ގެއްލިގެން ހޯދަމުންދިޔަ ހައްޖުވެރިޔާ ނިޔާވެފައި އޮއްވާ ފެނިއްޖެއެވެ.

ނިޔާވީ އަލް ޙަރަމައިން ޙައްޖު އެންޑް ޢުމްރާ ކޮމްޕެނީ މޯލްޑިވްސް ޕްރައިވެޓް ލިމިޓެޑް ހަވާލުގައި މި އަހަރު ދިވެހިރާއްޖެއިން ޙައްޖަށް ދިޔަ ރ. މާކުރަތު، މަލަ، މުޙައްމަދު ނަސީމް ޢަލީ (72) އެވެ.

ރާއްޖެއެމްވީއަށް މައުލޫމާތު ދެއްވަމުން އިސްލާމިކް މިނިސްޓަރު ޑރ. އަހުމަދު ޒާހިރު އަލީ ވިދާޅުވީ މުހައްމަދު ނަސީމް މަރުވެފައި އޮއްވާ ފެނުނީ ނޫރު ފަރުބަދައާ ދިމާލުން ކަމަށެވެ. މިނިސްޓަރު ވިދާޅުވީ ނަސީމް ފެނުނީ ހައްޖުވެރިންގެ ކަންތައްތައް ބަލަހައްޓަން ކަނޑައަޅާފައިވާ މުތައްވިފުންގެ ބޭފުޅުންނަށް ކަމަށެވެ. އަދި އޭނާ ފެނިގެން އޭނާ ނިސްބަތްވާ ހައްޖު ގްރޫޕަށް އެކަން އެންގުމުން، އެ ގްރޫޕުގެ ޑޮކްޓަރާއި ގްރޫޕްގެ އިސްބޭފުޅުން އެތަނަށް ދިޔުމަށް މަސައްކަތް ފަށައި، ނަސީމްގެ ހަށިގަނޑު ހޮސްޕިޓަލަށް ގެންދެވުނުކަމަށެވެ. އެބޭފުޅުން ހޮސްޕިޓަލަށް ވަޑައިގެން އެއީ ގެއްލިގެން އުޅުނު ހައްޖުވެރިޔާތޯ ކަށަވަރުކުރެއްވި ކަމަށާއި އަދި އެކަން އިތުރަށް ކަށަވަރުކުރުމަށްޓަކައި މުހައްމަދު ނަސީމްގެ އަންހެނުން ވެސް ހޮސްޕިޓަލަށް ގެންގޮސް، އޭނާގެ ހަށިގަނޑު ދައްކާ އެކަން ކަށަވަރުކުރިކަމަށް މިނިސްޓަރު ވިދާޅުވިއެވެ.

މަރުޙޫމު މުޙައްމަދު ނަސީމު ޢަލީ ވަނީ ޙައްޖު މަހުގެ 8 ވަނަ ދުވަހުގެރޭ މިނާ ޓެންޓުން ނުކުތް ފަހުން ވީނުވީއެއް ނޭނގި ގެއްލިފައެވެ. މުޙައްމަދު ނަސީމް ޢަލީ ހޯދުމަށް ދިވެހި ޙައްޖު މިޝަނާއި، ސަޢޫދީ ޢަރަބިއްޔާގައި ހުންނަ ދިވެހިރާއްޖޭގެ އެމްބަސީ އާއި އަލްޙަރަމައިން ކުންފުނިން ސައޫދީ އަރަބިއްޔާގެ ކަމާބެހޭ ފަރާތްތަކާ ގުޅިގެން ދިޔައީ މަސައްކަތް ކުރަމުންނެވެ.