ބޯކޮށް ވާރޭވެހި ކަނޑުތައް ގަދަވާނެތީ ހއ. އިން ބ. އަތޮޅަށް ޔެލޯ އެލަރޓް ނެރެފި
5 ޖުލައި 2023 | ބުދަ 06:34އެލާޓް ނެރެފައިވަނީ މިއަދު ހެނދުނު 11:00 އިން ފެށިގެން މެންދުރު 3:00 އާ ހަމައަށް
ރާއްޖޭގެ އުތުރުގެ ކަނޑުތައް އަދިވެސް ގަދަވާނެ
ބޯކޮށް ވާރޭވެހި ކަނޑުތައް ގަދަވާނެތީ ހއ ން ފެށިގެން ބ އަތޮޅާ ހަމައަށް ޔެލޯ އެލަރޓް ނެރެފިއެވެ.
މޫސުމާ ބެހޭ ޤައުމީ އިދާރާއިން މި އެލާޓް ނެރެފައިވަނީ މިއަދު ހެނދުނު 11:00 އިން ފެށިގެން މެންދުރު 3:00 އާ ހަމައަށެވެ.
އެލާޓްގެ މުއްދަތުގެ ތެރޭގައި ހއ. އިން ބ. އަތޮޅާ ދެމެދުގައި ހިމެނޭ ރަށްތަކަށް ބޯކޮށް ވާރޭވެހި ގަޑިއަކު 25 މޭލާއި 30 މޭލާ ދެމެދުގެ ބާރުމިނުގައި ވައި ޖެހޭނެ ކަމަށާއި ވިލާގަނޑުގައި ގަޑިއަކު 50 މޭލަށް ވައި ގަދަވާނެ ކަމަށް ވަނީ ލަފާ ކޮށްފައެވެ. އަދި މި މުއްދަތުގެ ތެރޭގައި ކަނޑުތައް ވެސް ގަދަވާނެ ކަމަށް ވަނީ ލަފާ ކޮށްފައެވެ.
މޫސުމާ ބެހޭ ޤައުމީ އިދާރާއިން ބުނެފައިވާ ގޮތުގައި މިއަދު ހަވީރު 6:00 އާ ހަމައަށް ރާއްޖޭގެ އެކި ހިސާބުތަކަށް ވިއްސާރަކުރާނެއެވެ. އަދި ބައެއް ރަށްތަކަށް ގުރުގުރުމާއެކު ބޯކޮށް ވާރޭވެހޭނެ ކަމަށް ލަފާ ކޮށްފައިވާއިރު އުތުރާއި މެދުރާއްޖެ ތެރޭގެ ކަނޑުތައް ގަދަވެ ރާޅުގެ އުސްމިން 4-7 ފޫޓަށް އަރާނެ ކަމަށް ވަނީ ލަފާ ކޮށްފައެވެ.
