ދަރިއަކަށް ބަލިވެ އިންނަ ޚަބަރު ލިބޭ ހިސާބުން އެ ލިބޭ އުފާވެރިކަމާއެކު، ނުތަނަވަސްކަންވެސް ވެރިވާކަމީ ގަބޫލު ކުރަން ޖެހޭ ހަގީގަތެކެވެ. ދުޅަހެޔޮ ސިއްހަތެއްގައި ދަރިފުޅު އުފަންވާނެ ވަގުތަކަށް ކެތްތެރިކަމެއް ނެތި އިންތިޒާރު ކުރެވެއެވެ. ހަމަ އެފަދައިން، ދުވަސް ނުފުރާ ވިހަން ޖެހި، އެ ދަރިފުޅު އަތުން ބީވެ ހިނގައިދާނެ ކަމުގެ ފިކުރުތަކުން ނަފުސު ނުތަނަވަސް ކުރުވާ ގޮތްވެސްވެއެވެ.
ސައެންސްގެ އިލްމާއި ޓެކްނޮލޮޖީގެ ރޮނގުން ބޮޑެތި ކުރިއެރުންތަކެއް ހޯދަމުންދާ އަދުގެ މި ދުނިޔޭގައި ބާރސެލޯނާގގެ ދިރާސާ ޓީމަކުން ދަނީ، ދުވަސް ނުފުރާ އުފަންވާ ކުދިންގެ ފުރާނަ ސަލާމަތްކުރުމަށް، މަސްނޫއީ ވަސީލަތެއްގެ އެހީގައި ކާމިޔާބުވޭތޯ މަސައްކަތް ކުރަމުންނެވެ. ދުވަސް ނުފުރައި އުފަންވާ ކުދިންނަށް ބޭނުންވާ ފަރުވާ ދިނުމަށް ދިރާސާ ޓީމުން އީޖާދުކުރީ "މަސްނޫއީ" ރަހިމެކެވެ. މައިމީހާގެ ބަނޑުގައި ގަރުބަގަންނަތާ ވަރަށް ކުރީކޮޅު އުފަންވާ ކުދިންގެ ފުރާނަ ސަލާމަތްކުރުމުގެ އަމާޒުގައި އީޖާދުކުރި މަސްނޫއީ ރަހިމުގެތެރޭގައި، ދުވަސް ނުފުރާ ވިހޭ ޖަނަވާރުތަކެއް ވަނީ ގެންގުޅެފައެވެ. އެގޮތުން 12 ދުވަސް ވަންދެން އެ ޖަނަވާރުތައް ގެންގުޅެވުނު ކަމަށް ރިޕޯޓްކޮށްފައި ވެއެވެ.
މަސްނޫއީ ރަހިމުގައި މަސްނޫއީ މަސް ނުވަތަ އާރޓިފިޝަލް ޕްލަސެންޓާ އުފައްދާފައިވަނީ އެތެރެ ފެންނަ ފަދަ ދުއްޔެއްގެ ގޮތުގައެވެ. މި ދުލި ތައްޔާރުކޮށްފައި ވަނީ އޭގެ ސަބަބުން، ދިރުން ހުރި ޓިޝޫތަކަށް ގެއްލުން ނުވާ، ބަޔޯކޮމްޕެޓިބަލް މާއްދާތަކުންނެވެ. ދުވަސް ނުފުރައި އުފަންވާ ދަރިފުޅުގެ ފުއްޕާމެއާއި ގޮހޮރުގެ އިތުރުން، ސިކުނޑި ހެދިބޮޑުވުމުގެ ފުރުސަތުވެސް، މި ރަހިމު ތެރޭގައި ލިބެއެވެ.
