ވިނަރެސް ފްލެޓުތަކުގެ ތަޅުދަނޑި މި މަހު ހަވާލުކުރަނީ
4 ޖުލައި 2023 | އަންގާރަ 06:52އެއްބަސްވުމުގައި ސޮއިކުރުމުގެ މަސައްކަތް މިދިޔަ މަހު ވަނީ ފަށާފައި
ވިނަރެސް ފްލެޓްތައް
ސަރުކާރުގެ ބޯހިޔާވަހިކަމުގެ ސިޔާސަތުގެ ދަށުން ހުޅުމާލޭގައި ތަރައްގީކޮށްފައިވާ ވިނަރެސް ފްލެޓުތަކުގެ ތަޅުދަނޑިތައް މިމަހު ހަވާލުކުރަން ފަށާނެ ކަމަށް އަރބަންކޯއިން ބުނެފިއެވެ.
އަރބަންކޯއިން ވަނީ މިކަން ރާއްޖެއެމްވީއަށް ކަށަވަރުކޮށްދީފައެވެ.
ވިނަރެސް ފްލެޓަށް ހޮވިފައިވަނީ މާލޭގައި ރަޖިސްޓްރީނުވެ، ދިރިއުޅޭތާ 15 އަހަރުވެފައިވާ މީހުންގެ ކެޓަގަރީއިން 1094 މީހުންނަށާއި، މާލޭގައި ރަޖިސްޓްރީ ވެފައިވާތާ 15 އަހަރުވެފައިވާ މީހުންގެ ކެޓަގަރީން 267 މީހުންނަށެވެ.
އަރބަންކޯއިން ވަނީ ފްލެޓް ލިބޭ މީހުންނާއެކު އެއްބަސްވުމުގައި ސޮއިކުރުމުގެ މަސައްކަތް މިދިޔަ މަހު ފަށާފައެވެ. މިހާތަނަށް މި އެއްބަސްވުމުގައި ސޮއިކުރީ ކިހާ ބަޔަކުކަން ހޯދުމަށް މަސައްކަތްކުރުމުން އަދި މިހާތަނަށް އެއްބަސްވުމުގައި ސޮއިކުރީ ކިހާ ބައެއްކަން ސާފުވެފައެއް ނުވެއެވެ.
ވިނަރެސް މަޝްރޫއުގެ ދަށުން ޗައިނާގެ ސީއެމްއީސީއާ ހަވާލުކޮށްގެން 10 ޓަވަރުގެ މަސައްކަތް ކުރިއަށްގެންގޮސްފައިވެއެވެ. މި 10 ޓަވަރުގައި ޖުމްލަ 1344 ފްލެޓް ހަދާފައިވެއެވެ. ވިނަރެސްގައި ދެ ވައްތަރެއްގެ އެޕާޓްމަންޓު ހިމެނެއެވެ. 902 އަކަފޫޓު އަދި 883 އަކަފޫޓް ހިމެނޭ މި އެޕާޓްމަންޓްތަކުގައި 3 ކޮޓަރި އަދި 3 ފާހާނަ އަދި ބެލްކަނީ ހިމެނެއެވެ.
