މަލާގާ ބަލިކޮށް އެތުލެޓިކޯ ލީގުގެ ތިންވަނަ އަށް

މަލާގާގެ މައްޗަށް 2-0 އިން ކުރި ހޯދައި ސްޕެނިޝް ލީގުގެ ތިންވަނަ މަގާމަށް އެތުލެޓިކޯ މެޑްރިޑް ކުރިއަށް ޖެހިލައިފި އެވެ.

މަލާގާގެ އަމިއްލަ ދަނޑުގައި ހޮނިހިރު ދުވަހުގެރޭ ކުޅުނު މެޗުގައި އެތުލެޓިކޯގެ ފަރާތުން މޮޅު ކުޅުމެއް ފެނިގެންދިޔައި އިރު އެޓީމުން ވަނީ މަލާގާގެ ހާފަށް ބާރު ބޮޑުކޮށް ލަނޑު ޖެހުމަށް ގިނަ ފުރުސަތުތަކެއް ތަނަވަސް ކޮށްފަ އެވެ.

މެޗުގައި އެތުލެޓިކޯއިން ޖެހި ފުރަތަމަ ލަނޑު 26 ވަނަ މިނެޓުގައި ކާމިޔާބުކޮށްދިނީ މިޑްފީލްޑަރު ކޮކޭ އެވެ. ކޮކޭ މިލަނޑު ކާމިޔާބުކުރީ މަލާގާ އޭރިޔާ ތެރެއިން އެޓީމުގެ ފެނާންޑޯ ޓޮރޭޒް އަށް ފައުލްކޮށްފައި ވަނިކޮށް ލިބުނު ބޯޅަ އެއްފަހަރުން ޖަހައި ގޯލުގެ ތިރީ ކަނަށް ފޮނުވާލައިގެންނެވެ.

މި ލަނޑަށްފަހު ފުރަތަމަ ހާފުގައި މާ ރަނގަޅު ފުރުސަތުތަކެއް ދެޓީމަށް ވެސް ލިބިފައި ނުވާ އިރު ދެވަނަ ހާފު ފެށިގެން އެތުލެޓިކޯ އަށް ވަނީ ލަނޑުޖަހާނެ ދެތިން ފުރުސަތު ލިބިގެން ގޮސްފަ އެވެ.

އެގޮތުން އެންޓޮއިން ގްރިޒްމަން އަދި ޓޮރޭޒް އަށް ލިބުނު ފުރުސަތުތައް ފާހަގަކޮށްލެވެ އެވެ.

މެޗުގައި އެތުލެޓިކޯ އިން ޖެހި ދެވަނަ ލަނޑު 74 ވަނަ މިނެޓުގައި ކާމިޔާބުކޮށްދިނީ ޑިފެންޑަރު ފިލިޕޭ ލުއިޒް އެވެ. އޭނާ މި ލަނޑު ކާމިޔާބުކުރީ މަލާގާ އޭރިޔާ ތެރެއިން ފޯވަޑް ޓޮރޭޒް ދެ ކުޅުންތެރިން ކައިރިން ނައްޓާލި ވަގުތު ލިބުނު ބޯޅައެއް އެއްފަހަރުން ޖަހައި ގޯލުގެ ތެރެއަށް ފޮނުވާލައިގެންނެވެ.

އެތުލެޓިކޯ އިން ދެލަނޑުގެ ލީޑަކާއެކު ފަހަތަށް ޖެހުނު އިރު މަލާގާއިން ވަނީ އެޓީމުގެ ކުޅުން އިތުރަށް ރަނގަޅުކޮށް އެތުލެޓިކޯގެ ހާފަށް ބާރު ބޮޑުކޮށްފަ އެވެ. އެގޮތުން ގާތް ގާތުގައި ތިން ހަމަލާއެއް ވަރު ވަނީ އިދިކޮޅު ގޯލާ އަމާޒުކޮށް ފޮނުވާލާފަ އެވެ.

މި ނަތީޖާއާއެކު އެތުލެޓިކޯ ލީގުގެ ތިންވަނަ އަށް އެރީ ކުރިން އެ މަގާމުގައި އޮތް ސެވިއްޔާ އަށް ވުރެ އެއް މެޗު އިތުރަށް ކުޅެ 58 ޕޮއިންޓާއެކު އެވެ. މެޗުން ބަލިވި މަލާގާ އޮތީ 27 ޕޮއިންޓާއެކު ލީގުގެ ސޯޅަ ވަނައިގަ އެވެ.