މި ޑިވައިސް ހުންނަނީ އެމްނިއޯޓިކް ފްލުއިޑް ނުވަތަ ފެންދުލި ތެރޭގައި ދައުރުވާ ޚާއްސަ ފެން ދައުރުވާފަދަ ނިޒާމަކާ ގުޅާފައެވެ. އަލްޓްރާ ސައުންޑް ސްކޭން ހެދުމަށާއި އެކި ކަހަލަ ކަންކަން މޮނިޓަރ ކުރުމަށްވެސް ފުރުސަތު ލިބެއެވެ.
އާދަޔާ ޚިލާފަށް ޅަފަތުގައި، ދުވަސް ނުފުރައި އުފަންވާ ކުއްޖެއް ކަމަށް ބަލަނީ މައިމީހާގެ ބަނޑުގައި ގަރުބަ ގަންނަތާ 6 މަސް ދުވަތަ އެއަށްވުރެ ކުރު މުއްދަތެއްގެ ތެރޭގައި އުފަންވާ ކުދިންނެވެ. ދުނިޔޭގެ ސިއްހަތު ޖަމިއްޔާ (ޑަބްލިއުއެޗްއޯ)އިން އެންމެ ފަހުން އާންމުކޮށްފައިވާ ތަފާސް ހިސާބުތަކަށް ބަލާއިރު، 2019 ވަނަ އަހަރު، ދުނިޔޭގެ އެކި ކަންކޮޅުތަކުގައި މިފަދަ 9 ލައްކައެއްހާ ކުދިން ވަނީ އުފަންވެފައެވެ.
މަސްނޫއީ ރަހިމުގެ ޚިޔާލާއެކީ އަހަރެމެން މަސައްކަތް މި ކުރަނީ މަންމަގެ ބޭރުގަ، ހަމަ އެފަދަ ހާލަތެއްގަ ބޭއްވޭނެ ނިޒާމެއް ތަރައްގީކުރަން. އެއީ ފޫޅުދަނޑީގެ ތެރޭން ނޭވާލުން ކުރިއަށްގެންދާ ނިޒާމެއް ވީމަ، ފުރިހަމައަށް އުފެދިފަ ނެތް ފުއްޕާމެއިން ނޭވާލާން މަޖުބޫރު ނުކުރާނެ ނިޒާމެއް. ކާނާ ފޯރުކޮށްދޭނީ ފޫޅުދަނޑިން. ވަށައިގެން އޮތް މާހައުލުގެ ފިނިހޫނުމިންވެސް އެއް ހަމައެއްގަ ހިފެހެއްޓޭނެ. މީ ވަރަށް ބޮޑު މަޝްރޫއެއް. ބޭސްވެރިކަމުގެ ތަފާތު އެތައް ޚާއްސަ ކަމެއް ބޭނުންވާ، އެކި ބާވަތުގެ އިންޖިނިއަރުން ބޭނުންވާ މަޝްރޫއެއް. އެއީ ގޮންޖެހުމެއް، މިކަން ހާސިލް ކުރުމަކީ އިންތިހާއަށް ނާޒުކު ކަމެއް.ޑރ. އެޑުއަރޑް ގްރަޓަކޯސް؛ މަޝްރޫއުގެ އިސް ވެރިޔާ
މަސްނޫއީ ރަހިމާބެހޭ ދިރާސާ މަޝްރޫއުގެ އިސްވެރިއެއްގެ ގޮތުގައި ހުންނެވީ ޑރ. އެޑުއަރޑް ގްރަޓަކޯސްއެވެ. ޑރ. ގްރަޓަކޯސްގެ ޓީމުން ވަނީ ޅަ ކަންބަޅި ބޭނުންކޮށްގެން ދިރާސާތަކެއް ހަދާފައެވެ. ދުވަސް ނުފުރާ އުފަންވެފައިވާ ކަންބަޅިތަކެއް ބޭނުން ކޮށްގެން ކުރިއަށް ގެންދިޔަ ދިރާސާއިން، އެ ކަންބަޅިތަކަށް، މަސްނޫއީ ރަހިމުގައި ދިރި އޮވެވުނީ 12 ދުވަހުގެ މުއްދަތަކަށެވެ. ޑރ. ގްރަޓަކޯސްގެ ޓީމުން މިހާރު އަމާޒު ހިފާފައި ވަނީ އޫރު ބޭނުން ކޮށްގެން މި ދިރާސާ ކުރިއަށް ގެންދިއުމަށެވެ. އިންސާނުން ބައިވެރިކޮށްގެން މި ދިރާސާ ކުރިއަށް ގެންދާނީ އޭގެ ފަހުންނެވެ. އެކަމަށް އަދި އަހަރުތަކެއް ހޭދަވާނެ ކަމަށް ބެލެވެއެވެ.
