ކ. މާލެ
|
23 ނޮވެންބަރ 2017 | ބުރާސްފަތި 14:00
ޗެލްސީގެ ކުޅުންތެރިން ލަނޑު ޖެހުމަށްފަހު އުފާ ފާޅުކުރަނީ
ޗެލްސީގެ ކުޅުންތެރިން ލަނޑު ޖެހުމަށްފަހު އުފާ ފާޅުކުރަނީ
ގެޓީ އިމޭޖަސް
ޔުއެފާ ޗެމްޕިއަންސް ލީގު
ޗެމްޕިއަންސް ލީގު: ޗެލްސީ ގަދަ 16އަށް، އެތުލެޓިކޯ އުއްމީދު ދަމަހައްޓައިފި
 
އެތުލެޓިކޯ މެޑްރިޑް ވަނީ 2-0 ގެ ނަތީޖާއަކުން އިޓަލީގެ ރޯމާ ބަލިކޮށްފަ
 
ޗެލްސީން ވަނީ ރަށުން ބޭރުގައި އަޒަރްބައިޖާންގެ ޗެމްޕިއަން ގަރަބާގް 4-0 ގެ ތަފާތު ބޮޑު ނަތީޖާއަކުން ބަލިކޮށްފަ

ޔުއެފާ ޗެމްޕިއަންސް ލީގުގެ ގަދަ 16އިން އިނގިރޭސިވިލާތުގެ ޗެލްސީ ޖާގަ ހޯދިއިރު, ދެވަނަ ބުރަށް ކޮލިފައިވުމުގެ އުއްމީދު އެޓްލެޓިކޯ މެޑްރިޑުން ދަމަހައްޓައިފިއެވެ.

ޗެމްޕިއަންސް ލީގުގެ ގްރޫޕް ސީގައި ޗެލްސީން ވަނީ ރަށުން ބޭރުގައި އަޒަރްބައިޖާންގެ ޗެމްޕިއަން ގަރަބާގް 4-0 ގެ ތަފާތު ބޮޑު ނަތީޖާއަކުން ބަލިކޮށްފައެވެ. މިމެޗުގައި ޗެލްސީގެ ފަރާތުން ރަނގަޅު ކުޅުމެއް ފެނިގެންދިޔައިރު ގަރަބާގްއިން މި މެޗުގެ ބޮޑު ބައެއް ފުރިހަމަކޮށްފައިވަނީ 10 ކުޅުންތެރިންނާއެކުއެވެ.

މެޗުގެ 19 ވަނަ މިނެޓުގައި ވިލިއަންއަށް ކުރި ފައުލަކާއި ގުޅިގެން ގަރަބާގްގެ ކެޕްޓަން ރަޝަދް ފަރްހާދު ސަދިގޯވްއަށް ރަތް ކާޑު ދެއްކިއެވެ. މިފައުލާއި ގުޅިގެން ޗެލްސީއަށް ލިބުނު ޕެނަލްޓީ ބެލްޖިއަމް ވިންގާރ އެޑެން ހަޒާޑް ވަނީ ކާމިޔާބުކޮށްދީފައެވެ. މެޗުގެ 36 ވަނަ މިނެޓުގައި ހަޒާޑް ތަނަވަސްކޮށްދިން ފުރުސަތަކުން ވިލިއަން ޗެލްސީގެ ލީޑު ފުޅާކޮށްދިންއިރު، މި ހާފުގައި އިތުރު ލަނޑު ޖެހުމަށް ޗެލްސީން ގިނަ ފުރުސަތުތަކެއް ތަނަވަސްކުރިއެވެ.

