ސްޕޭނަށް އައި ވިއްސާރައިގެ ތޫފާނުގައި މަރުވި މީހުންގެ އަދަދު 205ށް އަރައިފި

ސްޕެއިންގެ ދެކުނު އިރުމަތީ ސަރަހައްދަކަށް އާދަޔާ ޚިލާފަށް ބޯކޮށް ވާރޭވެހި ނުރައްކާތެރި މިންވަރަކަށް ފެންބޮޑުވުމާ ގުޅިގެން މަރުވި މީހުންގެ އަދަދު 205 އިތުރު ވެއްޖެއެވެ.

މަރުވި މީހުންގެ ތެރޭގައި ވެލެންސިއާގެ ކުރީގެ ފުޓްބޯޅަ ކުޅުންތެރިއެއްވެސް ހިމެނެއެވެ.

އެއް ދުވަހުގެ ތެރޭގައި އަހަރެއްގެ ވާރޭ ވެހުމާ ގުޅިގެން ސްޕެއިންގެ ބޮޑު ސަރަޙައްދު ތަކެއްގައި ކުއްލި ފެންބޮޑުވުމެއް އައުމާ ގުޅިގެން، ދިރިތިބި މީހުންނާއި މަރުވެފައިވާ މީހުން ހޯދުމުގެ މަސައްކަތް ސަލާމަތީ ޓީމުތަކުން އަދިވެސް ގެންދަނީ ކުރަމުންނެވެ.

ސަރަޙައްދީ އިދާރާތަކުގެ މަޢުލޫމާތު ދޭގޮތުގައި، ގިނަ އަދަދެއްގެ މީހުން މަރުވެފައިވަނީ ވެލެންސިއާ ސަރަޙައްދުގައެވެ.

ރިޕޯޓުތަކުގައި ބުނާ ގޮތުގައި، ގާތްގަނޑަކަށް 170،000 މީހުންނަށް އަދިވެސް މުވާސަލާތީ ގުޅުން ވަނީ ކެނޑިފައެވެ.

ކުއްލި ފެންބޮޑުވުމާއި ގުޅިގެން ވެލެންސިއާގެ ސަރަހައްދުން ބޮޑުބަޔަކަށް ކަރަންޓުގެ ހިދުމަތް މެދުކެޑިފައި ވީނަމަވެސް ކަރަންޓު ކުންފުނި އައި-ޑީން އިއްޔެ ރޭ ބުނެފައި ވަނީ ވެލެންސިއާގެ 75 އިންސައްތައް އަށް އަލުން ކަރަންޓު ދޫކުރެވިފައިވާ ކަމަށެވެ.

ބޯކޮށް ވާރޭވެހި ނުރައްކާތެރި މިންވަރަކަށް ފެންބޮޑުވުމާ ގުޅިގެން ހުކުރު ދުވަހުގެ ހެނދުނާ ހަމައަށް ވެސް ރެޑްނޯޓިސް ވަނީ ނެރެފައެވެ. ސްޕެއިންގެ ސްޓޭޓް މީޓިއޮރޮލޮޖިކަލް އޭޖެންސީ (އެމެޓް) އިން ހުއެލްވާ އަށް ދީފައިވާ ރަތް އިންޒާރު މިހާރު ވަނީ ނަގާފައެވެ. މީގެ އިތުރުން ކަސްޓެލޯން އަދި ޓަރަގޯނާގައި ދީފައިވާ އޮރެންޖް ނޯޓިސް ވެސް މިހާރު ވަނީ ނަގާފައެވެ. ނަމަވެސް، ހުއެލްވާ އަދި ބެލެއަރިކް ޖަޒީރާތަކުގައި ދީފައިވާ އޮރެންޖު ނޯޓިސް އަދިވެސް ނަގާފައެއް ނުވެއެވެ.

ފެންބޮޑުވުމުގެ ހިތާމަވެރި ހާދިސާގައި އިންޒާރު ދިނުން ލަސްކަމަށް ބުނެ ރައްޔިތުން ވަނީ ހިތްހަމަ ނުޖެހުން ފާޅުކޮށްފައެވެ. ބައެއް މީހުން ބުނާ ގޮތުގައި މިފަދަ ނުރައްކާތެރި ފެންބޮޑުވުމަކަށް އެކަށީގެންވާ ވަރަށް ތައްޔާރުވެފައި ނެތުމާއި، މީހުންނަށް އެކަށީގެންވާ އަވަހަކަށް އިންޒާރު ދީފައެއް ނުވެއެވެ.

ވެލެންސިއާގެ ރައްޔިތެއް ކަމުގައިވާ 65 އަހަރުގެ ހެކްޓަރ ބޮލިވަރ ބުނެފައިވަނީ ސަމާލުކަން ދިނުމަށް މެސެޖެއް ފޮނުވާފައިވަނީ ރޭގަނޑު 8 ޖެހިއިރު ކަމަށާއި ނަމަވެސް އޭގެ މާކުރިން ބޯކޮށް ވާރޭވެހެން ފެށި ކަމުގައެވެ.

ވެލެންސިއާގެ ސަރަހައްދީ ސަރުކާރުގެ ރައީސް ކާލޮސް މަޒޮން ވިދާޅުވީ، ކާރިސާ މެނޭޖު ކުރުމުގައި ހުރިހާ އުސޫލުތަކަކަށް ޢަމަލުކުރެވުނު ކަމަށާއި، އާދީއްތަ ދުވަހުން ފެށިގެން މީހުންނަށް ވިއްސާރައިގެ އިންޒާރު ދޭން ފެށި ކަމަށެވެ.

ބޯކޮށް ވާރޭވެހި ފެންބޮޑުވުމުގެ ސަބަބުން އުފެދުނު ކިސަޑުން ރަށުތެރެ ސާފުކުރުމުގެ މަސައްކަތްތަކުގައި އެހީތެރިވުމަށް 1,700 ސިފައިން ބައިވެރިވެފާވާއިރު، އާންމު ރައްޔިތުންނާއި ވޮލަންޓިއަރުން ވެސް މި މަސައްކަތުގައި ބައިވެރިވެފައިވެއެވެ.

މަރުވި މީހުންގެ އަދަދަށް ބަލާއިރު، މިއީ 1970 ވަނަ އަހަރު ރޫމޭނިއާގައި 209 މީހުން މަރުވި ފެންބޮޑުވުމުގެ ހާދިސާގެ ފަހުން ޔޫރަޕްގައި އެންމެ ގިނަ މީހުން މަރުވި ފެން ބޮޑުވުމުގެ ހާދިސާއެެވެ.