އެކްސިޑެންޓްގައި އަނިޔާވި ހަފީޒް، އެއަރ އެންބިއުލާންސެއްގައި ބޭރަށް ގެންދަން އެހީ ހޯދަނީ
ހާލު ދެރަކަމުން ކޮމަރޝަލް ފްލައިޓެއްގައި ރާއްޖެއިން ބޭރަށް ގެންދެވޭކަށް ނެތް
އެކްސިޑެންޓްގައި އަނިޔާވި އަލީ ހަފީޒް
އަޟްޙާ އީދު ދުވަހުގެ ފަތިހު މާލޭގައި ހިނގި ނުރައްކާތެރި އެކްސިޑެންޓްގައި އަނިޔާވެގެން ފަރުވާދެމުން އަންނަ، ގައުމީ ޔުނިވަސިޓީގެ ލެކްޗަރަރ އަލީ ހަފީޒް އިތުރަށް ފަރުވާއަށް ރާއްޖެއިން ބޭރަށް ގެންދިޔުމަށް އެހީ ހޯދަން ފަށައިފިއެވެ.
ހަފީޒަށް ފަރުވާދެމުން އަންނަނީ އޭޑީކޭގެ އައިސީޔޫގައެވެ. މައުލޫމާތު ލިބިފައިވާ ގޮތުގައި ހަފީޒްގެ ހާލަތު އަދިވެސް ސީރިއަސްއެވެ. އޭނާގެ ހާލު ދެރަކަމުން ކޮމަރޝަލް ފްލައިޓެއްގައި ރާއްޖެއިން ބޭރަށް ގެންދެވޭކަށްނެތެވެ. އެހެންކަމުން އެއަރ އެމްބިޔުލާންސެއްގައި އޭނާ ރާއްޖެއިން ބޭރަށް ގެންދިޔުމުގެ މަސައްކަތް އާއިލާއިން އަންނަނީ ކުރަމުންނެވެ.
އެހެންކަމުން އޭނާއަށް އެހީތެރިވުމަށް އާއިލާއާއި ރައްޓެހިން އަންނަނީ އެދެމުންނެވެ.
އަލީ ހަފީޒް މިހާރު ހުންނެވީ ގައުމީ ޔުނިވަސިޓީގެ ސީނިއަރ ލެކްޗަރަރގެ މަގާމުގައެވެ. ކިޔަވައިދެއްވުމުގައި 18 އަހަރު ހޭދަކުރައްވާފައިވާ ހަފީޒް އެކްސިޑެންޓުވެފައިވަނީ ހީނާމާގޭ ޕާކިންގ ޒޯނު ކައިރީގައި ހުންނަ މިސްކިތުން ފަތިސް ނަމާދުން ނިމިވަޑައިގެން ނުކުންނެވިތަނާއެވެ. މަންޒަރު ދުށް މީހުން ބުނާގޮތުގައި ސައިކަލު ދުއްވާފައި އައީ ވަރަށް ބާރަށެވެ. އަދި ހަފީޒުގެ ގައިގައި ސައިކަލު ޖެހުމުން އޭނާ ވަރަށް ދުރަށް ވިއްސައިގެން ދިޔަކަމަށް ބުނެފައިވެއެވެ.
މިއެކްސިޑެންޓްގައި ސައިކަލް ދުއްވަން އިން މީހާ، ކޯޓު އަމުރެއްގެ ދަށުން ހޯމަ ދުވަހު ހައްޔަރުކޮށްފައިވާ ކަމަށް ފުލުހުން ބުނެއެވެ. އުމުރުން 22 އަހަރުގެ މި މީހާ އަތުގައި ލައިސަންސް ނޯންނަކަމަށް ފުލުހުން ބުނެއެވެ. ސައިކަލު ދުއްވި މީހާ ހައްޔަރުކުރުން ފަސްކުރީ އޭނާއަށްވެސް އެކްސިޑެންޓްގައި ބޮޑެތި އަނިޔާތަކެއް ލިބިފައިވުމާއެކު، ފަރުވާދެމުން ދާތީކަމަށްވެސް ފުލުހުން ބުނެއެވެ.
