ނައިފަރު ބަނދަރުގައި އަޅާފައި އޮތް 3 ލޯންޗެއްގައި ރޯވެ ބޭނުން ނުކުރެވޭ ވަރަށް އަނދައިފި
މި ހާދިސާ ހިނގާފައިވަނީ ރޭ ދަންވަރުގެ 3:30 ހާއިރު ކަމަށް ލަފާ ކުރެވޭ
ނައިފަރު ބަނދަރުގައި އަޅާފައި އޮތް ލޯންޗުތަކެއްގައި ރޯވެ އަނދާފައި
ޅ. ނައިފަރުގެ ބަނދަރުގައި އަޅާފައި އޮތް ތިން ލޯންޗެއްގައި އަލިފާން ރޯވެ، ބޭނުން ނުކުރެވޭ ވަރަށް އަނދައިފިއެވެ.
އެ ރަށު ކައުންސިލްގެ ރައީސް މުޙައްމަދު ރަޝީދު "ރާއްޖެޓީވީ" އަށް ވިދާޅުވީ މި ހާދިސާ ހިނގާފައިވަނީ ރޭ ދަންވަރުގެ 3:30 ހާއިރު ކަމަށް ލަފާ ކުރެވޭ ކަމަށެވެ. އަދި ލޯންޗުތައް އަޅާފައި އޮތީ ކައިރި ކައިރީގައި ކަމުން އެއް ލޯންޗުގައި ރޯވި އަލިފާންގަނޑު އެހެން ލޯންޗުތަކަށް ފެތުރިގެން ދިޔައީ ކަމަށް ލަފާ ކުރެވޭ ކަމަށް ވެސް އޭނާ ވިދާޅުވިއެވެ.
މުޙައްމަދު އިތުރަށް ވިދާޅުވީ މި ހާދިސާގައި ތިން ލޯންޗުވެސް ބޭނުން ނުކުރެވޭ ވަރަށް އަނދާފައިވާ ކަމަށެވެ. ނަމަވެސް އަލިފާން ރޯވާން ދިމާވި ސަބަބު އަދި އެނގިފައި ނުވާ ކަމަށް އޭނާ ވިދާޅުވިއެވެ.
މި މައްސަލަ ރަށު ކައުންސިލުގެ ފަރާތުން ފުލުހަށް ހުށަހަޅާފައިވާ ކަމަށް ވެސް އޭނާ ވިދާޅުވިއެވެ.
