ޕުކެޓުގައި ފަނޑިޔާރަކާއި ބައްދަލުކުރި މީހާއާއި، ހައިކޯޓުގައި ހިނގަމުންދިޔަ ޝަރީއަތަށް އަތްބޭނި މީހުންގެ ލިސްޓް އެބައޮތް، ހާމަކުރާނަން - ޔާމީން

ހައިކޯޓުގައި ހިނގަމުންދިޔަ ޝަރީއަތަށް އަތްބޭނި މީހުންގެ ލިސްޓާއި، ތައިލެންޑުގެ ޕުކެޓުގައި ފަނޑިޔާރަކާއި ބައްދަލުކުރި މި ސަރުކާރުގެ ވަޒީރަކީ ކާކުކަން އެނގިވަޑައިގަންނަވާ ކަމަށާއި، އެކަންކަން ހާމަކުރައްވާނެކަމަށް ކުރީގެ ރައީސް އަބްދުﷲ ޔާމީން ވިދާޅުވެއްޖެއެވެ.

ޕީއެންއެފް އޮފީހުގައި ބޭއްވި ޖަލްސާގައި ރައީސް ޔާމީން ވިދާޅުވީ ރާއްޖެ ފަދަ ކުޑަކުޑަ ތަނެއްގައި ކިތައްމެ ސިއްރުން ކަންކަން ކުރިޔަސް އޭގެ މައުލޫމާތު އިނގޭނެ ކަމަށެވެ. ރައީސް ޔާމީން ވިދާޅުވީ 11 އަހަރުގެ ޖަލުހުކުމުގެ މައްސަލައިގެ އިސްތިއުނާފު ކުރިއަށްދިޔައިރު ހައިކޯޓުގައި އެމަނިކުފާނުގެ މައްސަލަ ކުރިއަށް ދިޔައިރު އޭގެ ތެރެއަށް އަތްބާނާ އެމަނިކުފާނަށް ގެއްލުންދޭން މަސައްކަތްކުރި ފަރާތްތަކުގެ މައުލޫމާތު ބޮޑު ޖަލްސާއެއްގައި ހާމަކުރައްވާނެ ކަމަށެވެ.

ރައީސް ޔާމީން ވިދާޅުވީ އެމަނިކުފާނުގެ ޝަރީއަތަށް އަތްބާނާ ކެނޑިޑެންސީ ބާތިލްކުރުމަށް މަސައްކަތް ކުރެއްވި މި ސަރުކާރުގެ ބޭބޭފުޅުންގެ މައުލޫމާތު އެނގިލައްވާ ކަމަށެވެ. އަދި އެބޭފުޅުންގެ ތެރެއިން ކޮންކޮން ބޭފުޅުންގެ ވާހަކަތެއްކަން ދައްކަވަނީ އެބޭފުޅުންނަށް އެނގިވަޑައިގަންނަވާނެ ކަމަށާއި، ރައީސް ޔާމީން ކައިރީގައި ވާހަކަ ބުނާނެ މީހުން މަދެއް ނުވާނެކަމަށް އެމަނިކުފާނު ވިދާޅުވިއެވެ.

ރައީސް ޔާމީން ވިދާޅުވީ ރައީސް މުއިއްޒު ވޯޓުން ހޮވިވަޑައިގެން، ސަރުކާރު ބަދަލުވި އިރު ކުރީގެ ރައީސް އިބްރާހިމް މުހައްމަދު ޞާލިހުގެ ދައުވަތަކަށް ބައްދަލުކުރެއްވި ކަމަށެވެ. އަދި އެ ބައްދަލުވުމުގައި ތިބީ 4 މީހުން ކަމަށާއި، ރައީސް މުއިއްޒުއާއި އެކީގައި ވަޑައިގެންނެވީ އަބްދުއްރަހީމް އަބްދުﷲ ކަމަށެވެ. އަދި ރައީސް ޞާލިހާއި ރައީސް އޮފީހުގެ އިސް އެހެން ބޭފުޅެއްވެސް އިންނެވި ކަމަށެވެ.

އެ ބައްދަލުވުމުގައި ރައީސް ޔާމީން ގެއަށް ބަދަލުކޮށްދެއްވުމަށް ނުވަތަ މިނިވަންކޮށްދެއްވުމަށް ރައީސް މުއިއްޒު ވިދާޅު ނުވާކަމަށް ވެސް ރައީސް ޔާމީން ވިދާޅުވިއެވެ.

ރައީސް ޔާމީން ވިދާޅުވީ ގުރުއާނަށް ނުދެވޭ ވަރުގެ އަހައްމިއްޔަތުކަމެއް ދޭނެކަމަށް ވިދާޅުވެ ކަންކަމުގައި އުޅުއްވިނަމަވެސް، އިންސާނެއްވިއްޔާ އަދި ދީނީ ކަންކަމުގައި އެތެރެފުށާއި ބޭރުފުށް ހާލިސްކުރަންވާނެ ކަމަށެވެ. އެހެން ނޫންކަމުގައިވާނަމަ ރައްޔިތުންގެ ފާޑުކިއުންތައް އަންނާނެ ކަމަށާއި، ކުރައްވަނީ ކޮންކަމެއްތޯ އެންމެން ތިބޭނީ ބަލަން ކަމަށެވެ.

ރައީސް ޔާމީންގެ ޝަރީއަތަށް އަތްބާނާ އެމަނިކުފާނުގެ ކެންޑިޑެންސީ ގެއްލުވާލަން މަސައްކަތް ކުރި ބޭބޭފުޅުން މި ސަރުކާރުގެ ވަޒީރުންގެ ގޮތުގައާއި އިސް ވެރިންގެ ގޮތުގައި ތިއްބެވިކަމަށް ތުހުމަތު ކުރެއްވި އިރު، އެބޭބޭފުޅުންގެ ނަމެއް ހާމައެއް ނުކުރައްވައެވެ.

މި ސަރުކާރު ވެރިކަމަށް އައީ ރައީސް ޔާމީންގެ ފޮޓޯ ފުޅާއި ހުސް ގޮނޑިއެއް ރައްޔިތުންނަށް ދައްކައިގެންނެވެ. އަދި ވެރިކަން ލިބުމުން އެ ފޮޓޯއާއި ގޮނޑި ގެއްލި އެމަނިކުފާނު މިނިވަންކުރަން އެއްވެސް މަސައްކަތެއް ނުކުރެއެވެ. ރައީސް ޔާމީންވެސް ވަނީ މީގެ ކުރިންވެސް އެމަނިކުފާނު މިނިވަންކުރަން ރައީސް މުއިއްޒުއާއި، އަބްދުއްރަހީމް އަދި މި ސަރުކާރުންވެސް އެއްވެސް މަސައްކަތެއް ނުކުރައްވާކަމަށް ވިދާޅުވެފައެވެ.