަދު މޫސާ (މޯޑު) އަދި އަބްދުﷲ އަހުސަނެވެ.

އަޒްނީން ވަނީ ދެވަނަ ފަހަރަށް ސްޕޯޓްސް ފިޒީކް އަޕް 170 ސެންޓިމީޓަރުގެ ކެޓަގަރީން ރަން މެޑަލް ހޯދާފައެވެ. މީގެކުރިން އޭނާ މި ބައިން ރަން މެޑަލް ހޯދާފައިވަނީ 2019 ވަނަ އަހަރު ނޭޕާލުގައި ކުރިޔަށް ދިޔަ މުބާރާތުގައެވެ. ދާދި ފަހުން ރާއްޖޭގައި ކުރިޔަށްދިޔަ މިސްޓަރ މޯލްޑިވްސް މުބާރާތުގައިވެސް ސްޕޯޓްސް ފިޒީކް ބައިން ރަން މެޑަލް ހޯދީ އަޒްނީނެވެ. އެއީ މިސްޓަރ މޯލްޑިވްސް މުބާރާތުގައި އެ ބައިން އަޒްނީން ރަން މެޑަލް ހޯދި ހަތަރުވަނަ ފަހަރެވެ. އަދި އޭނާ ވަނީ މިދިޔަ އަހަރު ބޭއްވި އޭޝިއަން ބޮޑީބިލްޑިންގ އެންޑް ފިޒިކް ޗެމްޕިއަންޝިޕާއި ވޯލްޑް ބޮޑީބިލްޑިންގ ޗެމްޕިއަންޝިޕުގައި މި ކެޓަގަރީން ރަން މެޑަލް ހޯދާފައެވެ. މީގެ އިތުރުން މި އަހަރު ބޭއްވި މޯލްޑިވްސް ސްޕޯޓްސް އެވޯޑުގައި "އެތުލީޓް އޮފް ދަ އިއަރ" ގެ އެވޯޑް ލިބުނީވެސް އަޒްނީނަށެވެ.

ވިދިވިދިގެން ތިން ފަހަރު މިސްޓަ މޯލްޑިވްސްގެ ޓައިޓްލް ހޯދާފައިވާ ޔާންބެ ވަނީ މިއަހަރުގެ މުބާރާތުގައި 85 ކިލޯގެ ކެޓެގަރީން ރަން މެޑަލް ހޯދާފައެވެ. އޭނާ ވަނީ ވޯލްޑް ބޮޑީބިލްޑިންގ ޗެމްޕިއަންޝިޕުގައިވެސް 90 ކިލޯގެ ކެޓަގަރީން ލޯ މެޑަލް ހޯދާފައެވެ.

55 ކިލޯގެ ކެޓަގަރީން ރަން މެޑަލް ހޯދާފައިވަނީ މުހައްމަދު މޫސާ (މޯޑު)އެވެ. އޭނާވަނީ ވޯލްޑް ބޮޑީބިލްޑިންގ ޗެމްޕިއަންޝިޕުގައި ދެފަހަރު ރިހި މެޑަލް ހޯދާފައެވެ. އަދި ރާއްޖޭގައި މިދިޔަ އަހަރު ކުރިއަށްދިޔަ އޭޝިއާ ބޮޑީ ބިލްޑިންގ އަދި ފިޒިކް ސްޕޯޓްސް ޗެމްޕިއަންޝިޕްގައިވެސް މޯޑު ވަނީ މި ބައިން ރަން މެޑަލް ހޯދާފައެވެ.

ރާއްޖޭގެ އަހުސަން ރަން މެޑަލް ހޯދީ އެތުލެޓިކް ފިޒީކް 175 ސެންޓިމީޓަރުގެ ކެޓަގަރީންނެވެ. މިދިޔަ ހޯމަ ދުވަހު ކުރިޔަށްދިޔަ މިސްޓަރ މޯލްޑިވްސް މުބާރާތުގައިވެސް މި ކެޓަގަރީން ރަން މެޑަލް ހޯދީ އަހުސަނެވެ. އަދި އޭނާ ވަނީ އެ މުބާރާތުގެ "އެތުލެޓިކް ފިޒީކް" އޯވަރޯލް ޗެމްޕިއަންކަންވެސް ހޯދާފައެވެ. މީގެއިތުރުން މިދިޔަ އަހަރުގެ ވޯލްޑް ބޮޑީބިލްޑިންގ ޗެމްޕިއަންޝިޕުގައި އޭނާ ވަނީ އެތުލެޓިކް ޕިޒީކް 167 ސެންޓްމީޓަރުގެ ކެޓަގަރީން ލޯ މެޑަލް ހޯދާފައެވެ.

ހަތަރު ރަން މެޑަލްގެ އިތުރުން މިއަހަރުގެ މުބާރާތުގައި ރާއްޖެއިން ވަނީ ތިން ރިހި މެޑަލާއި ދެ ލޯ މެޑަލްވެސް ހޯދާފައެވެ. ރިހި މެޑަލް ހޯދާފައިވަނީ ޖޫނިއަރ 75 ކިލޯގެ ކެޓަގަރީން ޝާލު އިބްރާހިމާއި، އެތުލެޓިކް ޕިޒީކް 167 ސެންޓްމީޓަރުގެ ކެޓަގަރީން ފަތުހުﷲ މުހައްމަދާއި ސްޕޯޓްސް ފިޒިކް 180 ސެންޓްމީޓަރުގެ ބައިން މުހައްމަދު އިމްރާން އިބްރާހީމެވެ. ލޯ މެޑަލް ހޯދާފައިވަނީ ޖޫނިއާ 75 ކިލޯގެ ކެޓަގަރީން އަޝްޔަމް މުހައްމަދު ޝަފީގާއި ސްޕޯޓްސް ފިޒީކް އަޕް 175 ސެންޓިމީޓަރުގެ ކެޓަގަރީން އަލީ ސަލީމް އިބްރާހީމެވެ.

އިޖުތިމާއީ މަރުކަޒުގައި ކުރިޔަށްދިޔަ މި މުބާރާތުގައި ރާއްޖޭގެ އިތުރުން ވާދަކޮށްފައިވަނީ އަފްޣާނިސްތާން، އިންޑިއާ، ނޭޕާލް، ޕާކިސްތާން އަދި ލަންކާއެވެ. މިއީ ރާއްޖޭގައި މިއަހަރު ބޭއްވުނު ހަވަނަ ބައިނަލްއަގުވާމީ މުބާރާތެވެ.