ސްޕެއިންގެ ދެކުނު އިރުމަތީ ސަރަހައްދަކަށް އާދަޔާ ޚިލާފަށް ބޯކޮށް ވާރޭވެހި ނުރައްކާތެރި މިންވަރަކަށް ފެންބޮޑުވުމާ ގުޅިގެން މަދުވެގެން 51 މީހުން މަރުވެއްޖެއެވެ.

ވެލެންސިއާ ކައިރީގައިވާ ޗީވާ ޓައުނުގައި އަހަރެއްގެ ތެރޭގައި ވެހޭ މިންވަރަށް ވުރެ ގިނައިން ވާރޭ ވެހިފައިވަނީ އެންމެ 8 ގަޑިއިރުގެ ތެރޭގައެވެ. އަދި ޓައުނުގެ އޮފިޝަލުން ބުނާ ގޮތުގައި މަރުވެފައިވާ މީހުންގެ އަދަދު ކަނޑައެޅުމަކީ "ކުރެވޭނެ ކަމެއް ނޫން" ކަމުގައެވެ.

ސޯޝަލް މީޑިއާއަށް އަޕްލޯޑްކޮށްފައިވާ ފުޓޭޖްތަކުން ދައްކާ ގޮތުގައި ފެންބޮޑުވުމުގެ ސަބަބުން އެ ސަރަހައްދުގައި ބޮޑު ބިރުވެރިކަމެއް އުފެދި، ފާލަންތައް ވެއްޓި، ކާރުތައް މަގުމަތީގައި އޮޔާ ގޮސް މަގުތަކުގައި ފުނިޖެހިފައިވެއެވެ. އެހެން ވީޑިއޯތަކުން ފެންނަ ގޮތުގައި މަގުތަކުގައި ދެމެމުން ދިޔަ ފެންގަނޑުން ސަލާމަތްވުމަށް ގަސްގަހުގައި ހިފަހައްޓައިގެން މީހުން ތިބިތަން ފެނެއެވެ.

ސްޕެއިންގެ ގިނަ ސަރަހައްދުތަކެއްގައި ބޯކޮށް ވެހުނު ވާރެއާއި ގަދަ ވިއްސާރައިގެ ސަބަބުން ކުއްލި ފެންބޮޑުވުން މެދުވެރިވެފައިވާ ކަމަށް ރިޕޯޓުތައް ބުނެއެވެ.

މީހުން ސަލާމަތްކުރުމުގެ މަސައްކަތްތަކުގައި އެހީތެރިވުމަށް 1،000 އަށްވުރެ ގިނަ ސިފައިން ހަރަކާތްތެރި ވަމުން ދާއިރު ވީނުވީ އެއް ނޭނގި ގެއްލިފައިވާ މީހުންގެ އަދަދު ވަރަށް ގިނަ ކަމަށް ޚަބަރުތައް ބުނެއެވެ. 

ސްޕެއިންގެ ރަސްގެފާނު ފެލިޕޭ ހަވަނަ އެކްސް ގައި ކުރެއްވި ޕޯސްޓެއްގައި ފެންބޮޑުވުމުގެ ހާދިސާގެ ސަބަބުން "ހިތާމަކުރައްވާ" ކަމަށާއި، މަރުވި މީހުންގެ އާއިލާތަކަށް "އިޚްލާސްތެރި ތައުޒިޔާ" ފޮނުއްވާ ކަމަށް ވިދާޅުވެފައިވެއެވެ. 

ހާލުގައި ޖެހި ތާށިވެފައިވާ މީހުންނާއި ގެއްލިގެން ހޯދާ މީހުންނާ ބެހޭ އެތައް ހާސް ފޯން ކޯލުތައް ރޭޑިއޯ އަދި ޓީވީ ސްޓޭޝަންތަކަށް އަންނަމުންދާ ކަމަށް ރިޕޯޓުކުރެވެއެވެ. އެމަޖެންސީ ސަރވިސްތަކުން ބައެއް ސަރަހައްދުތަކަށް ވާސިލުވުމަށް ދަތިތަކާ ކުރިމަތިވަމުންދާ ކަމަށްވެސް ޚަބަރުތައް ބުނެއެވެ.

ފެންބޮޑުވުމުގެ އަސަރު ބޮޑަށް ކޮށްފައިވާ ސަރަހައްދުތަކުގައި ގެއްލިފައިވާ މީހުން ހޯދުމަށް ޑްރޯން ބޭނުންކުރަމުންދާ ކަމަށާއި ހެލިކޮޕްޓަރުގެ އެހީގައި މީހުން ސަލާމަތް ކުރުމުގެ އޮޕަރޭޝަން ހިނގަމުންދާ ކަމަށް އޮފިޝަލުން ބުނެފައިވެއެވެ.