ޕްރިމިއަރ ލީގުގައި ރޭ ލެސްޓަ ސިޓީއާ ދެކޮޅަށް ކުޅުނު މެޗު ލިވަޕޫލް އިން ކާމިޔާބު ކޮށްފިއެވެ.

ލެސްޓާއާ ވާދަކޮށް ލިވަޕޫލްއިން މެޗު ކާމިޔާބު ކުރީ 2-3 ގެ ނަތީޖާއިންނެވެ.

ލެސްޓާގެ އަމިއްލަ ދަނޑުގައި ކުޅުނު މި މެޗުގައި ދެޓީމުގެ ފަރާތުން ވެސް ވަރަށް ވާދަވެރި ކުޅުމެއް ފެނިގެން ދިޔައިރު، މެޗުގެ ފުރަތަމަ ގޯލްޖަހާ ލީޑުނެގީ ލިވަޕޫލް އިންނެވެ. ކުޓީނިއޯ ނަގައިދިން ހުރަހަކުން މި ގޯލު މެޗުގެ 15 ވަނަ މިނެޓްގައި އެޓީމަށް ކާމިޔާބު ކޮށްދިނީ މުހައްމަދު ސަލާހުއެވެ. އަދި މެޗުގެ 23  ވަނަ މިނެޓްގައި ލިވަޕޫލްއަށް ލިބުނު ހިލޭޖެހުމެއް ކާމިޔާބުކޮށްދީ ފިލިޕޭ ކުޓީނިއޯ ވަނީ އެޓީމުގެ ދެވަނަ ގޯލު ކާމިޔާބުކޮށްދީ ލީޑު ފުޅާކޮށްފައެވެ.

ދެ ގޯލުގެ ލީޑަކާއެކު ފުރަތަމަ ހާފް ނިންމާލުމާ ގާތަށް ލިވަޕޫލްއިން ޖެހިލާފައިވަނިކޮށް ހާފްގެ ފަހު މިނެޓްގައި އޮކަޒާކީ ވަނީ ލެސްޓާއަށް ގޯލެއް ކާމިޔާބުކޮށްދީ ނަތީޖާގެ ފަރަގު ކުޑަކޮށްދީފައެވެ.

ލިވަޕޫލުން ލީޑުގައި އޮވެ ފުރަތަމަ ހާފުނިންމާލި އިރު، މެޗުގެ 68 ވަނަ މިނެޓްގައި ހެންޑަސަން ވަނީ ލިވަޕޫލްގެ ތިންވަނަ ގޯލު ކާމިޔާބު ކޮށްދީފައެވެ. ނަމަވެސް މި ގޯލު ކާމިޔާބު ކުރިތާ މިނެޓެއްފަހުން ޖެމީ ވާޑީ ވަނީ ލެސްޓާގެ ދެވަނަ ގޯލު ކާމިޔާބުކޮށްދީ ނަތީޖާގެ ފަރަގު ކުޑަކޮށްދީފައެވެ.

އަދި މެޗުގެ 72 ވަނަ މިނެޓްގައި ނަތީޖާ އެއްވަރުކޮށްލަން ލެސްޓާއަށް ޕެނަލްޓީއެއް ވަނީ ލިބިގެން ގޮސްފައެވެ. އެހެން ނަމަވެސް ވާޑީ ފޮނުވާލި އެ ޕެނަލްޓީ ލިވަޕޫލްގެ ގޯލްކީޕަރު ވަނީ ދިފާއު ކޮށްފައެވެ.

މި މޮޅާއެކު ލިވަޕޫލް އޮތީ 11 ޕޮއިންޓާއެކު ލީގުގެ ފަސްވަނައިގައެވެ. ލެސްޓާ އޮތީ ހަތަރު ޕޮއިންޓާއެކު ލީގުގެ 16 ވަނައިގައެވެ. ލީގުގެ އެއްވަނައި ގައި 16 ޕޮއިންޓާއެކު އޮތީ މެންޗެސްޓަރ ސިޓީއެވެ. ލީގުގައި ލިވަޕޫލް ދެން ބައްދަލުކުރާނީ ނިއުކާސަލް ޔުނައިޓެޑާއެވެ.