ޔޫނިއަން ފުޓްސަލް މުބާރާތުގެ ޗެމްޕިއަންކަން އާރުބީޖީ ސްޕޯރޓްސް ކްލަބް ހޯދައިފި

އއ.މަތިވެރި ޔޫނިއަން ސްޕޯރޓްސް ކްލަބްގެ ފުޓްސެލް މުބާރާތުގެ ޗެމްޕިއަންކަން އާރުބީޖީ ސްޕޯރޓްސް ކްލަބުން ހޯދައިފިއެވެ.

އެޓީމުން ތިންވަނަ ފަހަރަށް މުބާރާތް ކާމިޔާބުކުރީ ފައިނަލްގައި އެފްޓީ ވޭލިއަންޓާ ވާދަކޮށް ފުރިހަމަ ވަގުތު 3-3 ން އެއްވަރުވުމުން ނަތީޖާ ނެރުމަށް ޖެހި ޕެނަލްޓީގައި 4-3 ން ކުރި ހޯދައިގެންނެވެ. މުބާރާތުގެ އެންމެ މޮޅު ކުޅުންތެރިއަކީ އެފްޓީ ވޭލިއަންޓްގެ ރިމާހުއެވެ. މުބާރާތުގެ އެންމެ އުއްމީދީ ކުޅުންތެރިއަކީ އިބްރާހީމް ޝާޒުއެވެ. މުބާރާތުގައި އެންމެ ގިނަ ލަނޑު ޖަހައިގެން ދެ ކުޅުންތެރިއަކު ރަންބޫޓް ހިއްސާކުރިއެވެ. އެއީ ސިރުހާންއާއި މުޙައްމަދު އިމްރާންއެވެ. ކޮންމެ ކުޅުންތެރިއަކު ހަތް ލަނޑު ޖެހިއެވެ.

މުބާރާތުގެ އެންމެ މޮޅު ހަ ކުޅުންތެރިންނަކީ ޒިޔާމް, އައިހަމް, ޝިރުހާން, ވަޖީހު އަދި ރިމާހު އެވެ. ފެއަރޕްލޭ ޓީމަކީ ޔަންގް ޕްލޭޔާސް ސްޕޯރޓްސް ކްލަބެވެ. މިމުބާރާތުގެ ޗެމްޕިއަން ޓީމަށް ކަނޑައަޅާފައި އޮތީ 30,000 އަދި ރަނަރަޕް ޓީމަށް 11,000 ރުފިޔާ އެވެ. މިއީ ޔޫނިއަން ސްޕޯރޓްސް ކްލަބުން މިމުބާރާތް ބޭއްވި 17 ވަނަ ފަހަރެވެ.