ކުލަބުގެ ރެކޯޑް ފީ އެއްގައި ވުލްވްސްގެ ކޮލިންސް ބްރެންޓްފޯޑަށް
އޭނާ އަކީ އަޔަލޭންޑްގެ ވެސް އެންމެ އަގުބޮޑު ކުޅުންތެރިޔާ
ނަތަން ކޮލިންސް
އިނގިރޭސި ޕްރިމިއާ ލީގުގައި ހިމެނޭ ވޮލްވާހެމްޕްޓަން ވޮންޑާސްގެ ޑިފެންޑަރު، ނަތަން ކޮލިންސް ގެނައުމަށް ބްރެންޓްފޯޑުން ކުލަބު ރެކޯޑެއް ކަމަށްވާ 23 މިލިއަން ޕައުންޑުގެ އެއްބަސްވުމެއް ފުރިހަމަކޮށްފިއެވެ.
މިދިޔަ ހޫނު މޫސުމުގައި ބާންލީއިން ވުލްވްސް އަށް ބަދަލުވި ރިޕަބްލިކް އޮފް އަޔަލޭންޑްގެ އިންޓަނޭޝަނަލް ކުޅުންތެރިޔާ ބްރެންޓްފޯޑާ ގުޅުނީ ހަ އަހަރުގެ އެއްބަސްވުމެއްގެ ދަށުންނެވެ. ކޮލިންސް ވަނީ މިދިޔަ ސީޒަނުގައި ވުލްވްސް އަށް 31 މެޗު ކުޅެދީ 13 ވަނަ ހޯދައިދިނުމަށް އެހީތެރިވެދީފައެވެ.
2021 ވަނަ އަހަރުގެ ހޫނު މޫސުމުގައި ސްޓޯކް ސިޓީން ބާންލީއާ ގުޅުމަށް ފަހު އޭނާ ވަނީ ބާންލީގައި އެއް ސީޒަން ހޭދަކޮށްފައެވެ. އޭނާ އަކީ އަޔަލޭންޑްގެ ވެސް އެންމެ އަގުބޮޑު ކުޅުންތެރިޔާއެވެ.
ވުލްވްސްގެ ޑިފެންޑަރު މެކްސް ކިލްމަން ހޯދުމަށް ނަޕޯލީން ހުށަހެޅި 30 މިލިއަން ޕައުންޑުގެ ބިޑު ވުލްވްސް އިން ވަނީ ބާތިލުކޮށްފައެވެ. ނަމަވެސް ޓީމުގެ ކެޕްޓަން، ރުބެން ނެވޭސް ވަނީ ސައޫދީ އަރަބިއާގެ އަލް ހިލާލްއާ ގުޅިފައެވެ.
ބްރެންޓްފޯޑުގެ ކޯޗު ތޯމަސް ފްރޭންކް އޭނާގެ ސްކޮޑް ވަރުގަދަ ކުރަމުން އަންނައިރު، އެ ޓީމުންވަނީ ފްރެއިބާގްގެ ނެދަލޭންޑްސްގެ ގޯލްކީޕަރު މާކް ފްލެކެންއާ އެކު އެއްބަސްވުމަކަށް އައިސްފައެވެ.
