މުސްތަޤްބަލުގައި ޓޫރިޒަމް ތަރައްޤީ ކުރާއިރު، ވެށި ޓޫރިޒަމް ޕްރޮޑަކްޓެއްގެ ގޮތުގައި ބެލުމަށް ވަރަށް ހާއްސަ އަހަމިއްޔަތުކަމެއް ދޭނެ ކަމަށް ޓޫރިޒަމް މިނިސްޓަރު ޑރ. އަބްދުﷲ މައުސޫމް ވިދާޅުވެއްޖެއެވެ.
ރާއްޖެޓީވީއަށް މިނިސްޓަރު ވިދާޅުވީ ކޮމިއުނިޓީ ބޭސްޑް ޓޫރިޒަމްގެ މައިގަނޑު އެއްބަޔަކީ އީކޯ ޓޫރިޒަމް ކަމަށެވެ. އަދި އެރަށެއްގެ ހުންނަ ގުދުރަތީ ކަންތައްތަކުން މަންފާ ލިބޭގޮތަށް ޕްރޮޑަކްޓްތައް ޑިވަލޮޕްކުރާއިރު ހައިރާންވާހާ ކުޅަދާނަކޮށް ބައެއް ރަށު ކައުންސިލްތަކާއި ޖަމިއްޔާތަކާއި ވިޔަފާރިވެރިން އެކަންތައްތައް ކުރަމުން އަންނަ ކަމަށެވެ.
ޓޫރިޒަމް މިނިސްޓަރު މިފަދައިން ވިދާޅުވެފައިވާއިރު އީކޯ ޓޫރިޒަމް އާއި ސަރފް ޓޫރިޒަމް އަށް ރާއްޖޭގައި މުސްތަގުބަލު އެބަ އޮތްކަމަށް ޤަބޫލުކުރައްވާ ކަމަށް މިނިސްޓަރ އޮފް އެންވަޔަރަމަންޓް ކްލައިމެޓް ޗޭންޖް އެންޑް ޓެކްނޮލޮޖީ އާމިނަތު ޝައުނާ ވެސް ވަނީ ވިދާޅުވެފައެވެ.
މިނިސްޓަރު ވިދާޅުވީ ރާއްޖެއަށް ގިނަ އަދަދެއްގެ ފަތުރުވެރިން ޒިޔާރަތްކުރަމުންދާ އެއް ސަބަބަކީ ރާއްޖޭގެ ގުދުރަތީ ރީތިކަން ކަމަށެވެ. އެގޮތުން ރާއްޖޭގެ ފަޅުތަކާއި މޫދުގެ އިތުރުން، ރާއްޖޭގެ ބައޮސްފިއަރގެ ތަފާތުކަމަކީ ރާއްޖެ ޚާއްސަކޮށްދޭ އެއް ސަބަބުކަމަށް މިނިސްޓަރު ފާހަގަކުރެއްވިއެވެ. އެހެންކަމުން ރާއްޖޭގެ ގުދުރަތީ ވެށި ހިމާޔަތްކޮށް އާ ދާއިރާތަކުން ރާއްޖެ އަށް ވިޔަފާރީގެ ފުރުސަތުތައް ހޯދިދާނެ ކަމަށް މިނިސްޓަރު ފާހަގަކުރެއްވިއެވެ.
ހަމައެހެންމެ ރާއްޖެ އަކީ މޫދުގެ ސަރަހައްދު ބޮޑު ތަނަކަށް ވާއިރު ރާއްޖޭގެ ތިމާވެށީގެ ދުޅަހެޔޮކަން ވަނީ ވަރަށް ބޮޑަށް މޫދާއި ގުޅިފައި ކަމަށް މިނިސްޓަރު ވިދާޅުވިއެވެ. އަދި މޫދާއި ފަރުތަކަކީ ރާއްޖޭގެ ރައުސުލްމާލުތައް ކަމަށް ސިފަކުރައްވާ މިނިސްޓަރު ވިދާޅުވީ އެ ވަސީލަތައް ރާއްކާތެރިކޮށް އެއިން ދެމެހެއްޓެނެވި ގޮތެއްގައި މަންފާ ލިބޭނެ މަގު ފަހިކުރުމަކީ މުހިންމު ކަމެއް ކަމަށް ޝައުނާ ވަނީ ވިދާޅުވެފައެވެ. މީގެއިތުރުން މޫސުމަށް އަންނަ ބަދަލުތަކުން ކުރާ ނޭދެވޭ އަސަރު ކުޑަ ކުރުމަށް އުމްރާނީ ގޮތުން ގެންނަން ޖެހޭ ބަދަލިތަކާއި، އިއާދަކުރުވަނިވި ހަކަތައަށް ކުރާ ހޭދަ އިތުރުކޮށް ރަނގަޅަށް ކުނި މެނޭޖް ކުރުން ފަދަ ކަންކަން ރަނގަޅަށް ކުރަން ޖެހޭ ކަމަށް ޝައުނާ ވިދާޅުވިއެވެ.
