އިނގިރޭސި ޕްރިމިއާ ލީގު ފަށާނީ އާސެނަލް އާއި ލެސްޓާގެ މެޗުން

އާސެނަލް އަދި ލެސްޓާ ސިޓީ ބައްދަލުކުރާ މެޗުން އިނގިރޭސި ޕްރިމިއާ ލީގުގެ އާ ސީޒަން އަންނަ ހުކުރުދުވަހު ފެށޭނެއެވެ.

ހުކުރު ދުވަހު އިނގިރޭސި ޕްރިމިއާ ލީގުގެ އާ ސީޒަން ފެށޭ އިރު މިފަހަރުގެ ޓްްރާންސްފާ މާކެޓްގައި އިނގިރޭސި ޓީމުތަކަށް ވަނީ ބޮޑެތި ބަދަލުތަކެއް ގެނެސްފައެވެ. އެގޮތުން ގިނަ އަދަދެއްގެ އާ ކުޅުންތެރިންތަކެއް ގެނެސް ޓީމުތައް އިތުރަށް ވަރުގަދަކޮށްފައިވާކަން ފާހަގަކޮށްލެވެއެވެ.

އެގޮތުން ސީޒަން ހުޅުވާ މެޗުގައި ވާދަކުރާ ލެސްޓާ ސިޓީ އަދި އާސެނަލްއަށް ވެސް ވަނީ ކުޅުންތެރިން ގެނެސް ޓީމުގެ އެކި މަގާމުތައް ވަރުގަދަކޮށްފައެވެ. އެގޮތުން މި ފަހަރުގެ ސީޒަނަށް އާސެނަލްއިން ވަނީ އެޓީމުގެ ގޯލް ކީޕަރު ސަޒްނީ އަދި 10.3 މިލިއަން ޕައުންޑަށް އިޓަލީގެ ޔުވެންޓަސް އަށް ވިއްކާލުމަށް ފަހު ފްރާންސްގެ ލިޔޯންއަށް ކުޅެމުން އައި ހުނަރުވެރި ފޯވާޑް އެލެސެންޑަރ ލަކަޒޭޓް، 52 މިލިއަން ޕައުންޑުގެ ރެކޯޑް އަގަކަށް އާސެނަލްއަށް ގެނެސްފައެވެ. އަދި ހިލޭ ޓްރާންސްފާއެއްގެ ދަށުން ޔާޔާ ސަނޯގޯ ފްރާންސްގެ ޓޫލޫސް އަށް ދޫކޮށްލުމަށް ފަހު ސާލްކޭއަށް ކުޅެމުން އައި ސީޑް ކޮލަސެނިޗް ހިލޭ ޓްރާންސްފާގެ ދަށުން އާސެނަލްއަށް ގެނެސްފައެވެ.

މީގެ އިތުރުން އަދިވެސް އާސެނަލްއިން ދަނީ އިތުރު ކުޅުންތެރިން ގެންނަން މަސައްކަތް ކުރަމުންނެވެ.

ލެސްޓާ ސިޓީއަށް ބަލާއިރު އެޓިމަށް ވެސް ވަނީ ބަދަލުތަކެއް ގެނެސްފައެވެ. އެގޮތުން ނިމިގެން ދިޔަ ސީޒަނުގައި އެޓީމަށް ކުޅުނު ބައެއް ކުޅުންތެރިން ވަނީ ކުލަބު ދޫކޮށް އެހެން ކުލަބުތަކަށް ބަދަލުވެފައެވެ. އެގޮތުން ލެސްޓާގެ ދެވަނަ ގޯލް ކީޕަރ ރޮބާޓް ޒީލާ ޖަރުމަނުގެ ސްޓޫގާޓްއަށް ބަދަލުވެފައިވާއިރު އެޓީމުގެ އެޓޭކިން މިޑްފީލްޑަރ ބާޓޮސް ކަޕުސްކާ ވަނީ ޖަރުމަނުގެ ފްރެއިބާގްއަށް ބަދަލުވެފައެވެ. އަދި މައިކަލް ކެއިން އާއި މާސިން ވެސިލޯސްކީ ހިލޭ ޓްރާންސްފާގެ ދަށުން ދޫކޮށްލާފައިވާއިރު، ނިމިގެން ދިޔަ ސީޒަނުގައި މެނެޗެސްޓާ ސިޓީއަށް ކުޅުނު ކެލެޗި އިހެނަޗޯ އާއި ސްޕެއިންގެ ސެވިއްޔާއަށް ކުޅެމުން އައި ވިސެންޓޭ އިބޯރާ އާއި ހަލްސިޓީގެ ދެކުޅުންތެރިން ކަމަށްވާ ހެރީ މަގުއިރޭ އަދި އެޑިން ޖެކްޕޮވިޗް ވަނީ ލެސްޓާ ސިޓީއަށް ގެނެސްފައެވެ.