އިންސާނުން ބައިވެރިކޮށްގެން ކްލިނިކަލް މަރުހަލާގެ ތަހުލީލުތައް ފެށުމަށް ހޭދަވާނެ ވަގުތެއް ކަނޑައެޅުމަކީ އަބަދުވެސް ވަރަށް ތަކުލީފު ބޮޑު ކަމެއް. ބާރސެލޯނާގަ ކުރިއަށް މިގެންދާ ދިރާސާއަށް ބަލާނަމަ، ކްލިނިކަލް ޓްރަޔަލްއެއް ކުރިއަށް ގެންދެވޭ ފެންވަރުގެ ޑިވައިސްއެއް އުފައްދަން އަދި ދެތިން އަހަރު ހޭދަވާނެ ކަމަށް ލަފާކުރެވެނީ. އެކަމަކު، މި ރާސްތާއަކީވެސް ހިތަށްވެސް ގެންނަން ދަތި ގޮންޖެހުންތަކާ ކުރިމަތި ކުރުވާނެ ރާސްތާއެއްކަން ގައިމު.ޑރ. އެޑުއަރޑް ގްރަޓަކޯސް؛ މަޝްރޫއުގެ އިސް ވެރިޔާ
ހަމަ މިފަދަ އިތުރު މަޝްރޫއެއް، ޗިލްޑްރަންސް ހޮސްޕިޓަލް އޮފް ފިލަޑެލްފިއާގައިވެސް ވަނީ ކުރިއަށް ގެންގޮސްފައެވެ. ދުވަސް ނުފުރާ އުފަންވެފައިވާ ޖަނަވަރު ބޭނުންކޮށްގެން ކުރި އެ ދިރާސާގައި، 28 ދުވަސްވަންދެން އެ ޖަނަވާރުތައް ދިރިއޮތް ކަމަށް މައުލޫމާތު ލިބެއެވެ.
ކޮންމެ ގޮތަކަށް ކަން އޮތް ކަމުގައި ވީ ނަމަވެސް، މަރަކީ އެއްވެސް މީހަކަށް އެކަމަށް ބާރު ފޯރުވޭނެ ކަމެއް ނޫނެވެ. ކޮންމެ މީހެއްގެވެސް އަޖަލު ހަމަވުމަށް ﷲ ކަނޑައަޅުއްވާފައިވާ ވަގުތުގައި އެކަން ވެދެއެވެ. އެއަށްވުރެ ލަހެއް ނުވަތަ އަވަސް ވުމެއްވެސް ނެތެވެ. ނަމަވެސް، ބަލިތަކުން ސަލާމަތްވެ، ދިފާއު ހޯދުމަށް މަސައްކަތްކުރުމަކީ ނެތް ކަމެއް ނޫނެވެ. އެންމެ ޅަފަތުގައި އުފަންވާ ތުއްތު ކުއްޖާގެ ފުރާނަ ސަލާމަތް ކުރުމަށްވެސް މަސައްކަތް ކުރަން ޖެހެއެވެ. ކޮންމެ ފުރާނައަކީވެސް ދުނިޔަވީ އެއްވެސް މީޒާނަކުން އަގު ނުކުރެވޭހާ އަގު ބޮޑު ނިއުމަތެކެވެ.
