ޕީއެސްޖީގައި ހުންނަ ނަމަ އެމްބާޕޭ ކޮންޓްރެކްޓް އައުކުރަންޖެހޭނެ: ޕީއެސްޖީގެ ރައީސް
6 ޖުލައި 2023 | ބުރާސްފަތި 05:50ރައީސް ބުނަނީ ދުނިޔޭގެ އެންމެ މޮޅު ކުޅުންތެރިޔާ ފްރީކޮށް އެހެން ކުލަބަކަށްދާނެ ދޫކޮށްނުލެވޭނެ ކަމަށް
އެމްބާޕޭ (ކ) އާއި ޕީއެސްޖީގެ ރައީސް
ޕީއެސްޖީގައި މި ސީޒަނުގައި ހުންނަނަމަ ފްރާންސްގެ ކެޕްޓަން ކީލިއަން އެމްބާޕޭ ކޮންޓްރެކްޓް އައު ކުރަން ޖެހޭނެ ކަމަށް އެކުލަބުން ބުނެފި އެވެ.
ޕީއެސްޖީގެ ރައީސް ނަސީރު އަލް ޚެލައިފީ ނޫސްވެރިންނާ ވާހަކަ ދައްކަމުން ވިދާޅުވީ ކުލަބުގެ ސްޓޭންޑް މިކަމުގައި ބަދަލު ނުވާނެ ކަމަށެވެ.
ކުރިއަށް އޮތް ސީޒަނަށް ފަހު އެމްބާޕޭއަށް ކޮންޓްރެކްޓާ މެދު ބޭނުންގޮތަކަށް އަމަލުކުރެވިދާނެ އެވެ. ސަބަބަކީ އޭނާގެ ކޮންޓްރެކްޓްގެ ފަހު އަހަރުކަމަށްވާ 2025 ވަނަ އަހަރަކީ ބޭނުންވާނަމަ އެކްޓިވޭޓްކުރެވޭ އެއް އަހަރު ކަމަށްވާތީ އެވެ. ނަމަވެސް އޭނާ މިހާރު ވިސްނައިގެން ހުރީ ކުރިއަށް އޮތް ސީޒަނަށް ފަހު ސްޕޭނުގެ ރެއާލް މެޑްރިޑަށް ބަދަލުވާށެވެ.
ރެއާލްއިން ކުރިއަށް އޮތް ސީޒަނަށް ބޮޑު އަގުގައި ފޯވަޑެއް ހޯދުން ހުއްޓާލީ އެމްބާޕޭ އަންނާނެ ކަމުގެ ޔަގީންކަން ދިނުމުންނެވެ. އަދި އޭނާ އަށް 100 މިލިއަން ޕައުންޑް ހޭދަކުރަން ވެސް ރެއާލް އޮތީ ތައްޔާރަށެވެ.