ރިޕޯޓްތައް ބުނާގޮތުން ލެސްޓާގެ މުހިންމު ކުޅުންތެރިއެއް ކަމުގައިވާ މާހްރޭޒް ވެސް ކުޑަ ދުވަސަކޮޅެއްގެ ތެރޭގައި އިޓަލީގެ ރޯމާއަށް ބަދަލުވާނެއެވެ. އޭނާ ހޯދުމަށް އާސެނަލް އިން ވެސް މަސައްކަތްކުރިއެވެ.

ޕްރިމިއާ ލީގުގެ އާސީޒަނާ ކުރިމަތިލާއިރު ދެޓީމަށް ވެސް އަނިޔާގެ މައްސަލަތައް ވަނި ކުރިމަތި ވެފައެވެ. އެގޮތުން އާސެނަލްއަށް ބަލާއިރު އެޓީމުގެ މުހިންމު ގިނަ ކުޅުންތެރިން ސީޒަން ހުޅުވާ މެޗުގައި ކުޅެވުމާ މެދު ވަނީ ސުވާލު އުފެދިފައެވެ. އެގޮތުން ކޮމިޔުނިޓީ ޝީލްޑް މެޗުގައި އަނިޔާވި މުސްތަފީގެ އިތުރުން ސަންޗޭޒް، ރަމްސޭ، އޮޒިލް، މިދިޔަ ސީޒަނުގައި ވެސް އަނިޔާގެ ގިނަ މައްސަލަތަކެއް ކުރިމަތިވި ވިލްޝެއާ، ކޮސެއިންލީ، ސަންޓި ކަޒޯލާގެ އިތުރުން ޕައުލިސްޓާ އަދި ކޮކުއެލިން ހިމެނެއެވެ. މި ހުރިހާ ކުޅުންތެރިން ވެސް މިވަގުތު ތިބީ އަނިޔާގެ މައްސަލަ ކުރިމަތިވެ އަންފިޓްކޮށެވެ.

ލެސްޓާއަށް ބަލާއިރު އެޓީމުގެ އެއް ނަމްބަރ ގޯލް ކީޕަރ ކޭސްޕާ ސްމައިކަލްގެ އިތުރުން އޭންޑީ ކިންގް އަދި މެޑްޑީ ވެސް މިވަގުތު ތިބީ އަނިޔާގައެވެ. އާސެނަލްއާ ދެކޮޅަށް ކުޅޭ މެޗުގައި މިކުޅުންތެރިންނަށް ކުޅެވޭނެ ކަމާ މެދު ވަނީ ސުވާލު އުފެދިފައެވެ.

އިނގިރޭސި ޕްރިމިއާލީގުގެ އާ ސީޒަން ހުޅުވާ މެޗުގައި ލެސްޓާ އަދި އާސެނަލް ބައްދަލުކުރާއިރު މި މެޗު ކުޅެވޭނީ އަންނަ ހުކުރު ދުވަހުގެރޭ ރާއްޖޭ ގަޑިން 11:45 ގައެވެ.