ލެސްޓާގެ ސޮޔުންކޫ، އެތުލެޓިކޯ މެޑްރިޑަށް

ލެސްޓާ ސިޓީ ދޫކޮށް ތުރުކީގެ ޑިފެންޑަރު، ކަގްލަރ ސޮޔުންކޫ ހަތަރު އަހަރުގެ އެއްބަސްވުމެއްގެ ދަށުން އެތުލެޓިކޯ މެޑްރިޑާ ގުޅިއްޖެއެވެ.

އުމުރުން 27 އަހަރުގެ ސޮޔުންކޫ ލެސްޓާ ދޫކޮށްލީ މިދިޔަ ޖޫން މަހު އޭނާގެ އެއްބަސްވުން ހަމަވުމުންނާއި، ޗެމްޕިއަންޝިޕަށް ޓީމު ރެލިގޭޓްވުމުންނެވެ.

ޖަރުމަނުގެ ފްރެއިބާގް އިން 2018 ވަނަ އަހަރު 19 މިލިއަން ޕައުންޑަށް ލެސްޓާއާ ގުޅުމަށް ފަހު ސެންޓާ ބެކް ވަނީ 132 މެޗު ކުޅެ، 2021 ވަނަ އަހަރު އެފްއޭ ކަޕާއި ކޮމިއުނިޓީ ޝީލްޑް ކާމިޔާބުކޮށްފައެވެ.

މިދިޔަ ސީޒަނުގައި ބްރެންޑަން ރޮޖާސްގެ އިރުޝާދުގެ ދަށުން ކުޅުނުއިރު، ސޮޔުންކޫއަށް އެކަޝީގެންވާ ވަރަށް ފުރުސަތު ލިބިފައެއް ނުވެއެވެ. ނަމަވެސް ޑީން ސްމިތު ޓީމާ ހަވާލުވުމާ އެކު ވަގުތުން ސޮޔުންކޫ ޓީމަށް ގެނެސް، ކުޅުމުގެ ފުރުސަތު ދިނެވެ.

އަނިޔާގެ ސަބަބުން ސޮޔުންކޫ އަށް ސީޒަނުގެ ފަހު ތިން މެޗު ގެއްލުނުއިރު ލެސްޓާ އޮތީ ޕްރިމިއާ ލީގުގެ 18 ވަނައިގައެވެ.