ފަތުރުވެރިކަމުގެ ދާއިރާގައި ހަރަކާތްތެރިވާ އަންހެނުން މަދު ކަމަށާއި އެހެންނަމަވެސް އުންމީދީ މަންޒަރުތަކެއް ފެންނަ ކަމަށް ޓޫރިޒަމް މިނިސްޓަރު ޑރ. އަބްދުﷲ މައުސޫމް ވިދާޅުވެއްޖެއެވެ.
ރާއްޖެއެމްވީއަށް މިނިސްޓަރު ވިދާޅުވީ ރާއްޖެއަށް ކޮމިއުނިޓީ ބޭސްޑް ޓޫރިޒަމް ތައާރަފުކުރުމަށް، މައުލޫމާތު ދިނުމަށް މިނިސްޓްރީން އެކި ރަށްތަކަށް ދިޔަ ކަމަށެވެ. އެގޮތުން މިހާތަނަށް އެ ރަށްތަކުން އަންހެނުންގެ ފަރާތުން ފަތުރުވެރިކަމަށް ހުންނަ ޝައުޤުވެރިކަން ފެނިގެންދިޔަ ކަމަށެވެ.
އެ މަންޒަރު ފެނުމުން ވަރަށް ބޮޑު އުންމީދެއް ލިބިގެން ދިޔަ ކަމަށާއި މުސްތަޤްބަލުގައި ފަތުރުވެރިކަމުގެ ވިޔަފާރިވެރިން ގޮތުގައި އަންހެނުން ތިބޭނެ ކަމަށެވެ. އަދި ފަތުރުވެރިކަމުގެ މުހިންމު ވަޒީފާތަކުގައި ވެސް އަންހެނުން ތިބޭ މަންޒަރު ފެނިގެންދާނެ ކަމަށް މިނިސްޓަރު ވިދާޅުވިއެވެ.
މިނިސްޓަރު މިފަދައިން ވިދާޅުވެފައިވާއިރު ފަތުރުވެރިކަމުގެ ވެރިންނަށް ދިވެހިން ހެދުމަކީ މަޤްސަދު ކަމަށް ވެސް މިނިސްޓަރު ވަނީ މީގެކުރިން ވިދާޅުވެފައެވެ.
ޓޫރިޒަމް މިހާރު ފުޅާވަމުންދާ ރޭޓުގައި އަހަރަކު 12000 މުވައްޒަފުން ބޭނުންވާނެ ކަމަށް ވިދާޅުވިއެވެ. ބޭރު މީހުންނާއެކު މަސައްކަތް ކުރުމަކީ މައްސަލައެއް ނޫން ކަމަށާއި އެހެން ނަމަވެސް ބޮޑަށް ރަނގަޅީ އެ ޤައުމެއްގެ ބަޔަކު މަތީ މަގާމުތަކުގައި ތިބުން ކަމަށް މިނިސްޓަރު ވިދާޅުވިއެވެ.
މިނިސްޓަރު އިތުރަށް ވިދާޅުވީ ދިވެހިން އަދާކުރާ ހިތްވާ، ބޮޑު މުސާރަ ލިބޭ ވަޒީފާތަކަށް ދިވެހިން ގެންދިޔުމަކީ އަމާޒު ކަމަށެވެ. ސަފާރީތަކާއި، ރެސްޓޯރަންޓްތަކާއި، ގެސްޓްހައުސްތަކާއި، ރިސޯޓްތަކުގެ ހިންގުމުގައި ދިވެހިން ތިބެން ޖެހޭ ކަމަށާއި އަދި އެފުރުޞަތުތަކަށް ދިވެހިންނަށް މަގުފަހިކޮށްދިނުމަށް ބޭނުންފުޅުވާ ކަމަށް މިނިސްޓަރ ވިދާޅުވިއެވެ.
