ލޯބިވެރިޔާގެ ބަރަހަނާ މަންޒަރުތަކެއް ލީކުކޮށްލާނެ ކަމަށް ބުނެ ބިރު ދެއްކި ފުލުހެއްގެ ބަންދުގެ މުއްދަތު ޖަހައިފި
14 ނޮވެމްބަރު 2024 | ބުރާސްފަތި 09:49އޭނާ ހައްޔަރުކުރީ ކޯޓު އަމުރެއްގެ ދަށުން މިމަހުގެ 13 ވަނަ ދުވަހު
ލޯބިވެރިޔާގެ ބަރަހަނާ މަންޒަރުތަކެއް ލީކުކޮށްލާނެ ކަމަށް ބުނެ ބިރު ދެއްކި މައްސަލައިގެ ތުހުމަތުގައި ހައްޔަރުކުރި ފުލުސް މީހާ
ލޯބިވެރިޔާގެ ބަރަހަނާ މަންޒަރުތަކެއް ލީކުކޮށްލާނެ ކަމަށް ބުނެ ބިރު ދެއްކި ފުލުހެއް ހައްޔަރުކޮށް ބަންދުގެ މުއްދަތު ޖަހައިފި އެވެ.
ބުރާސްފަތި ދުވަހު ފުލުހުން ބުނީ އއ.މަތިވެރި ޕޮލިސް ސްޓޭޝަން ގައި މަސައްކަތް ކުރާ މަތިވެރި، ފަޒާ، 19 އަހަރުގެ ޒައިދާން މުހައްމަދު، އޭނާގެ ލޯބިވެރިޔާއަށް ބިރު ދައްކައި އޭނާގެ އޮރިޔާން މަންޒަރު ދައްކުވައިދޭ ފޮޓޯއާއި ވީޑިއޯ ސޯޝަލް މީޑިއާގައި ލީކު ކޮށްލާނެ ކަމަށް ބުނެ ބިރު ދައްކައި، އިންޒާރު ދީ، ބްލެކް މެއިލްކުރި ކަމަށް ތުހުމަތު ކުރެވޭ މައްސަލައެއް ހުށަހަޅާފައިވާ ކަމަށެވެ.
ފުލުހުން ބުނީ، ޒައިދާން އަކީ ރެކްރޫޓު ފުލުހެއް ކަމަށާއި، މިމައްސަލައާ ގުޅިގެން ނޮވެންބަރު މަހުގެ 13 ވަނަ ދުވަހު ކޯޓު އަމުރެއްގެ ދަށުން އޭނާ ހައްޔަރުކޮށްފައިވާ ކަމަށެވެ.
މިމައްސަލައާ ގުޅިގެން އޭނާގެ ބަންދާ މެދު ގޮތެއް ނިންމުމަށް މަތިވެރި މެޖިސްޓްރޭޓް ކޯޓަށް ބުރާސްފަތި ދުވަހު ހާޒިރު ކުރުމުން ތިން ދުވަހަށް ބަންދު ކުރުމަށް ވަނީ އަމުރުކޮށްފައިވާ ކަމަށެވެ.
މިމައްސަލަ ފުލުހުން ގެންދަނީ ތަހުގީގު ކުރަމުންނެވެ.