ދެ ލަނޑުގެ ލީޑެއްގައި އޮވެ ޗެލްސީން ފުރަތަމަ ހާފުގެ ކުޅުން ނިންމާލިއިރު، ދެވަނަ ހާފުގައި ވެސް ގިނަ ވަގުތު ބޯޅަ ގެންގުޅެ ޗެލްސީން ގިނަ ހަމަލާތަކެއް ގަރަބާގްގެ ގޯލަށް އަމާޒުކުރިއެވެ. ޗެލްސީގެ ތިންވަނަ ލަނޑަކީވެސް ލިބުނު ޕެނަލްޓީއަކުން ކާމިޔާބުކުރި ލަނޑެކެވެ. މެޗުގެ 73 ވަނަ މިނެޓުގައި ލިބުނު ޕެނަލްޓީއަކުން މި ލަނޑު އެ ޓީމަށް ޖަހައިދިނީ ސެސް ފެބްރިގާސްއެވެ. މެޗުގެ 85 ވަނަ މިނެޓުގައި ވިލިއަން ވަނީ އޭނާ މެޗުގައި ޖެހި ދެވަނަ ލަނޑާއެކު ޗެލްސީއަށް މެޗުން ތިން ޕޮއިންޓް ކަށަވަރު ކޮށްދީފައެވެ.

މި ގްރޫޕުގެ ދެވަނަ މެޗުގައި ސްޕެއިންގެ އެތުލެޓިކޯ މެޑްރިޑް ވަނީ 2-0 ގެ ނަތީޖާއަކުން އިޓަލީގެ ރޯމާ ބަލިކޮށް، ދެވަނަ ބުރުގެ އުއްމީދު ދަމަހައްޓާފައެވެ. ދެ ޓީމުގެ ފަރާތުން ވެސް މޮޅު ކުޅުމެއް ފެނިގެންދިޔަ މި މެޗުގައި އެތުލެޓިކޯގެ ހުރިހާ ލަނޑެއް ވެސް ފެނިގެން ގޮސްފައިވަނީ މެޗުގެ ފަހު ހާފުގެ ތެރޭގައެވެ.

އެގޮތުން މެޗުގެ 69 ވަނަ މިނެޓުގައި އެންހެލް ކޮރޭއާ ނަގައިދިން ހުރަހަކުން އެންޓޮއިން ގްރީޒްމަން ލަނޑެއް ޖަހައިދީ އެތުލެޓިކޯ އަށް ލީޑު ނަގައިދިންއިރު އެ ޓީމުގެ ދެވަނަ ލަނޑު މެޗު ނިމެން ފަސް މިނެޓަށް ވެފައިވަނިކޮށް ޖަހައިދިނީ ކެވިން ގަމެއިރޯއެވެ.

އެތުލެޓިކޯ ދެވަނަ ބުރުގެ ޖާގައެއް ހޯދުމަށް ގްރޫޕުގެ ފަހު މެޗުގައި ޗެލްސީއާއި ދެކޮޅަށް ކުޅެން ޖެހޭ މެޗު ކާމިޔާބުކުރަން ޖެހޭނެއެވެ. ހަމައެހެންމެ ރޯމާ ކުޅޭ މެޗުން އެ ޓީމު ބަލިވާން ވެސް ޖެހޭނެއެވެ.

ޗެލްސީން ގަދަ 16ގެ ޖާގައެއް ކަށަވަރުކުރީ ކުޅުނު ފަސް މެޗުން 10 ޕޮއިންޓް އެއްކޮށްގެންނެވެ. ރޯމާއަށް އަށް ޕޮއިންޓާއެކު ގްރޫޕުގެ ދެވަނަ ލިބޭއިރު، އެޓްލެޓިކޯއަށް ހަ ޕޮއިންޓާއެކު ލިބެނީ ތިންވަނައެވެ. ކުޅުނު ފަސް މެޗުން ލިބުން ދެ ޕޮއިންޓާއެކު މި ގްރޫޕުގެ ފުލުގައި އޮތީ އަޒަރްބައިޖާންގެ ގަރަބާގްއެވެ.  

އެންމެ ފަހުން އަޕްޑޭޓް ކުރީ: 3 ހަފްތާ ކުރިން
ރިވިއު ކުރީ: މުޙައްމަދު ޒާހިރު
0%
0%
0%
0%
0%
0%
ކޮމެންޓް