އެމެރިކާގައި ދަރިވަރުންގެ ލޯނު މާފުކުރުން ސުޕްރީމް ކޯޓުން ހުއްޓުވައިފި

އެމެރިކާގައި ދަރިވަރުންގެ ލޯނު މާފުކޮށްދެއްވުމަށް އެ ޤައުމުގެ ރައީސް ޖޯ ބައިޑެން ނިންމެވި ނިންމުން އެ ޤައުމުގެ ސުޕްރީމް ކޯޓުން ހުއްޓުވައިފިއެވެ.

ދަރިވަރުންގެ ލޯނުގެ ގޮތުގައި 430 ބިލިއަން ޑޮލަރުގެ ލޯނު ހުރި އިރު އެ ލޯނުތައް މާފުކޮށްދެއްވާނެ ކަމަށް ބައިޑެން ވައުދުވެވަޑައިގެންނެވިއެވެ. މީގެ ސަބަބުން އެ ޤައުމުގެ 43 މިލިއަން މީހުންނަށް ލޯނުތަކުން ސަލާމަތްވެވޭނެ ކަމަށް އެ ޤައުމުގެ ސަރުކާރުން ގަބޫލު ކުރެއެވެ.

އެމެރިކާގެ ސުޕްރީމް ކޯޓުން ހުކުރު ދުވަހު ނިންމީ އެ ސިޔާސަތު ތަންފީޒު ނުކުރުމަށެވެ. އެގޮތުން، ބައިޑެންގެ ނިންމެވުމަށް ތާއީދު ކުރެއްވީ ސުޕްރީމް ކޯޓުގެ ނުވަ ފަނޑިޔާރުންގެ ތެރެއިން ތިން ފަނޑިޔާރުންނެވެ. ހަ ފަނޑިޔާރުން ވަނީ ލޯނު މާފު ނުކުރުމަށް ތާއީދުކުރައްވާފައެވެ.

ލޯނު މާފުކޮށްދެއްވާނެކަން ބައިޑެން އިއުލާން ކުރެއްވީ މިދިޔަ އޮގަސްޓް މަހުގެ 22 ވަނަ ދުވަހުއެވެ. މިހާތަނަށް 26 މިލިއަން މީހުން އެ ލޯނުތައް މާފުކޮށްދިނުމަށް އެދިފައިވާ ކަމަށް އެމެރިކާ ސަރުކާރުން ވަނީ ހާމަކޮށްފައެވެ.

ބައިޑެންގެ މި ނިންމެވުމަށް ސުޕްރީމް ކޯޓުން ހުރަސް އަޅާފައިވާއިރު މިއީ ސިޔާސީ ގޮތުން އެޅި ފިޔަވަޅެއް ކަމަށް ބައެއް ފަރާތްތަކުން ދަނީ ތުހުމަތު ކުރަމުންނެވެ. އަދި އެމެރިކާގެ ގިނަ މީހުންނަކީ ލޯނުގެ ބުރަ އުފުލަން ޖެހިފައިވާ މީހުންނަށްވާއިރު ލޯނު ނަގާފައިވާ އެހެން މީހުންނަށް އެއްވެސް ލުޔެއް ނުދީ ހަމައެކަނި ދަރިވަރުންގެ ލޯނުތައް އެއްކޮށް މާފު ކުރުމަކީ ތަފާތު ކުރުމެއް ކަމަށް ވެސް ގިނަ ބަޔަކު ދެކެއެވެ.

ސުޕްރީމް ކޯޓުގެ ނިންމުމާއެކު ބައިޑެން ވަނީ ސުޕްރީމް ކޯޓުގެ ނިންމުން ކުށްވެރިކުރައްވައި، ލޯނުތަކަށް ލުއިދެއްވަން އިތުރު ގޮތްތަކެއް ހޯއްދަވާނެ ކަމަށް ވިދާޅުވެފައެވެ.

ރޮއިޓާސް އިން ކުރި ދިރާސާއަކުން ދައްކާ ގޮތުގައި އެމެރިކާގެ އާބާދީގެ 53 އިންސައްތަ ބައިޑެންގެ މި ނިންމެވުމަށް ތާއީދު ކުރެއެވެ.