މިފްކޯއިން ގިނަ މުވައްޒަފުންތަކެއް ވަކި ކުރަނީ
ފިނޭންސް މިނިސްޓްރީ އާއި މިފްކޯ ގުޅިގެން މިފްކޯގެ އަށް މުވައްޒަފުން ބޭނުންވާ މިންވަރަށް މުވައްޒަފުންގެ އަދަދު ހަމަކުރާ ކަމަށް ވަނީ އަންގާފަ
މިފްކޯގެ ޖަރީޒާ 103 އަށް މަސްކިރާ މަންޒަރު ފެންނަ ފޮޓޯއެއް
ހިންގުން ހަރުދަނާކުރުމުގެ ނަމުގައި ގިނަ އަދަދެއްގެ މުވައްޒަފުން ވަކިކުރުމަށް މަގުފަހިވާ ފަދަ ނިންމުންތަކެއް މިފްކޯ އިން ނިންމައިފިއެވެ.
އެކަން ހާމަކުރީ ބުރާސްފަތި ދުވަހު މިފްކޯ ހިންގުމާއި ހަވާލުވެ ހުންނެވި ސީއެފްއޯ އިލްޔާސް ހަނީފް ސޮއިކުރައްވާ ހުރިހާ މުވައްޒަފުންނަށް ފޮނުވި މެމޯއެއްގައެވެ.
ރާއްޖެއެމްވީ އަށް އެނގިފައިވާ ގޮތުން އެ މެމޯގައި ބުނެފައި ވަނީ ފިނޭންސް މިނިސްޓްރީ އާއި މިފްކޯ ގުޅިގެން މިފްކޯގެ އަށް މުވައްޒަފުން ބޭނުންވާ މިންވަރަށް މުވައްޒަފުންގެ އަދަދު ހަމަކޮށް، ހިންގުން ހަރުދަނާކުރަން ނިންމާފައިވާ ކަމަށެވެ. އެކަން ކުރަނީ މިފްކޯ އެފިޝިއެންސީ އެކްސަރސައިޒްގެ ނަމުގައި ކަަމަށް އެ މެމޯގައިވެއެވެ. އެ މެމޯގައި ވަނީ 17 ޖުލައިގައި މިފްކޯގެ ޑިރެކްޓަރުންގެ ބޯޑުން ނިންމާފައިވާ ނިންމުންތައް މުވައްޒަފުންނަށް އަންގާފައެވެ.
އެ މެމޯގައި ބުނެފައި ވަނީ ސީނިއަރ އަދި މިޑްލް މެނޭޖްމެންޓްގެ ވެރިންގެ އަސާސީ މުސާރަ 20 އިންސައްތަ ކުޑަކުރަން ނިންމާފައިވާ ކަމަށެވެ. ސީއީއޯ އިން ފެށިގެން ސީނިއާ މެނޭޖަރގެ ރޭންކްގައި ތިބި ފަރާތްތަކާއި ހަމައަށް އެ ބަދަލުގެ ދަށުން މުސާރަ ކުޑަ ވާނެ ކަަމަށް އެ މެމޯގައި ވަނީ ބުނެފައެވެ.
އަދި މުވައްޒަފުންގެ މުސާރައިގެ އޮނިގަނޑުގެ ފަރަގު ކުޑަކުރުމަށް ހުރިހާ ޑިޕާޓްމެންޓެއްގެ މުސާރައިގެ އޮނިގަނޑު އެއް ހަމަ ކުރާނެ ކަމަށް ވެސް ވަނީ ބުނެފައެވެ. މީގެ އިތުރުން ޕަރފޯމެންސް އަށް ބެލުމަށް ފަހު ވަކިކުރަން ޖެހޭ މުވައްޒަފުން ވަކިކުރާނެ ކަމަށާއި ޕްރޮބޭޝަންގައި ތިބި މުވައްޒަފުންގެ ތެރެއިން ކޮންމެހެން ބޭނުންވާ މުވައްޒަފުން ނޫން މީހުން ވަކިކުރުމަށް ވެސް ވަނީ ނިންމާފައެވެ.
ހަމައެހެންމެ 65 އަހަރު ވުމަށް ފަހު ކޮންޓްރެކްޓް މުވައްޒަފުންގެ ގޮތުގައި ތިބި މުވައްޒަފުން 3 މަސް ދުވަހުގެ ނޯޓިސް ދިނުމަށް ފަހު ކަނޑާލުމާއި ޚާއްސަ ހާލަތުގައި ނޫނީ 65 އަހަރު ވުމަށް ފަހު ކޮންޓްރެކްޓް މުވައްޒަފުންގެ ގޮތުގައި ނުނެގުމަށް ވަނީ ނިންމާފައެވެ.
